Zechariah 13

Romani Sinte 2024 (O Debleskro Lab 2024 (Sinte-Manouche))

← Chapter 12 Jump to: Chapter 14 →

1“An ko tsiro nashell i pani an o foro Yerusalem, hoy nashell i menshenge dran o kheer David oun i vavar menshenge an Yerusalem, te thovell lo lengri doosh oun kova krik, hoy kras len pale-čiddo glan mire yaka”, penell o baro Devel.

2O baro Devel, ko ray pral o bolepen oun i phoub, penell: An ko tsiro krau, te mangenn i menshe an o them Youda bouder kek rhorhene deblen an. Oun kolengre laba venn bistedo. Ninna kol rakepangre, kay penenn, te hi le Debleskre rakepangre oun hi kova gar, oun yon rakrenn, hoy i vavar dourho lenge penell, kolen tradau vin dran o them.

3Te penell savo morsh doureder, te hi leskro rakepen o Deblestar, palle penenn leskro dad oun leskri day ap leste: “Tou hounte meress! Tou rakral rhorhepen an o lab o baro Deblestar.” Oun leskro dad oun leskri day, denn les moulo čourye, doleske, kay rakras lo rhorhepen an o baro Debleskro lab.

4An ko tsiro ladjenn pen kol rhorhene rakepangre koleske, hoy dikan le an i souni. Oun yon rivenn bouder gar i plaashka dran bouzyengre balla ap pende, te denn le i menshen pal i kanda.

5Na-a, hakeno lendar penell: “Me hom kek Debleskro rakepaskro. Me hom i harho. I boudi ap i harhetikri phoub hi miri boudi foun tiknes pre.”

6Te poučenn le lestar: “Hoy hi ko doukepen ap tiro beč?” Palle penell lo: “Kote vom dino an o kheer mire malendar.”

7O baro Devel, ko ray pral o bolepen oun i phoub, penell: “Miro rharo, hade tout! Dja ap o bakrengro pre, kay mange boudrella, ap koleste, kay pash mande tardo hi! De o bakrengres! Palle nashenn i bakre krik, hakeno ap peskri rig! Ninna ap i tiknende hadau miro vast.”

8O baro Devel penell: “An o tselo them venn triin menshendar douy tele dino oun merenn. Kokres yek ačell djido.

9Oun kolenge, kay pral ačenn, venn phare tsirya, kay hounte djan le dren, te venn le djoudjo kerdo, yaake har roup oun sonakay djoudjo kerdo vell an i yag. Palle denn le ap mande gole, oun me shounau len. Me penau: Yon hi mire menshe. Oun yon penenn: Tou baro Devel, hal maro Devel. ”

← Chapter 12 Jump to: Chapter 14 →