Ecclesiastes 3

Romani Sinte 2024 (O Debleskro Lab 2024 (Sinte-Manouche))

← Chapter 2 Jump to: Chapter 4 →

1Halauter, hoy djal ap i phoub, koles hi peskro tsiro. Halauter, hoy krah, djal an o čačo tsiro:

2Yek tsiro hi koy, kay o mensho boldo vella, oun yek tsiro hi koy, kay o mensho merella; yek tsiro, kay čivah zenlepen an i phoub, oun yek tsiro, kay vell ko zenlepen pale vin tserdedo.

3Dell yek tsiro, kay vell maredo, oun yek tsiro, kay vell o doukepen sasto; yek tsiro, kay vell o kheer tele phagedo, oun yek tsiro, kay vell o kheer pre-čiddo.

4O ropaske hi yek tsiro, oun o sapaske hi yek tsiro. Dell tsirya, kay rovell maro dji, oun vavar tsirya, kay khelah i barhtyatar.

5Yek tsiro hi koy, te vitsras barra, oun yek tsiro, te čivas barra khetne. Dell yek tsiro, kay taprah men trouyel, oun yek tsiro, kay taprah men bouder gar trouyel.

6Yek tsiro hi koy, te rodas čomone, oun yek tsiro, kay rodah bouder gar. Yek tsiro hi koy, kay rikrah čomone, oun yek tsiro, kay vitsrah les krik.

7Koy hi yek tsiro, kay krenn i menshe pengre koola paash, oun yek vavar tsiro, kay sivenn le penge neve koola. Koy hi yek tsiro, kay rakrah gar, oun i vavar tsiro, kay rakrah.

8Koy hi tsirya, kay i menshe kamenn pen, oun tsirya, kay čingrenn le ap i vavarende. Dell tsirya, kay djivah an o kourepen, oun vavar tsirya, kay dell kek kourepen.

9Hoy vell koleske vin, kay krell peskri boudi oun marell pes tele?

10Me lom koy boudi an o yak, hoy das o Devel i menshende, kolah marenn le pen tele.

11Hako koova, hoy o Devel krell, krell lo ap o čačo tsiro. Oun yob čivas o mensheske an o dji, te hayvell lo, kay hi čomone koy, hoy ačell hako tsiro. Ninna te hi kova yaake, nay hayvell o mensho gar ko tselo koova, hoy o Devel krell, kokres tikne kotya kolestar.

12Doleske penom mange: Či hi feteder o mensheske, har te djivals lo i shoukar djipen oun hi barhtelo koy pashel.

13Yaake nay penah: Mer te rhas, piyas oun boudras i barhtelo djiyeha. Kova lauter vell men o Deblestar.

14Me hayvom, kay halauter, hoy o Devel krella, hako tsireske ačella. Kek mendar nay krell čomone pashel, oun kek mendar nay lell čomone krik. Kova halauter krell o Devel, te sharas mer les.

15Hoy kanna koy hi, his glan mende koy. Oun hoy pal mende vella, his ninna koy. Oun o Devel anell pale, hoy yek kopo koy his.

16Ninna dikom ap i phoub, kote kay hounte rakrans i čačepangre o čačepen, his o čilačepen o ray. Oun kote, kay hounte djans le pal o čačepen, rakran le rhorhepah.

17Kote penom mange: O Devel rakrell o čačepen vin pral koleste, kay djivell an o čačepen, oun pral koleste, kay djivell an o čilačepen. Hako koova, oun halauter, hoy yek krell, koleske dell i čačo tsiro.

18Me penom mange: Halauter djal yaake, te dikell o Devel, har hako mensho pes rikrella. Oun yob kamell les te sikrell, te hi lo gar feteder har i firho.

19O mensheske djal har o firheske: I firhe merenna, yaake merenn ninna i menshe. Oun len halauter hi i dourho. Oun o menshes hi či glan-vi glan o firho. Čačepah, kova hi phares te hayvell.

20Halauter hounte merell, hako djipen vas dran i čik, oun hako djipen vell pale čik.

21Kek nay djinell, te djal o mensheskro dourho pral an o bolepen oun o firheskro dourho tele an i phoub.

22Yaake dikom dren, či hi feteder, har te krell i mensho barhteles peskri boudi; i barhtelo dji hi leskro bravlepen. Kek nay penell o mensheske, hoy ap i phoub djala, te hi lo bouder gar koy.

← Chapter 2 Jump to: Chapter 4 →