Leviticus 27

Romani Sinte 2024 (O Debleskro Lab 2024 (Sinte-Manouche))

← Chapter 26 Jump to:

1O baro Devel penas ap o Mose:

2Pen ap i Israelitarya: Te das yek pes sovel, te dell lo man, o baro Debleste, i menshes, palle nay ginell lo koles pale vin.

3I morsheske, kay mashkral 20 (biish) bersha oun 60 (shob-deesh) bersha hi, koleske playsrell lo i 50 (paash-sheel) roupene beme. Yek bema hounte vell yaake pharo har i roupeni bema an o Debleskro kheer pharo hi.

4I djouvyake venn 30 (triyanda) roupene beme playsedo.

5I čaveske mashkral 5 (panč) oun 20 (biish) bersha venn 20 (biish) roupene beme playsedo, i čake an o emligo phourepen 10 (deesh) roupene beme.

6I tikno čaveske mank yek čon oun panč bersha venn panč roupene beme playsedo, oun i čake triin roupene beme.

7I morsheske, kay 60 (shob-deesh) bersha hi oun pral shob-deesh, venn 15 (deesh-te-panč) roupene beme playsedo, oun i djouvyake 10 (deesh) roupene beme.

8Te hi kova, kay pes sovel das, yaake čorvelo, te nay anell leskro vast kova gar khetne, palle anell lo ko menshes pash o rashayeste. Oun ko rashay dikell peske koles an, oun penell har boud love leske playsedo hounte venn, pal kova hoy kova nay dell, kay pes sovel das.

9Te das yek pes sovel, te dell lo o baro Debleste i firhes, savo firhes, hoy nay vell leske maredo oun rhačedo, hi ko firho o baro Debleske.

10Yob parell les gar vin, oun dell kek vavar firho koleske, kek lačo firho i djoungelo firheske, vitar kek djoungelo firho i lačo firheske. Te parell yek sau firhes i vavar firheske, palle venn kol douy firhe o baro Debleske.

11Te das yek pes sovel, te dell lo o baro Debleske i firhes, hoy pale-čiddo hi, hoy nay vell gar maredo oun leske rhačedo, palle anell lo ko firhes glan o rashayeste.

12O rashay dikell peske ko firhes an, oun dikell, hoy lačo oun hoy čilačo ap leste hi, oun penell, har boud ko firho moldo hi. Yaake har o rashay penell, yaake vell.

13Te kamell yek ko firhes palpale te ginell, palle dell lo ko pančto kolestar pashel, hoy o rashay penas.

14Te das yek pes sovel, te dell lo peskro kheer o baro Debleste, palle dikell o rashay les peske an, oun dikell, hoy lačo oun hoy čilačo ap leste hi, oun penell, har boud kova moldo hi. Yaake har ko rashay penell, yaake vell.

15Te kamell kova, koleske ko kheer his, peskro kheer pale vin te ginell, palle dell lo pash kova hoy o rashay penas, o pančto kotar pashel. Palle vell ko kheer pale leskro.

16Te das yek pes sovel, te dell lo i kotar phoub o baro Debleste, palle vell diklo, har boud djob ap ko kotar phoub vin vitsedo vell. Hi kova yek gono djob, palle hi ko kotar phoub 50 (paash-sheel) roupene beme moldo.

17Te kamell lo ko kotar phoub o Debleske te dell an ko ersto bersh pal ko bersh, kay i tseli siyaan mouklo vas, ačell kova pash kol 50 roupene beme.

18Te kamell lo les i tsiro pal kova te dell, palle dikell o rashay pal, har boud bersha trouyel hi, bis te vell ko bersh, kay i siyaan mouklo vell. Oun kal bersha venn tele tserdedo.

19Te kamell kova, kay ko kotar phoub o baro Debleste das, ko kotar palpale ginell, palle dell lo kova, hoy koy phoub moldo hi, oun o pančto kotar pashel. Palle vell li pale leskri.

20Te ginas lo koy phoub gar tele o baro Deblestar, oun bikrell lat ap i vavareske, palle nay vell ko kotar phoub gar bouder vin ginlo.

21An ko tsiro, kay vell i siyaan mouklo, ačell ko kotar phoub o baro Debleske. Oun o rashay lell les.

22Te das yek pes sovel, te dell lo o baro Debleste i kotar phoub, hoy ginas lo, oun hoy las lo gar peskro dadestar pral leskro merepen,

23palle dikell o rashay har boud ko kotar phoub moldo hi, bis te vell ko bersh, kay i siyaan mouklo vell. Oun kal love playsrell ko morsh gomme kava dives. Kal love hi o baro Debleske.

24An ko bersh, kay i siyaan mouklo vell, djal ko kotar phoub palpale ap koleste, konestar yob les ginas, koleskri familyake koy phoub hi.

25Kol roupene beme hoy playsedo venn, te vell čomone pale ginlo, hounte venn yaake pharo har i roupene beme an o Debleskro kheer pharo hi. Yek roupeni bema hi 12 (deesh-te-douy gramme) pharo.

26I firho, hoy o phoureder leskri datar hi, kova hi o baro Debleske. Te hi savo firho i gouroum, i bakro, i morsh bouzni, nay lell les kek mensho, te dell lo les o baro Debleske. Leskro hi lo.

27Te hi ko firho kol firhendar, kay pale-čiddo hi, palle ginell les peskro ray pale, pal kova hoy o rashay penell, te hi ko firho moldo. Oun yob dell o pančto kotar gomme pashel. Te vell ko firho gar vin ginlo, palle vell lo kol lovenge, hoy o rashay penas, bikedo.

28Halauter, hoy das yek kolestar, hoy leskro hi, te vell kova hako tsireske o baro Debleske, nay vell gar bikedo, vitar gar pale ginlo – nay vell i mensho, i firho oder i kotar phoub. Kova hoy o baro Debleske hako tsireske dino vas, čačepah, kova ačell leske.

29Te hi kova i mensho, nay vell lo gar vin ginlo. Yob hounte vell maredo.

30O deshto kotar halauterestar, hoy baro vas ap i harhetikri phoub oun ap i rouka, hi o baro Debleske, oun hounte vell leske anlo.

31Te kamell yek kova te rikrell, hounte playsrell lo les, oun dell o pančto kotar pashel.

32Ninna i groumyendar, i bakrendar oun i bouzyendar hi hako deshto firho o baro Debleske. Kek dikell palla, hi ko firho lačo, hi lo gar lačo. Vitar gar vell i firho vin paredo. Yaake har djan le glan o bakrengro koy, yaake lell lo hako deshto ap i rig. Te parell lo yekes vin, hi kol douy firhe o baro Debleske, oun nay venn gar vin ginlo.

34Kava hi kol laba, hoy penas o baro Devel o Moseske, har his lo ap i berga Sinay, te rikrenn pen i Israelitarya ap lende.

← Chapter 26 Jump to: