Mark 13

Romani Sinte 2024 (O Debleskro Lab 2024 (Sinte-Manouche))

← Chapter 12 Jump to: Chapter 14 →

1Har o Yezous dran o Debleskro baro kheer vin djas, penas yek peskre malendar ap leste: “Sikepaskro, dik, save bare barra oun save shoukar khera!”

2Penas o Yezous ap leste: “Kal bare khera, hoy tou dikeh, djan paash. Kek bar ačell ap o vavareste!”

3Oun yob djas ap o djeteskri berga, hoy hi vergel o Debleskro baro kherestar, oun beshas pes kote. Oun har yon kokres his, poučan lestar o Petro, oun o Yakobo, oun o Yohanni, oun o Andreas:

4“Pen menge, kaana vell kova? Har nay dikas mer, kay kova lauter glan o voudar tardo hi, hoy vella?”

5Oun o Yezous penas ap lende: Denn yak! Ma moukenn t'men kekestar o Debleskro dromestar tele te anell!

6Koy venna boud morsha, kay penenna: Me hom o Kristo, ko baro ray, kolestar o Devel penas, te vell yob. Oun boud menshe patsenn ap lengro rhorhepen.

7An ko tsiro hi kourepen an kol themma, kay hi dour t'mendar oun ninna an kol themma, kay hi gar dour t'mendar. T'mer te shounenn kova, ma trashenn! Kova hounte vell yaake. Ko tsiro, kay i phoub paash djala, vell gar yaake sik.

8I pralstoune pral bare themma kourenn pen i vavar pralstunentsa. Oun i menshe dran yek them marenn i menshen an i vavar them. Oun kate oun kote vell i phoub trisslemen. Boud menshen hi gar doha te rhal. Kova lauter vella yaake pral i phoub, har i douka venna pral i djouvyate, kay lell i ternepen.

9Denn yak ap t'mende! T'mer venn glan i čačepangre anlo, oun rhan dava an i biboldengre kangria. T'mer patsenn ap mande. Doleske anenn le t'men glan i pralstoune oun glan i bare rayende, te rakrenn yon i phagi vin pral t'mende. Te han glan lende tardo, palle nay rakrenn t'mer mandar, te shounenn yon pral mande o čačepen.

10Glan ko tsiro, kay i phoub paash djala, hounte vell o lačo lab mandar penlo an i tsele themma.

11Te taprenn le t'men, te anenn le t'men glan i čačepangre, ma darenn, hoy hounte penenna! Ap ko dives, kay han glan lende tardo, sikrell o Devel t'men, hoy te penenn lenge. Kova rakrenna! Ma bistrenn, t'mer han gar kolla, kay rakrenna. Kova hi o Debleskro Dourho, kay dran t'mende rakrella.

12An kol divessa phoukrell o phraal ap peskro phraleste, te vell yob maredo. Oun ninna o dad krell kova peskro čaveha. Oun i čave hadenn pen pral pengre dadende oun pral pengre dayende, oun denn len an i vasta kolendar, kay marenn len.

13T'mer patsenn ap mande. Doleske venn i tsele menshe rhoyedo ap t'mende. Kova, kay ačell zoreles tardo an o patsepen, yaake rah, har yob djivella, kova lell o Debleskro djipen.

14An o Debleskro lab hi činlo pral koy djoungeli čilači figura. Koon kava draverella, kamaus, te hayvell lo les ninna. Ap ko dives, kay dikenn t'mer koy djoungeli čilači figura kote tardo, kay hounte vell li gar tardo, palle hounte nashenn kolla, kay hi an o them Youdea, sik ap i berge!

15Kova, kay hi pral ap o kheer, hounte djal bouder gar an peskro kheer dren, te lell lo peske čomone.

16Oun kova, kay boudrell ap i kotar phoub, kova hounte djal bouder gar khere, te lell lo peskri baya.

