Judges 12

Romani Sinte 2024 (O Debleskro Lab 2024 (Sinte-Manouche))

← Chapter 11 Jump to: Chapter 13 →

1Oun i morsha dran Efrayim van khetne gole dino. Oun djan vergel o pani Yordan, oun doureder pre pash o foro Zafon. Oun penan ap o Yefta: “Hoske djal tou an o kourepen, te kouress tout i Ammonentsa? Oun men moukal gar gole te dell, te djas touha? Doleske rhačrah tiro kheer khetne touha pre!”

2Kote penas o Yefta ap lende: “Men his i pharo kourepen i Ammonentsa, man oun mire menshen, oun me moukom t'men gole te dell. Oun t'mer van gar ap miri rig.

3Oun har dikom, te venn t'mer gar, kote hounte dom kokres ap mande yak oun djom koy, te kourap man lentsa. Oun o baro Devel das len an miro vast. Oun hoske djan t'mer kava dives pash mande pre, te marenn t'men mantsa?”

4Oun o Yefta moukas i morshen dran Gilead khetne te vell. Oun yon maran pen i morshentsa dran Efrayim. Oun i morsha dran Gilead dan i morshen dran Efrayim. [Glan i tsiro penan i morsha dran Efrayim: T'mer dran Gilead han či har naashepangre, kay nashan penge dran o them Efrayim an o them Manasse. T'maro them Gilead hi čiddo mashkral Efrayim oun Manasse.]

5Oun i morsha dran Gilead lan kol platse dren, kay nay djan le vergel o Yordan an o them Efrayim. Oun hako kopo te vas i Efrayimari, hoy ap o naashepen his, oun penas “Mouk man vergel te djal!” palle poučan i morsha dran Gilead lestar: “Hal tou i Efrayimari?” Oun te penas lo “na-a”,

6palle penan le ap leste: “Pen Shibbolet!” Oun te nay rakras lo les gar čačes vin oun penas “Sibbolet”, palle lan le les, oun dan les kote pash o Yordan moulo. Oun yaake van an ko tsiro 42.000 (star-deesh-te-douy zerya) morsha dran Efrayim moulo dino.

7Oun o Yefta dran Gilead his shob bersha o čačepaskro ray pral o Israel. Oun yob meras oun vas paskedo an yek kol foryendar an o them Gilead.

8Oun pal leste vas o Ibzan dran Betlehem o čačepaskro ray pral o Israel.

9Oun koles his triyanda morsh čave oun triyanda ča. Peskre čen das lo romende, kay gar leskre menshendar his. Oun leskre morsh čavenge las lo triyanda romyen, kay ninna gar leskre menshendar his. Oun efta bersha his yob o čačepaskro ray pral Israel.

10Oun o Ibzan meras oun vas paskedo an o foro Betlehem.

11Oun pal leste vas o Elon dran o kheer Zabulon o čačepaskro ray pral o Israel oun kras deesh bersha o čačepen pral i Israelitarya vin.

12Oun har lo meras, vas lo paskedo an o foro Ayalon an o them Zabulon.

13Oun pal leste vas o Abdon o čačepaskro ray pral o Israel. Leskro dad his o Hillel dran o foro Piraton.

14Oun koles his star-desha morsh čave oun triyanda čavengre čave. Oun kolla klissan ap 70 (efta-desha) bourike. Oun yob kras o čačepen pral o Israel orhta bersha vin.

15Oun har meras lo, vas lo paskedo an o foro Piraton an o them Efrayim an ko pralstouno them, kay glan kova i Amalekarya djivan.

← Chapter 11 Jump to: Chapter 13 →