Joel 1

Romani Sinte 2024 (O Debleskro Lab 2024 (Sinte-Manouche))

Jump to: Chapter 2 →

1Kava hi i lab o baro Deblestar, hoy penas lo ap o Yoel, koleskro dad o Petouel hi.

2Shounenn, t'mer phoure, oun denn yak t'mer halauter, kay djivenn an kava them! Penenn mange, das savo koova yaake rah har t'mer djivenn? Das savo koova an t'mare phourengro tsiro?

3Penenn kova t'mare čavenge, te penenn yon les doureder lengre čavenge, oun kolla lengre čavenge:

4Boud boud stepangre van pral o them oun beshan pen ap o djob. Hoy moukan kolla pral, rhan kolla, kay pal lende van. Hoy kolla pral moukan, rhan kolla, kay pal kolende van. Hoy palle pral ačas, rhan kolla, kay pal kolende van.

5Stenn pre, t'mer mate, oun rovenn! Denn gole, t'mer pipangre! Rovenn troul i molyake, hoy vas krik lino t'mare mouyendar.

6Boud boud stepangre peran an maro them dren. Len hi danda har leven hi.

7Či hi bouder ap mare drakengre rouka, kek patria hi bouder ap mare faygetikre rouka. Ninna lengro kasht hi nango oun parno, lauter hoy ap lende his, rhan le tele.

8Rob har i terni čay, kay nashras lakro pirno, oun rivell pes an i gono.

9Djob oun mool hi bouder gar koy, hoy nay vals dino o baro Debleste an leskro kheer. I rashayenge hi ropaske. Len hi bouder či, te anenn le o baro Debleske.

10O harhetikri phoub hi pherde barra, oun či vell bouder baro koy pre. O djob hi paash, i molengre drake oun i djetengre drake meran tele.

11I harhenge hi ropaske. Dell kek gib, oun dell kek djob. Lauter hi nashedo.

12I drakengre rouka hi trouk. i faygetikre rouken hi bouder kek patria. Ninna ap i phabyengre rouka oun palmtikre rouka, har ap i tsele divye rouka hi bouder kek patria. Oun dran o barhtelo tsiro vas i menshenge i bibarhtelo tsiro.

13T'mer rashaya, kay han tardo pash o Debleskri rhačepaskri, rivenn t'men an gone, oun denn gole i bibarhtyatar! Ninna ratsyake rivenn ko gono gar vin, t'mer, kay boudrenn miro Debleske! Hi kek djob koy oun kek mool, hoy nay anans t'maro Debleske an leskro kheer.

14Denn i menshen khetne gole! Penenn, te rhan le či, te sikrenn le, kay lengri doosh len khaytell. Moukenn i phoureden oun i tsele menshen an kava them pash o baro Debleskro kheer te vell! Yob hi t'maro Devel. Denn ap leste gole!

15Havo bibarhtelo tsiro! O dives, kay o baro Debleskri rholi vell, hi bouder gar dour. Ap ko dives anell o zorelo Devel bari bibarht pral mende.

16Mare yakentsa dikam, har maro rhapen krik lino vas, oun gipen oun khelepen dran maro Debleskro kheer.

17O djob an i phoub meras tele, kek rhapen hi bouder an i djobengre khera, o djob vas djoungelo, oun i djobengre khera phagenn khetne.

18I groumya denn gole i bokatar, oun nashenn trouyel oun hatsenn kek khass. Ninna i bakre bokenna.

19Baro Devel, ap toute dau gole! I yag rhačras o khass an o divyo them, oun i tsele rouka an o veesh.

20Ninna i divye firhe denn gole ap toute. Kek pani nashell oun vell dran i phoub, oun i yag rhačras o khass an o divyo them.

Jump to: Chapter 2 →