Romans 16

Romani Sinte 2024 (O Debleskro Lab 2024 (Sinte-Manouche))

← Chapter 15 Jump to:

1Te vell mari pheen, i Febe, pash t'mende, mangau t'mendar, len lat lačes pash t'mende pre. Yoy hi o Debleskri boudepaskretsa an o foro Kenkrea. Lenn lat yaake lačes pash t'mende pre, har maro ray Yezous kova i patslendar kamella. Denn lat lauter kova, hoy lat hounte vell djipaske! Yoy his boud patslenge koy, ninna mange.

3Penenn lače laba mandar ap i Priska oun ap o Akvila! Yon boudrenn mantsa o Yezous Kristeske.

4Har kaman man i menshe te marell, van le ap miri rig. Lengro djipen his lenge či moldo. Pash lende parkrau man gar kokres, na-a, ninna i tsele patsle, kay kek bibolde hi, parkrenn pen pash lende.

5Penenn ninna lače laba mandar ap kol patslende, kay an lengro kheer khetne venna, oun ap miro lačo maal, o Epayneto. Yob vas o ersto patslo an o them Asia.

6Penenn ninna lače laba mandar ap i Mariat! Kaya boudras yaake boud t'menge.

7Penenn ninna lače laba mandar ap o Androniko oun i Yunia! Kolla hi ninna bibolde har me oun his mantsa an o stilepen. Yon hi an-diklo mank kolende, kolen o Yezous Kristo vin bičras, te penenn le leskro lab. Kol douy van glan mande ap leste patslo.

8Penenn ninna lače laba ap o Ampliato, miro lačo maal an o patsepen,

9oun ap o Urbano, kay mentsa khetne o Yezous Kristeske boudrella, oun ap miro lačo maal, o Stakis.

10Penenn ninna lače laba ap o Apelles! Kova sikras, te hi lo zoreles tardo an o patsepen. Penenn ninna lače laba ap o Aristobolo oun ap kolende, kay djivenn an leskro kheer.

11Penenn lače laba ap o Herodion, kay hi i biboldo har me, oun ap o Narcisso oun kol patslende an leskro kheer.

12Penenn lače laba ap i Trifena oun i Trifosa! Kolla boudrenn o Yezouseske, maro rayeske. Penenn lače laba ap miri lači pheen, i Persis! Koya kras i bari boudi i patslenge.

13Penenn lače laba ap o Rufo, koles maro ray Yezous vin rodas, oun ap leskri date. Kaya hi mange yaake har miri day.

14Penenn lače laba ap o Asinkrito, i Flegonta, o Hermes, o Patrobas, o Hermas oun ap i patslende, kay pash lende hi.

15Penenn lače laba ap o Filologo oun i Yulia, o Nereo oun leskri pheen, oun ap o Olimpas oun kol tsele patsle, kay pash lende hi.

16Taprenn t'men trouyel, oun denn t'men i čoum! Kova sikrella hakeneste, t'mer han phrala oun phenya an o patsepen. I tsele patsle, kay ap o Yezous Kristeste patsenna, penenn t'menge: Ačenn maro Debleha!

17Mire phrala, me mangau t'men, denn yak, te shounenn t'mer gar ap kolende, kay anenn čingepen mank i patslende oun sikrenn o Debleskro drom vavarčandes har kova, hoy t'mende siklo vas, oun krenn t'maro patsepen paash! Rikrenn t'men lendar pale!

18Save menshe boudrenn gar maro rayeske, o Yezous Kristeske. Na-a, yon krenn, hoy lenge kokres mishto hi. Shoukar labentsa oun baro rakepen anenn le kolen o Debleskro dromestar tele, kay denn gar yak.

19Boud menshe shounan, kay t'mer ap o Debleste patsenn oun ap leste shounenn. Doleske hom me barhtelo pral t'mende. Oun me kamau o tselo djiyestar, te hayvenn t'mer boud oun boudeder, hoy lačo hi, oun te krenn kek čilačo koova.

20O Devel, kay dell t'men peskri barht an o dji, krell o bengeskri zoor paash. Oun ko tsiro vell sik. O lačepen maro rayestar, o Yezous Kristestar, djal t'mentsa!

21O Timoteo, kay mantsa boudrella, penell t'menge lače laba. Ninna o Louka, oun o Yason, oun o Sosipater, – kolla hi lauter bibolde har me, – yon penenn t'menge lače laba.

22Me, o Tertio, činom an kava liil kova, hoy o Paulo mange penas, oun me penau t'menge ninna lače laba.

23O Gayo, – kova las man an leskro kheer dren, – penell t'menge lače laba. An leskro kheer venn i tsele patsle khetne. Ninna o Erasto, kay dell garda ap o foreskre love, oun o Kvarto, miro lačo phraal an o patsepen, penenn t'menge lače laba.

24O lačepen maro rayestar, o Yezous Kristestar, djal t'mentsa lauterentsa! Amen.

25Sharedo vell o baro Devel! Les hi i zoor, te krell lo t'maro patsepen zoreles. Yaake penell les o lačo lab, hoy me penau i menshenge, ko lačo lab o Yezous Kristestar. Kate vell siklo o drom pash o Debleste. Kova djinan le i rah tsiro gar.

26Kanna vell ko drom diklo. Ko dromestar činan i Debleskre rakepangre an pengre lila, yaake har o baro Devel kamas. Kova djivella hako tsiro, oun kamas i tsele menshendar ap i phoub, te patsenn le oun shounenn le ap leste.

27Yob kokres hi gosevo, oun bičras menge o Yezous Kristes. Sharedo vell yob hako tsiro! Amen.

← Chapter 15 Jump to: