Hosea 6

Romani Sinte 2024 (O Debleskro Lab 2024 (Sinte-Manouche))

← Chapter 5 Jump to: Chapter 7 →

1Avenn, te djas pale pash o baro Debleste! Yob doukas men, oun yob krell men pale sasto. Yob das men dava, oun yob pandell men pale khetne.

2Pal douy divessa dell lo men nevo djipen, oun ap o triinto dives moukell lo men pale ap i pire tardo te vell, te nay djivas glan leste.

3Mer te das yak koy pre o tselo djiyestar, te prindjras o baro Debles! Yob vella! Kova hi yaake čačo, har o kham hako dives pre djala. Yob vella, har i brishin pash mende vella, ava, har i brishin pal o vend i phoub sapenes krella.

4Hoy te krap touha, Efrayim? Hoy te krap touha, Youda? T'mer moukenn man yaake sik har i folka, hoy taysarlakro krik djal, oun har ko pani, hoy ap o zenlepen hi.

5Doleske bičrom t'menge mire rakepangre. Oun lengro rakepah dau me t'men khetne, oun marau t'men mire labentsa, hoy venn dran miro mouy. Miro čačepen vell glan har o kham.

6Dikenn, hoy kamau: Kamau, te rikrenn t'mer i lačo djiyeha ap mande, oun kamau gar, te anenn mange firhen. Kamau te prindjrenn man čačepah, oun kamau gar, te rhačrenn mange firhen.

7Yaake sik har van le an o them dren pash o foro Adam, rikran le pen bouder gar ap kova, hoy me, o baro Devel lentsa vin krom, oun moukan man.

8Gilead hi i foro pherdo čilače menshe. Mank lende hi ninna save, kay maran vavaren.

9Oun i rashaya krenn pen khetne har čorepangre, kay lourenn an o khatepen, te vell yek, koles nay le vin randenn. Ap o drom an o foro Sichem marenn le. Savo čilačo koova krenn le!

10An o them Israel dikom djoungelo čilačo koova. Kote moukas man o kheer Efrayim har i djouvel, kay peskro romes rhorhell. Yaake kran pen mire menshe pale-čiddo.

11Ninna i menshenge an o them Youda vell ko tsiro, kay lenn le pengri phagi koleske, hoy le kran.

← Chapter 5 Jump to: Chapter 7 →