2 Thessalonians 3

Santali Bible (সান্তালী বাইবেল)

← Chapter 2 Jump to:

1E boehako mucạtʼ katha do noage, ale lạgitʼ koepe cetʼleka Probhu Isorakʼ katha ape talare usạra pasnaolen onkage ona do pasnao idikʼte ṭhonokokʼtege tahena.

2Arhõ koe alepe jemon becol ar bạṛicʼ hoṛkoakʼ ti khon rukhiyạle ńam, ente sanamkoge biswạs menakʼtakoa ona do baṅa.

3Menkhan Probhu Isor doe pạtiạrgea; unige ape doe kajak ocopea ar Soetanakʼ ti khone rukhiyạpea.

4Probhu Isor tulucʼ jopoṛao menakʼpete ape reaṅ noa pạtiạu menakʼtalea je, ale okakole hukum akatʼpe ona lekagepe kạmikana ar kạmi iditegepe tahena.

5Probhu Isor do apeakʼ ontor Isorakʼ dulạṛ horte ar Mạsiyakʼ sombhuri horteye ạyur iditapema.

6E boehako, aboren Probhu Jisu Mạsi ńutumte noale hukumape kana, jodi jãhãe ḍhilisiliye colonetʼ khan ar ale ṭhen khon oka cecetʼakʼpe ńamakatʼ ona bae senakʼ kan khan, enḍekhan uni tulucʼ do alope helmelokʼa.

7Baḍaegeape cetʼlekate ale leka colon lek tapea mente. Ape talarele tahẽkan jokhecʼ ale do ḍhilisili bale colonleda,

8se begor damte okoeyakʼ jomakʼ hõ bale jomleda. Ale do siń ńindạle mehnot akada arle kosṭo akana, jemon aperen bojhako alole hoyokʼ.

9Ape ṭhen khon goṛo ńam reakʼ ạidạri bạnukʼtale ona do baṅa, menkhan jemon ale lekape colon onate nonka kạmikatele udukʼatʼpe tahẽkana.

10Ape ṭhen tahẽkan jokhecʼgele hukumatʼpe tahẽkana, jãhãe kạmi baṅ sanayede khan uni do jom hõ aloe jomma.

11Alele ańjomeda ape modre adomko do ḍhilisiliko coloneda, ar kạmige bako kạmikana, bickomko ajare baṛayeda.

12Aboren Probhu Jisu Mạsi iạte nonkan hoṛkole hukumako kana arle sikhạuetʼko kana, jemon onko do nindhạn monte kạmikate akoakʼ jomakʼ apnarteko jogaṛ joṅ.

13E boehako, bhageakʼ kạmi kạmite alope bhagaokʼa.

14Noa ciṭhire olakʼ aleakʼ katha jãhãe bae batao khan, enḍekhan uni do ńel oromkaepe. Ar uni tulucʼ ape do gate hõ alope gatekʼa jemone lajaokʼ.

15Menkhan uni do bạiri mente hõ alope hudisea, bickom boeha mente bujhạuaepe.

16Sulukren Probhu Isor do acʼge sanam okte jotowakʼre suluke dan ape ma. Probhu Isor do ape sanamko tulucʼe tahenma.

17Niạ johar katha do iń Pạulge apnarakʼ titeń oletʼkana. Ar noage ińakʼ mimitʼ ciṭhi reakʼ cinhạ do; ar nonkageń oletʼa.

18Aboren Probhu Jisu Mạsiyakʼ daya ape sanamko tulucʼ baṛe tahenma.

← Chapter 2 Jump to: