Luke 4

Sadri

1यीशु पवितर आत्मा से भरल, यरदन नदी से घुरलक, आउर चालीस दिन तक पवितर आत्मा केर सिखाएक से सुनसान ठाँव में घुमत रहलक।

2आउर हूवाँ शैतान उके चालीस दिन तक परखते रहलक। इ दिनमन में उ कोनोवें नी खालक आउर जब उ दिन पूरा होलक, तो उके भूख लगलक।

3तब शैतान उकर से कहलक, “अगर तोंय परमेश्‍वर केर बेटा हेकिस, तो इ पखना के कइह दे कि रोटी बाइन जाओक, ताकि तोंय उके खाएक पारबे।”

4मगर यीशु उके जबाब देलक, “पवितर किताब में लिखल अहे, ‘आदमी सिरिफ रोटी से हें जिंदा नी रहेला।’ ”

5तब शैतान उके ऊँचा ठाँव में लेई गेलक आउर तुरते दुनिया केर सोउब राइज के देखालक।

6आउर यीशु से कहलक, “मोंय इकर सोउब अधिकार आउर धन-दौलत तोके देमूँ, काले कि इ सोउब मोके देवल जाय हे, आउर जेके मोंय चाहोना, उके हें देई देवोना।

7से लगिन अगर तोंय ठेहुना टेइक के मोर भक्ति करबे, तो इ सोउब तोर होई जाई।”

8यीशु उके जबाब देलक, “पवितर किताब में लिखल अहे, ‘तोंय प्रभु अपन परमेश्‍वर केर भक्ति कर आउर सिरिफ उकरे सेवा कर।’ ”

9तब शैतान यीशु के यरुशलेम शहर में लेई गेलक आउर यहूदी मनक मंदिर केर सोउब से ऊँचा ठाँव में ठड़ुवालक, आउर उकर से कहलक, “अगर तोंय सच में परमेश्‍वर केर बेटा हेकिस, तो इ गोइठ के साबित करेक लगिन खुद के हिंयाँ से हेंठे गिराय दे।

10काले कि पवितर किताब में लिखल अहे, ‘परमेश्‍वर अपन स्वरगदूतमन के आगया देवी, आउर उमन तोके बचाय लेबैं।

11उमन तोके हाँथों हाँथ झोईक लेबैं, कहीं एइसन ना होवोक कि तोर गोड़मन में पखना से चोट लगी।’”

12यीशु उके जबाब देलक, “पवितर किताब में एहो कहल जाय हे, ‘तोंय अपन प्रभु परमेश्‍वर के ना परखबे।’”

13इ लेखे शैतान सोउब रकम से परखेक केर पाछे, थोरेक समय लगिन यीशु ठिना से चाइल गेलक।

14फिन यीशु पवितर आत्मा केर शक्ति से भाइर के गलील परदेस में घूइर आलक, आउर इ गोइठ आसे-पासे केर सोउब इलाका में फाइल गेलक।

15आउर यीशु यहूदी मनक प्रार्थना घरमन में उपदेस देते रहलक, आउर सोउब आदमीमन उकर बड़ाई करत रहैं।

16जब यीशु हूवाँ से घूइर के नासरत नगर में आलक, जहाँ उ पोइस बाइढ़ रहे, हूवाँ अपन रीति केर मोताबिक यहूदी मनक आराम केर दिन में, यहूदी मनक प्रार्थना घर में जाय के पवितर किताब से पढ़ेक लगिन ठड़ालक।

17उके पढ़ेक लगिन यशायाह परमेश्‍वर केर संदेश के बताएक वाला केर किताब के देवल गेलक, आउर यीशु उ किताब के खोइल के उ जगा के निकलालक, जहाँ इ लिखल रहे,

18“प्रभु केर आत्मा मोर उपरे अहे, काले कि उ मोके इकर लगिन भेइज हे कि मोंय गरीब आदमीमन के शुभ समाचार सुनामूँ, बंधुवामन के छोड़ामूँ, अंधरामन केर आँइख खोलमूँ आउर दबल-कुचल आदमीमन के आजाद करमूँ,

19आउर इ कइह के परचार करमूँ कि परमेश्‍वर बटे से उ समय आय हे कि उ अपन आदमीमन के छोड़ाई।”

20आउर यीशु पवितर किताब के बंद काइर के सेवक के देई देलक आउर बाइठ गेलक। आउर यहूदी मनक प्रार्थना घर केर सोउब आदमीमन टकटकी लगाय के उके देखेक लगलैं।

21तब यीशु उमन से कहलक, “आइज हें इ पवितर किताब में लिखल गोइठ तोहर सुनते हें पूरा होलक।”

22आउर सोउब आदमीमन यीशु केर बड़ाई करलैं। उमन दया से भरल गोइठ उकर मुँह से सुइन के ताजुब होलैं, आउर कहेक लगलैं, “का इ यूसुफ केर बेटा ना लगे?”

23यीशु उमन से कहलक, “तोहरेमन जरूर हें मोके इ खभनइत सुनाबा, ‘हे बाइध पहिले तोंय अपन इलाज कर! जे चमत्कार केर काम तोंय कफरनहूम नगर में काइर हिस, हमरे उके तोर बारे में सुइन ही, उके हिंयाँ अपन नगर में हों कर।’ ”

24फिन यीशु कहलक, “मोंय तोहर से सच कहाथों, केऊ हों परमेश्‍वर केर संदेश के बताएक वाला अपन नगर में माइन-मर्यादा नी पावेला।

25मोंय तोहर से सच कहाथों कि परमेश्‍वर केर संदेश देवेक वाला एलिय्याह केर दिनमन में जब आकाश बंद रहे, आउर साढ़े तीन साल तक पानी नी आलक, आउर सोउब देस में बड़का अकाल होई गेलक, तो उ बेरा इसराइल देस में ढेइर बिधवामन रहैं।

26फिन भी परमेश्‍वर केर संदेश के बताएक वाला एलिय्याह के उमन में से केकरो ठिना नी भेजल गेलक, मगर सिरिफ सैदा परदेस केर सारफत नगर में रहेक वाला एगो दोसर जाइत केर बिधवा जनाना ठिना भेजल गेलक।

27आउर परमेश्‍वर केर संदेश के बताएक वाला इलीशा केर समय में इसराइल देस में ढेइर आदमीमन केर कोढ़ बेमारी रहे, फिन भी उमन में से केखो ठीक नी करल गेलक, सिरिफ सीरिया देस केर रहेक वाला एगो नामान नाँव केर परजाइत आदमी के ठीक करल गेलक।”

28इ गोइठ के सुनते हें यहूदी मनक प्रार्थना घर में जेतना आदमीमन रहैं सोउब खिसाय गेलैं।

29आउर उमन उइठ गेलैं आउर यीशु के नगर से बाहरे निकलालैं, आउर जे पहार उपरे उ मनक नगर बसल रहे, उकर चुन्दलू में लेई गेलैं, आउर उमन उके हूवाँ से हेंठे गिराएक खोजत रहैं ताकि उ मोइर जाओक।

30मगर यीशु उ मनक माझे से निकइल के चाइल गेलक।

31यीशु फिन गलील परदेस केर कफरनहूम नगर में आलक, आउर उ यहूदी मनक आराम केर दिन आदमीमन के उपदेस देवत रहे।

32उमन उकर उपदेस के सुइन के ताजुब होई गेलैं, काले कि यीशु इ लेखे सिखात रहे कि उके सिखाएक केर अधिकार अहे।

33यहूदी मनक प्रार्थना घर में एगो आदमी रहे, जेकर में भूत रहे। उ जोर से चिल्लालक,

34“हे नासरत नगर केर रहेक वाला यीशु, तोंय हमरे से का चाहिसला? का तोंय हमरे के नाश करेक आय हिस? मोंय तोके जानोना तोंय केहर हेकिस? तोंय परमेश्‍वर केर पवितर आदमी हेकिस, तोंय परमेश्‍वर बटले आय हिस।”

35यीशु उके घुड़इक के कहलक, “चुप रह, आउर उ आदमी में से निकइल जा!” तब भूत उके माझे में पटइक के, बेगर नोकसान पोंहचाले उकर में से निकइल गेलक।

36तब जेतना आदमीमन यहूदी मनक प्रार्थना घर में रहैं, सोउबमन ताजुब होलैं आउर एक दोसर से कहेक लगलैं, “इ कइसन बचन हेके? काले कि उ अधिकार आउर शक्ति केर साथ भूतमन के आगया देवेला, आउर उमन उकर आगया के माइन के निकइल जायना।”

37इकर पाछे, उ आदमीमन यीशु केर बारे में ढेइर आदमीमन के बतालैं, इ लेखे चाइरो बटे हर ठाँव में इ गोइठ फाइल गेलक।

38यीशु यहूदी मनक प्रार्थना घर से उइठ के सिमोन केर घर गेलक, आउर सिमोन केर साइस के जार धाइर रहे, आउर उमन उकर लगिन यीशु से बिनती करलैं कि उके ठीक काइर देवोक।

39यीशु उकर ठिना ठड़ाय के जार के डाँटलक आउर जार उकर से उतइर गेलक, आउर सिमोन केर साइस तुरते उइठ के, उ मनक सेवा-सुसइर करेक लगलक।

40जब यहूदी मनक आराम केर दिन बीत गेलक आउर बेइर डूइब गेलक। तब जेकर-जेकर हिंयाँ बरने-बरन केर बेमरिया आदमीमन रहैं, उमन के आदमीमन यीशु ठिना लेई लानलैं, आउर यीशु एक-एक झन केर उपरे हाँथ राइख के उमन के ठीक करलक।

41आउर भूतमन हों चिल्लाते आउर इ कहते उमन में से निकइल गेलैं, “तोंय परमेश्‍वर केर बेटा हेकिस।” मगर यीशु उमन के डाँटत रहे, आउर कोनों कहेक नी देवत रहे, काले कि उमन जानत रहैं कि इ मसीह हेके।

42जब बिहान होई गेलक तो यीशु निकइल के एगो सुनसान ठाँव में गेलक आउर भीड़ केर भीड़ आदमीमन यीशु के खोजते-खोजते उकर ठिना आलैं। आउर उमन यीशु से बिनती काइर के कहेक लगलैं कि हमरे के छोइड़ के ना जा।

43मगर यीशु उमन से कहलक, “मोके आउर नगरमन में हों परमेश्‍वर केर राइज केर शुभ समाचार सुनाएक जरुरी अहे, काले कि मोंय इकरे लगिन भेजल जाय हों।”

44आउर यीशु गलील परदेस केर यहूदी मनक प्रार्थना घरमन में परचार करते रहलक।

← Chapter 3 Jump to: Chapter 5 →