Romans 2

Romani Sinte 2024 (O Debleskro Lab 2024 (Sinte-Manouche))

← Chapter 1 Jump to: Chapter 3 →

1Tou mensho, kay dikeh ap kolende oun peneh, har baro hi lengri doosh, tou nay peneh gar toutar: “Man hi kek doosh ap mande.” Ko čilačepen, hoy tou ap o vavareste dikeh, hi ninna ap toute. Tou te sikreh ap o vavareskri doosh, rakreh tou o čačepen pral toute vin.

2Mer djinah, o Devel djal pal o čačepen, te dell lo kolen i phagi, kay savo čilačo koova krenna.

3Tou te sikreh ap i vavarende, kay savo koova krenna, oun tou kreh kova ninna, patseh tou čačepah, tou nay nasheh o Debleskri rholyatar krik?

4Hi touke o Debleskro baro lačepen či moldo? Les hi i baro dji oun dell i menshen gar sik pre. Djineh tou gar o Debleskro lačepen, hoy kamell tout ap leskro drom te anell?

5Oun tou kameh gar pash leste te vell. Tiro dji hi har bar. Doleske vell o Debleskri rholi baro oun bareder, hoy ap toute vella ap ko dives, kay hi o Devel o čačepaskro ray oun rakrell o čačepen vin pral i tsele menshende.

6Ap ko dives dell lo hakenes pal kova, hoy yob kras.

7Kolen, kay moukan gar tele, te krenn le o lačepen, dell lo o djipen, hoy gar pre-herella. Yon hi kolla, kay čivan pengro dji koy pre, te dikell o Devel kamles ap lende, oun te lell lo len pash peste an leskro raylepen, kay dell lo len o djipen, hoy gar pre-herella.

8Ap kol vavarende vell leskri rholi. Lenge hi lo gar lačes. Yon hi kolla, kay djivan pal pengro shero oun shounan gar ap o Debleskro čačo lab, oun kran, hoy lengro čilačo dji lenge penas.

9Bibarht oun daar vell ap i tsele menshende, kay o čilačepen kran, gar kokres ap i biboldende, na-a, ninna ap kolende, kay kek bibolde hi.

10Raylepen, čačepen oun barht dell o Devel kolen, kay kran o lačepen, – gar kokres i bibolden, na-a, ninna kolen, kay kek bibolde hi.

11O Devel dikell gar ap yekeste, koon yob hi.

12Kolla, kay kran o čilačepen, djan nashedo, ninna te prindjran le gar o Moseskre laba, kay penenn, har yon hounte djivenn. Oun lauter, kay prindjran kol laba oun kran o čilačepen, lenn ninna pengri phagi.

13Glan o Debleste hi kolla čačo, kay krenna, hoy yob kamella, oun gar kolla, kay shounenn kol laba oun krenn gar, hoy kol laba penenna.

14Mank i menshende, kay prindjrenn gar o Moseskre laba, hi save, kay krenna, hoy o Devel kamella, ninna te vas kova lende gar siklo. Lenge penell lengro dji, hoy lačo oun čačo hi.

15Yaake dikah, an lengre djia hi činlo, hoy o Devel kamella. Te kran le o čilačo koova, penell lenge lengro dji: Kova his gar mishto, hoy kral. Te kran le lačo koova, penell lenge lengro dji: Kova his mishto, hoy kral.

16Lauter kova, hoy an o mensheskro dji hi, vell diklo ap ko dives, kay hi o Yezous Kristo o čačepaskro ray oun rakrell o čačepen vin pral i menshende. Yaake penell les o Debleskro lab, hoy me i menshenge penau.

17Hoy krenn t'mer, i bibolde? T'mer sharenn t'men oun penenn: “Me hom i biboldo oun prindjrau o Moseskre laba. O baro Devel hi miro Devel.

18Me djinau, hoy yob kamella, oun dikau an o Moseskre laba, hoy lačo oun čačo hi.

19Me nay anau i korelen ap o Debleskro drom, ninna kolen, kay an i kali rat djana.

20Me hom i sikepaskro kolenge, kay či djinenna oun hayvenna. An o Moseskre laba hi man o tselo gosvepen oun čačepen.”

21Hoy te penap t'menge? T'mer sikrenn i vavarende o Debleskro drom. Oun t'menge kokres penenn t'mer gar: Djas ap o Debleskro drom! T'mer penenn i vavarenge: Ma čorenn! Oun t'mer kokres čorenn.

22T'mer penenn: Ma rhorhe tiri romyat i vavar djouvyah! Oun t'mer krenn kova. T'mer penenn: Kova hi gar mishto, te mangenn vavar koova an har o Debles. Oun t'mer čorenn ko koova.

23T'mer sharenn t'men oun penenn: Mer djinah, hoy o Moseskre laba penenna, oun t'mer krenn kova gar. Doleske anenn t'mer ladj ap o Debleste.

24Yaake hi kova činlo an o Debleskro lab: Dran t'mende rakrenn i vavar menshe djoungeles pral o Debleste.

25Ninna te han bibolde oun ap t'maro mass činlo, hounte rikrenn t'men ap kova, hoy o Devel an o Moseskre lila penas. Te krenn t'mer, hoy kote činlo hi, pale hi t'menge boud moldo, te han bibolde. Te krenn kova gar, han t'mer glan o Debleste har yek, kay hi kek biboldo.

26Yek, kay hi kek biboldo, te krell yob kova, hoy o Devel kamella, palle dikell o Devel yaake lačes ap leste, har te vals lo i biboldo.

27Oun yaake vell kova, kay kek biboldo hi, i čačepaskro ray pral t'mende, i biboldende. Yob kras, hoy o Devel kamella, oun t'mer kran gar, hoy o Devel kamella, ninna te hi t'men kol tsele činle laba, hoy penenn, har te djivenn, oun han činlo ap t'maro mass.

28I čačo biboldo hi gar kova, kay hi činlo ap peskro mass.

29Na-a! Kova hi i čačo biboldo, koleske o Debleskro Dourho i nevo dji das. Kova nay krenn i činle laba gar. Savo biboldo rodell gar, te vell lo i menshendar sharedo. Yob vell o Deblestar sharedo.

← Chapter 1 Jump to: Chapter 3 →