1 Samuel 26

Sena Malawi

← Chapter 25 Jump to: Chapter 27 →

1Amuna anango a ku Zifi adadza kuna Sauli ku Gibea mbampanga kuti Davite akhabisala paphiri ya Hakila pankhomo ya thando yatchetcha ya Yudea.

2Kabodzi kene Sauli adenda na pikwi pitatu pya anyankhondo akusankhulika mu Israele kuthando yatchetcha ya Zifi kasaka Davite.

3Iye adamanga msasa m'khundu mwa njira paphiri ya Hakila. Davite akhathimiza kukhala m'thando yatchetcha mule, tenepo pidapidziwa iye kuti Sauli adadza dzamsaka,

4iye adatuma anyakuzonda mbakagumana kuti Sauli akhalidi kweneko.

5Kabodzi kene Davite adenda kumsasa kwa Sauli mbaona mbuto ikhagona Sauli na Abineri mwana Neri, mkadamu wa anyankhondo a Sauli. Sauli adagona m'bwalo pakatiletu pamsasawo mwakuzungulirwa na amunache.

6Tenepo Davite adavunza Ahimeleki Mhiti ule na Abishai mbaleache Yoabu (mawo akhali Zeruia) mbati, “Mbani uwirianu anafuna kwenda nane kumsasa wa Sauli?” Abishai adatawira mbati, “Ine ndinaenda namwe.”

7Tenepo mosiku enewo Davite na Abishai adapita mumsasa wa Sauli mbagumana Sauli adagona pakatiletu pamsasa uku dipache aitchimika kumisolo kwache. Abineri na anyankhondo akhagona mwakumzungulira.

8Abishai adalonga kuna Davite mbati, “Mulungu aikha nyamalwanu m'manja mwanu mosiku uno. Lekani ndimtungulire na dipa mbandimkhomera pansi kabodzi kene basi. Ine nkhabe kupichita kawiri tayu!”

9Mbwenye Davite adalonga mbati, “Iwe hudatheme kumchita chakuipa tayu! MBUYA anati atchunyuse munthu onsene wakuchita chakuipa kuna mfumu wache wakusankhulika.”

10Davite adathimiza kulonga mbati, “Na dzina ya MBUYA wamoyo, ndikupidziwa kuti MBUYA mwenechiroache ndiye anafuna dzapha Sauli penu ndzidzi wache ungakwana wakuti afe ninga mumbaferambo anthu onsene penu afe pankhondo.

11MBUYA andikhondesa kuti ndiyese kuchita chakuipa kuna munthu adaikha iye kukhala mfumu ule! Ndileke ndikwate kwene nyakadudu wache wa madzi na dipache mbatienda pyathu.”

12Tenepo Davite adakwata nyakadudu wa madzi na dipa pikhali kumisolo kwa Sauli pile, natenepo iye na Abishai adenda pyawo. Nee munthu na mbodzi ene adapiona penu kudziwa pidachitikapyo penu kulamuka tayu; iwo onsene akhaliza mkhonono, thangwi MBUYA akhadaagonesa onsene chitulo chakufa nacho.

13Tenepo Davite adawambuka mtunda unango wa phedi mbaimira pansonga paphiri, pambuto yakupata kutali,

14mbachemera mwakugaluza fala kuna anyankhondo a Sauli na Abineri mbati, “Abineri! Ayi ukundiva?” Abineri adavunza mbati, “Mbani anakhuwa tenepo kulamusa mfumu?”

15Davite adatawira mbati, “Ayi Abineri, si iwe munthu wamkulu mu Israele tayu? Apo watani unakhonda kutchinjiriza mbuyako, mfumu? Chinchino pano munthu unango adapita mumsasamo kufuna kupha mbuyako.

16Abineri, iwe wachimwana basako! Ndinadumbira na dzina ya MBUYA wamoyo kuti monsenemwe mwathema kuphiwa, thangwi imwe nee mwatchinjiriza tayu, mbuyanu adasankhulwa na MBUYA kukhala mfumu ule. Yang'anani! Dipa ya mfumu ili kupi? Nyakadudu wa madzi akhali kumisolo kwache ule ali kupi!”

17Sauli adadzindikira fala ya Davite mbavunza mbati, “Kani ndiwe mwananga Davite?” Davite adatawira mbati, “Ande, mfumu.”

18Pontho adathimiza kulonga mbati, “Thangwi yache ninji mbuyanga mukuthimiza kundisaka-saka ine nyabasanu? Chachita ine ninji? Chadawa ine ninji?

19Mfumu, veserani pinafuna ine kulonga. Ngakhala ndi MBUYA akuchitisani kuti mundisandukire kupereka nsembe kuna iye kungamchitise kusanduza manyerezero ache; mbwenye ngakhala akuchitisani ndi anthu, MBUYA mbaatemberere. Thangwi iwo andibulusisa m'dziko ya MBUYA kwenda kudziko kule kwakuti ndinakwanisa kutumikira milungu inango!

20Lekani kundichitisa kuti ndifere m'dziko yachilendo kutali na MBUYA. Thangwi yache ninji kuti mfumu wa ku Israele adze kuna ine nkhulukupambo ninga ine pano kufuna kundipha? Thangwi yache njanji akundikhulisa kufuna kundipha ninga mbalame?”

21Sauli adatawira mbati, “Bwerera mwananga Davite ine ndachita chakudawa. Ine nkhabeve kukuchita chakuipa thangwi iwe wakhonda kupha moyo wanga mosiku pano. Ine ndakhala ninga pupwe pontho ndachita chinthu chakuipa.”

22Davite adatawira mbati, “Mfumu dipanu ishi. Mbodzi wa amunanu mbadze kuno dzapikwata.

23MBUYA mbapase mfupo kuna anyakukhulupirika pontho kuna anyakulungama. Lero iye adakuikhani m'manja mwanga, kwache ine sidakuchiteni chakuipa tayu, imwe adasankhulwa na MBUYA kukhala mfumu ule.

24Ninga montho mwachitira ine lero kukhonda kukuphani, MBUYA mbachitembo chibodzi-bodzi kuna ine mbandipulumusa panyatwa zonsene.”

25Tenepo Sauli adalonga kuna Davite mbati, “Mulungu mbakutsanzayise mwananga; iwe unachita pinthu pikulu pontho mbukhala wakupikwanisa papyonsene pinachita iwe.” Natenepo Davite adenda pyache, Sauli adabwerera kwawo.

← Chapter 25 Jump to: Chapter 27 →