Leviticus 21

Romani Sinte 2024 (O Debleskro Lab 2024 (Sinte-Manouche))

← Chapter 20 Jump to: Chapter 22 →

1O baro Devel penas ap o Mose: Pen i rashayenge dran o kheer Aron: Ma taprenn i moules an, te venn gar pale-čiddo!

2Kokres saven dran t'mare familye nay taprenn an, ninna te venn t'mer palle pale-čiddo: T'mari day, t'maro dad, t'maro čavo, t'mari čay, t'maro phraal,

3t'mari pheen, kay gomme gar romedini hi, oun an t'maro kheer djivell. Kal moulen nay taprenn an, ninna te krell kova t'men pale-čiddo.

4Ma krenn t'men pale-čiddo ap yekeste, kay hi romedino yekeha t'mare menshendar!

5T'mer rashaya, ma činenn t'mare balla pral ap t'maro shero tele, vitar gar t'mari čor. Krenn t'menge kek činepen an t'maro mass!

6T'mer rashaya hounte djivenn yaake, te han kokres t'maro Debleske, oun hounte krenn či, hoy anell ladj ap leskro lab. T'mer han kolla, kay anenn leske rhapen, hoy vell leske rhačedo. Doleske hounte krenn či, hoy krell t'men pale-čiddo.

7I rashay hounte vell peskro Debleske koy. Doleske hounte romedinerell lo kek loubni, vitar gar i čay, kay i morshestar an-tapedo vas, vitar gar i djouvel, kay peskro romestar mouklo vas.

8T'mer Israelitarya, i rashay hi t'menge i Debleskro morsh! Yob rhačrell glan mande o rhapen, hoy mange anlo vell. Doleske vell lo t'menge i morsh, koles vi-rodom, te boudrell lo mange. Me hom o baro Devel. Kek vavar hi har me. Oun t'men rodom mange vin, te venn mire menshe.

9Te vell i rashayeskri čay i loubni, anell i bari ladj ap peste oun peskro dadeste. Yoy vell an i yag rhačedo.

10O pralstouno rashay, ap koleskro shero o djet čoredo vas, har vas lo an peskri boudi dren čiddo, oun ap koleste i rashayengre koola hi, kova moukell peskro shero gar divyes vin dikell. Oun kol koola, hoy lo ap peste hi, tserdell lo gar an kotya, ap ko tsiro, kay rovell leskro dji pral i mouleste.

11Pash kek mouleste djal lo, te vell lo gar pale-čiddo, vitar gar, te hi ko moulo peskro dad oder peskri day.

12Yaake rah har i moulo an peskro kheer hi, hounte djal lo gar dran o Debleskro kheer vin, te krell lo gar o kheer peskro Deblestar pale-čiddo. Yob vas djeteha maklo, te vell lo i rashay peskro Debleske. Me hom o baro Devel.

13Yob nay romedinerell kokres i čat, kay kek morshestar an-tapedo vas,

14kek djouvel kolakro rom meras, kek djouvel, kay peskro romestar mouklo vas, kek loubni, – kokres i čay i menshendar Israel.

15Kova hounte krell lo, te lell lo gar čave, kay pale-čiddo vans. Me hom o baro Devel, oun rodom les mange vin, te vell lo miro rashay.

16O baro Devel penas ap o Mose:

17Pen ap o Aron: Kek tire čavendar, kay pal toute venna, vell glan o Debleskri rhačepaskri, te anell lo rhapen glan peskro Debleste,

18te hi lo korelo, bango, te hi leskro shero oder leskro kerpro gar yaake, har hounte vals lo,

19te hi les i phagedo piro oder i phagedo vast,

20te hi les i bango doumo, te hi lo yek, kay tikno ačas, oder koles i parno kotar an i yak hi, oder i nasslepen ap peskri hauta hi, oder yek, koleske tella lauter pash dino hi.

21Kek morsh, kay vell o rashayestar o Aronestar, oun kay savo koova ap peste hi, nay vell glan o Debleskri rhačepaskri, te rhačrell lo rhapen o baro Debleske.

22Ko rhapen, hoy o Debleske anlo vas, nay rhal lo, ninna ko rhapen, hoy kokres i rashayenge hi.

23Pash ko voudar dran than, hoy glan koy kouč isema hi, nay djal lo gar, vitar gar pash o Debleskri rhačepaskri, te krell lo o Debleskro kheer gar pale-čiddo. Me hom o baro Devel, oun rodom kava kheer vin, te hi lo mange.

24Yaake rakras o Mose ap o Aroneste oun ap leskre morsh čavende oun ap i tsele Israelitaryen.

← Chapter 20 Jump to: Chapter 22 →