17Koy bibarht hi bari kol djouvyenge, kay hi an vavar koova, ninna kol djouvyenge, kay hi len i ternepen.

18Mangenn o Deblestar, te vell kova lauter gar an o vend.

19Kova, hoy an kol divessa pral i menshende vella, hi djoungleder har ko tselo čilačo koova, hoy ap i menshende vas yaake rah, har o Devel i phoub kras. Oun ko tsiro, hoy vell pal kova, vell vitar gar yaake čilačo.

20Te krals o Devel ko čilačo tsiro gar tikneder, vals kek mensho dran o čilačo tsiro vin. Kolen, kay o Devel peske vin rodas, kolenge kras lo o čilačo tsiro tikneder.

21Te penell yek ap t'mende: Dikenn, kate hi o Kristo! – palle patsenn les gar! Oun te penell i vavar: Ake, kote hi lo! – palle patsenn les vitar gar!

22Rhorhene morsha venna oun penenna ap t'mende: Me hom o Kristo. Oun i rhorhene rakepangre penenna: Me vom o Deblestar bičedo. Oun yon krenna baro oun zorelo koova, hoy i mensho nashte krell gar dran peskri zoor. Te djals kova, anans le kolen o Debleskro dromestar tele, kolen o Devel peske vin rodas.

23Denn yak ap t'mende! Me penom t'menge kova lauter, te djinenn les ap ko tsiro, kay kova vella.

24An kol divessa pal ko čilačo tsiro, vell o kham kalo har i rat, oun o moonto dikell kek bouder.

25Oun i bare momlia ap o bolepen perenn tele. Oun o bolepaskri zoor perell khetne.

26Palle dikenn le o Menshengro Čaves, har vell lo an i volke bari zoryah oun raylepen.

27Palle bičrell lo i bolepangren pral i tseli phoub, te anenn le dran hako them kolen khetne, kay len o Devel peske vin rodas.

28Me kamau te sikrap t'mende čomone. Dikenn ap o faygetikro rouk! Te venn leskre kashta zenelo, oun i patria venn dran lende vin, palle djinenn t'mer, te vell sik o niyal.

29Yaake hi kova ninna koleha, pral kova rakrom. Te dikenn t'mer, har kova lauter vella, palle djinenn t'mer, kay yob glan o voudar tardo hi.

30Čačepah, me penau t'menge: Kol menshe, kay an ko tsiro djivenna, dikenna kova lauter pengre yakentsa.

31O bolepen oun i phoub ačenna gar. Mire laba ačenna hako tsiro.

32Kek djinell ko dives oun ko tsiro, kay kova lauter vella. I bolepangre an o bolepen djinenn les gar, vitar gar o Debleskro čavo. Miro dad an o bolepen kokres djinell les.

33Denn yak! Rikrenn t'mare yaka pre! T'mer djinenn gar, kaana hi ko tsiro kay.

34Kova hi yaake har pash i morsheste, kay djas ap o them. Yob moukas peskro kheer oun das peskre boudepangren lauter an o vast, hakeneste das lo leskri boudi. Oun penas ap koleste, kay pash o voudar beshdo hi: De garda ap miro kheer! Ma sob!

35Yaake penau t'menge: Rikrenn t'mare yaka pre! T'mer djinenn gar o tsiro, kay o ray pral o kheer pale vella. Yob nay vell ap i rati, nay vell mashkral an i rati, nay vell ap ko tsiro, kay dell o bashno gole, nay vell taysarlake.

36Yaake denn garda, te hatsell lo t'men gar ap o sopen, te vell lo ap yek kopo.

37Kova, hoy me t'menge penaua, ko penau lauterenge: Denn yak oun sovenn gar!

← Chapter 12 Jump to: Chapter 14 →

Recommended Reading

Commentary Mark Commentaries → Devotional Mark Devotional Guide → Get This Bible Romani Sinte (O Debleskro Lab (Sinte-Manouche)) Study Bible →