Hosea 12

Romani Sinte 2024 (O Debleskro Lab 2024 (Sinte-Manouche))

← Chapter 11 Jump to: Chapter 13 →

1O baro Devel penell: O rhorheno rakepen i menshendar an o them Efrayim hi troul mande. O kheer Israel rhorhell man vavar deblentsa. Ninna i menshe an o them Youda rikrenn pen gar ap mande, ko čačo Debleste, kay rikrell peskro lab.

2O Efrayim kamell o dourho dren te taprell, oun nashell o tato dourho palla, kay vell kotar, kay o kham pre djal. Oun hako dives krell lo boudeder rhorhepen oun randepen. Yon čivenn pen o themeha Assour khetne, oun anenn djet an o them Egiptia.

3Ninna i menshenge an o them Youda rikrell o baro Devel lengro čilačo koova glan i yaka. Yob dell o Yakobes peskri phagi koleske, hoy lo kras, oun har lo djivas.

4Har lo an o per peskri datar his, rhorhras lo peskro phrales. Oun har lo i morsh vas, kouras lo pes o Debleha.

5Yob kouras pes o bolepaskreha oun vas o zorleder, oun mangas lestar o ropah lačepen. Oun o Devel hatsas les pash Betel oun rakras kote leha,

6yob, o ray pral o bolepen oun i phoub, leskro lab hi baro Devel.

7T'mer Israelitarya, avenn pale pash t'maro Debleste! Krenn, hoy lačo oun čačo hi! Hako tsiro rikrenn t'men ap t'maro Debleste!

8O Efrayim hi har i parepaskro. An leskro vast hi i vaga, hoy o rhorheno pharepen sikrell. Yob hi barhtelo, te nay dell lo i vavaren pral o kand.

9Yob penell peske: Me vom bravelo, oun lom mange i baro bravlepen khetne. Hi kova i čilačo koova? Hoy hi djoungelo koleha, hoy mange khetne lom?

10Me, o baro Devel, hom tiro Devel foun ko tsiro, kay anom tout dran o them Egiptia. Me moukau tout pale an plarhtene khera te djivell, har an ko tsiro, har homs pash toute an o moulo tato them.

11Me rakrom ap mire rakepangre, oun sikrom lende boud kope, hoy vella. Dran lende moukom t'menge trad te dell.

12An o foro Gilead mangenn le rhorhene deblen an. Či-moldo hi kolla, kay kova krenna! An o foro Gilgal marenn le gourma i rhorhene deblenge. Doleske venn lengre pre-čidde barra trouyel dino, oun ačenn čiddo ap i harhetikri phoub.

13O Yakob hounte nashas peske an o them Aram, oun o Israel hounte boudras i vavareske, te lell lo i romyat, oun hounte das yak ap i bakre, te nay romedinerell lo lat.

14O baro Devel bičras peskro rakepaskres, te anell lo i Israelitaryen dran o them Egiptia vin. Oun leskro rakepaskro das yak ap lende.

15O kheer Efrayim doukas o baro Debles oun kras les rhoyedo. Doleske vell o rat kolendar, kolen yon maran, pral lende. Oun lengro ray anell koy ladj ap lende pale, hoy le leske kran.

← Chapter 11 Jump to: Chapter 13 →