John 21

Romani Sinte 2024 (O Debleskro Lab 2024 (Sinte-Manouche))

← Chapter 20 Jump to:

1Pal kova moukas pes o Yezous glan peskre malende pale te dikell, har yon pash o baro pani Tiberias his. Oun kova vas yaake:

2O Simon Petro oun o Thomas, kova, kay dan le les Didimo gole, oun o Natanael dran o gab Kana an o them Galilea, oun kol Zebedeskre čave oun vavar douy o Yezouseskre malendar his koy khetne.

3Oun o Simon Petro penas ap lende: “Me djau te mačrell.” “Mer kamah touha te djal,” penan kol vavar. Yon djan vin oun djan an o bero dren. Oun koy rati tapran le či.

4Sik taysarlake his o Yezous pash o pani tardo, oun leskre mala prindjran les gar.

5Oun o Yezous poučas lendar: “Tapran t'mer či?” “Na-a,” penan le.

6Penas o Yezous: “Vitsrenn t'mare mačengre gone čačes vin pash o bero! Oun t'mer taprenna i mače.” Koy vitsran yon i mačengre gone vin, oun tapran yaake boud mače, kay tserdan le nay i mačengre gone bouder gar dran o pani vin.

7Koy penas ko yek kol deesh-te-douyendar, koles o Yezous o djiyestar kamas, ap o Petreste: “Kova hi maro ray.” Har o Simon Petro kova shounas, rivas lo peskro pralstouno ripen an, hoy rivas lo vin, oun vitsras pes an o pani, te vell lo sikeder ap o them.

8Kol vavar mala van an ko bero, oun tserdan ko mačengro gono pal pende. Yon his gar dour o themestar, nay vell sheel metarya.

9Har yon dran o bero djan, dikan le i yag. Koy his pekle mače pre. Maro his ninna koy.

10Oun o Yezous penas ap lende: “Anenn kol mačendar, kay t'mer kanna tapran!”

11Koy djas o Simon Petro pale an o pani dren, oun tserdas ko mačengro gono ap o them. Koy his sheel-te-panč-deesh-te-triin (153) bare mače dren. Ninna te his yaake boud mače koy dren, djas o mačengro gono gar paash.

12“Avenn oun rhan!” penas o Yezous ap lende. Kek lendar poučas lestar: Koon hal tou? Halauter djinan, kay yob lengro ray hi.

13O Yezous vas pash lende, las ko maro, oun das les lende. Yaake kras yob ninna kol mačentsa.

14Kova his o triinto kopo, kay moukas pes o Yezous glan peskre malende te dikell pal kova, har yob i moulendar djido vas.

15Pal o rhapen penas o Yezous ap o Simon Petreste: “Simon, tou o Yohanneskro čavo, kameh tou man boudeder har kal tsele vavar man kamenna?” “Ava, ray!” penas yob ap leste. “Tou djineh, kay me kamau tout o djiyestar.” “De mire tikne bakren te rhal!” penas o Yezous.

16I douyto kopo poučas o Yezous lestar: “Simon, tou, o Yohanneskro čavo, kameh tou man o djiyestar?” “Ava, ray!” penas yob. “Tou djineh, kay me kamau tout o djiyestar.” “De garda ap mire bakre!” penas o Yezous ap leste.

17O Yezous poučas lestar o triinto kopo: “Simon, tou, o Yohanneskro čavo, kameh tou man o djiyestar?” Koy vas o Petreske ropaske pral kova, kay yob triin kope poučas: Kameh tou man o djiyestar? Oun yob penas: “Ray, tou djineh halauter. Tou djineh, kay me tout kamau o djiyestar.” Penas o Yezous: “De mire bakren te rhal!

18Čačepah, me penau touke: Har tou terno hals, pandal tou tiri dori kokres troul tiro ripen, oun djal kote, kay tou kamal. Te val tou phouro, rikreh tou tire vasta glan toute, oun i vavar pandell tire vasta khetne, oun anell tout kote, kay tou gar kameh te djal.”

19Yaake kamas o Yezous o Petreste te sikrell, har yob merella oun an peskro merepen o Debles bares oun rayles krella. Pal kova penas o Yezous ap leste: “Am mantsa!”

20O Petro rissras pes trouyel, oun dikas koles kol deesh-te-douyendar, kay o Yezous les o djiyestar kamas. Yob his kova, kay čivas pes ap o Yezouseskro beč an koy rati, har yon khetne rhan, oun poučas lestar: “Ray, koon mendar phoukrella ap toute?”

21Har o Petro koles dikas, poučas yob o Yezousestar: “Ray, hoy vell dran koleste?”

22Penas o Yezous ap leste: “Te kamau me, te ačell yob djido, bis te vau pale, palle hi kova gar tiro koova. Am tou mantsa!”

23Yaake vas mashkral kol patslende penlo: Kova merella gar. O Yezous penas gar, kay kova gar merella. Yob penas: “Te kamau me, te ačell yob djido, bis te vau pale, palle hi kova gar tiro koova!”

24Kava maal o Yezousestar hi kova, kay nay penell, kay kova lauter čačo hi. Yob dikas kova oun činas les an kava liil. Oun mer djinah, kay kova, hoy yob penas, čačo hi.

25Hi ninna boud vavar koova, hoy o Yezous kras. Te vals kova lauter an i lila činlo, yek pal o vavar, vals i phoub gar baro doha kol tsele pesse lilenge, patsau me.

← Chapter 20 Jump to: