Mark 16

Romani Sinte 2024 (O Debleskro Lab 2024 (Sinte-Manouche))

← Chapter 15 Jump to:

1Har o Debleskro dives trouyel his, djan i Maria dran Magdala oun i Maria, koy day o Yakobestar, oun i Salome oun ginan djet, hoy soungella mishto, te makenn le les dren.

2Sik taysarlake pal o Debleskro dives djan yon pash o moulengro kheer, har o kham pre djas.

3Oun yon rakran mashkral pende: “Koon lell menge ko bar krik, hoy glan o moulengro kheer tardo hi?”

4Kova his i baro bar. Oun har yon pash ko moulengro kheer van, dikan le, kay ko bar krik lino vas.

5Oun yon djan an o moulengro kheer dren. Kote dikan le i terno morshes ap i čači rig beshdo, koles his troul peste i lengsto biyalo ripen. Oun yon trashan.

6Yob penas ap lende: “Ma trashenn! T'mer rodenn o Yezouses dran Nazaret, kay vas ap o troushel dino. Yob stas i moulendar pre. Yob hi gar kate. Dikenn kote, kay yob čiddo his.

7Kanna djan pash leskre malende! Penenn lenge oun o Petreske, kay djal yob glan t'mende an o them Galilea! Kote dikenn t'mer les, har yob les t'menge penas.”

8Oun yon djan dran ko moulengro kheer vin, oun nashan penge. Yon trissan i trashatar oun penan kekeske čomone, yaake baro his lengri daar.

9Har o Yezous i moulendar pre stas, sik taysarlake pal o Debleskro dives, his i Maria dran Magdala koy ersti, kolatar moukas lo pes te dikell. Yoy hi koya, kolatar yob glan i tsiro efta bengen vin tradas.

10Oun yoy djas pash kolende, kay djan o Yezouseha, oun kolengro dji kanna doukas, oun kay rovan pral leste. Oun yoy penas lenge, te dikas li les.

11Oun har yon shounan, kay yob djivella, oun kay dikas li les, patsan le kova gar.

12Pal kova moukas yob pes douy vavar peskre malendar te dikell, kay his ap o drom glan o foro. Pash lende dikas lo vavarčandes vin har yon les prindjran.

13Oun kolla douy djan pale, oun penan les kol vavar malenge. Kolen patsan le vitar gar.

14Koy pre, har kol deesh-te-yek pash o rhapen beshdo his, moukas lo pes lendar te dikell oun čingras ap lende, kay hi lengre djia har barra, oun te patsan le gar kolenge, kay les dikan, har yob i moulendar pre stas.

15Oun yob penas ap lende: “Djan pash i tsele menshende ap i phoub oun sikrenn hakeneste miro drom!”

16“Koon patsell ap mande oun vell taufedo, kova djal gar nashedo. Koon gar ap mande patsella, kova djal nashedo!

17Kolla, kay patsenn ap mande, krenn baro koova an o Debleskri zoor. An miro lab tradenn le bengen i menshendar vin, oun rakrenn an vavar rakepen.

18Yon te lenn sapa an pengre vasta, oun te piyenn le i pipen, kay nay merenn le, palle venn le gar nasselo. Ap i nasslende čivenn le i vasta pre. Oun kolla venn sasto.”

19Har o ray Yezous yaake lentsa rakras, vas lo pral an o bolepen hadedo, oun beshas pes ap o Debleskri čači rig.

20Oun yon djan, te penenn le i menshenge o lačo lab o Yezous Kristestar an hake gaba oun forya. Oun o ray Yezous his pash lende peskri zoryah, oun kras baro koova, kay nay krell kek mensho. Oun yaake dikan i menshe, kay leskro lab čačo hi.

← Chapter 15 Jump to: