2 Thessalonians 2

Santali Bible (সান্তালী বাইবেল)

← Chapter 1 Jump to: Chapter 3 →

1E boehako, aboren Probhu Jisu Mạsi doe hijukʼa ar uni do mitʼ domte jarwakate acʼ ṭhene idibona. Ar noa babotre ale do noale nehõrape kana,

2“Probhu Isorakʼ din do seṭer akana,” Noate nạbi lekate roṛakatʼ johar kathate se eṭakʼ jãhãeyakʼ kathate se aleakʼ olakʼ menkate jãhãn ciṭhi iạte ape do usạrate alope bilbilạukʼa se alope botorokʼa.

3Okoe hõ jemon aloko bulạupe, ente ona din hijukʼ lahare Isor upạrte maraṅ bhiṅgṛạu do hoyokʼa, ar uni nonosṭoren hopon, one okoe do maraokʼ reakʼ katha menakʼtae uniye sodorokʼa.

4Isor mente cetʼko menakʼ onako sanamakʼ upạrte ar sewa ocokʼ jotowakʼ upạrteye teṅgokʼte uni do apnarte maraṅe udugokʼa; ar Isorakʼ mundilre duṛupʼkate acʼge Isor menteye udugokʼa.

5Iń do tinre ape ṭheniń tahẽkana unre noako kathageń lạiyape kan tahẽkan, ona do cetʼ bape disạyeda?

6Uni nonosṭoren hopon jemon okte lahare aloe sodorokʼ onate okaṭakʼte ńitokʼe akoṭ ocoakan ona mape baḍaege. Ape do noa hõpe baḍae akada je, nonosṭoren hoponakʼ okoakʼ kạmiko do ńithõ calakʼ kangea,

7menkhan okoe uniye akoṭ dohoakade uni ạuriye ocogokʼ hạbicʼ akoṭetegeye tahena. Ar ona tayom do uni nonosṭoren hopone sodorokʼa.

8Probhu Jisu do acʼakʼ moca reakʼ sãhetʼteye marao utạrea ar acʼakʼ ṭhonokteye sodorokʼte uniyakʼ daṛeye cabaetaea.

9Ar nonosṭoren hopone hijukʼre uni soṅgete Soetan reakʼ daṛe hõ tahena. Ona daṛe do joto lekan eṛe cinhạ ar hahaṛa ar daṛe kạmi hotete sodorokʼa.

10Ar nosṭokʼkan horte laha akan hoṛko bulạuko reakʼ joto lekan bulạuakʼ hotete, noko hoṛ doko maraokʼa, ente kại khon bańcao ńam lạgitʼ sạriyakʼtetʼ do bako dulạṛ akada ar ataṅ hõ bako ataṅ akada.

11Onate Isor do onko ṭhen nonkan mitʼṭecʼ daṛeye kola onate bhul horteye idikoa, jemon eṛeakʼreko pạtiạukʼ.

12Ar okoe sạriyakʼre pạtiạukʼ baṅkate behokakʼ kạmire rạskạko ńametʼkan onko sanamko uni doe bicạr dusikoa.

13Probhu Isorre dulạṛiạ boehako, ape ńutumte jaoge Isor gun manao joharae lek kantalea, ente kại khon bańcao ńam lạgitʼ Isor do pạhil khongeye bachao dohoakatʼpea. Sonot Jiu hotete Isor lạgitʼe begar doho akatʼpete ar bhage sombat reakʼ sạriyakʼre apeakʼ biswạs hotete kại khon bańcaope ńamakada.

14Ale oka bhage sombatle porcaretʼkan ona hotete bańcao ńam lạgitʼ uni doe hohoakatʼpea, jemon ape do aboren Probhu Jisu Mạsiyakʼ ṭhonok reakʼ bhạgiyạdarkope hoyokʼ.

15Onate E boehako, teṅgo ṭak akae tahenpe, ar aleakʼ ciṭhite se kathate okaṭakʼle lại cetʼ akawatʼpe ona sapʼ doho akae tahenpe.

16Aboren Probhu Jisu Mạsi ar Isor Baba do apeakʼ ontorreye udgạupema ar sanam bhage kạmi ar kathareye kajak ocopema.

17Unigeye dulạṛketʼ bona are dayawatʼbonte asambheṛ udgạu ar purạ rạskạ reakʼ ase dan akatʼ bona.

← Chapter 1 Jump to: Chapter 3 →