Hosea 6

Santali Bible (সান্তালী বাইবেল)

← Chapter 5 Jump to: Chapter 7 →

1Dela, abo do Probhu Isor ṭhen bon ruạṛ calakʼa. Unigeye or cirạ akatʼbona, ar unigeye boge bona; unige abo doe ghạl akatʼbona, ar unige aboakʼ ghaokoe bedhaokata bona.

2Thoṛa din tayom unige aboe bańcao bona, ar lahate lekae ạgu ruạṛ bona jemon uni samaṅre bon girobas daṛeakʼ.

3Dela, abo do Probhu Isor bon aṅgocema; ar baḍaeye lạgitʼ bon pańjayema. Siń candoe rakabokʼ leka uni do khạṭigeye sodorokʼa; uni do aghãṛ cando reakʼ dakʼte ote lohotʼetʼkan leka ar jạṛi dakʼ lekageye hijukʼa.

4Probhu Isore meneda, “E Ephrayim, am do cetʼ iń cekawama? E Jihudạ, am hõ cetʼ iń cekawama? Amakʼ pạtiạr do setakʼ reakʼ kuṛhạ leka, aṅga marsalokʼ reakʼ sisir leka oka do usạrate chanokʼkan.

5Ona iạte ińren nạbiko hotete ape doń getʼ khanḍa khunḍi akatʼpea, ińakʼ moca reakʼ kathateń gocʼakatʼpea; ińakʼ bicạr reakʼ ray do ape cetanre bijli leka malkao rakapʼ akana.

6Iń do pạtiạrgeń khojkana dãṛẽ do baṅ; jeredokʼ samaṅokʼakʼ khon Isorge jemon mońjteko baḍaeye onageń khojkana.

7Adam leka ińiń bandhao akatʼ bondobos do bape manaoleda; ape do ińrepe bepạtiạrena.

8Gilead do onko bạṛicʼ hoṛkoakʼ nagraha kana one onḍe do onkoakʼ mãyãmte perecʼ jaṅga reakʼ chap menakʼa.

9Ḍạkuko cetʼleka manwa lạgitʼko tãṛãkʼkokʼ, onkage naekeko hõ tãṛãkʼ akaeko tahenkana; onko do Sikem calakʼ horre manwako khũnetʼkoa ar heṛan bạṛicʼakʼko kạmikana.

10Israelko talare mitʼṭecʼ bạṛicʼakʼ iń ńel akada. Ephrayim do onḍeye laṭghaṭ akada ar Israel doe bhonḍ akana.

11“E Jihudạ, am lạgitʼ hõ phosol irokʼ reakʼ okte do ṭhik dohoakana.

← Chapter 5 Jump to: Chapter 7 →