Matthew 26 — Sena Malawi

7Pikhadya Yesu, mkazi unango adadza kuna iye na mtete wakusasanywa na alabasta wakudzala na mafuta akununkhira akudula, adakhuthulira iye mumsolo mwa Yesu ale.

8Pidaona anyakufunza penepi, adazhangali napyo mbavunza mbati, “Anavungiranji mafuta onsenewa?

9Mafutawa mbadaguliswa, mbatidaphata nawo kobiri zizinji, tenepo kobirizo mbizidaperekwa kuna anthu akutcherenga.”

10Penepo Yesu adadziwa pikhalonga iwo pile, natenepo adalonga kuna iwo mbati, “Munamsanyisiranji mkaziyu? Pinthu pyandiphatira iyepi mphyadidi.

11Anyakutcherenga munakhala nawo ndzidzi onsene, mbwenye ine nee munakhala nane ndzidzi onsene tayu.

12Iye akhuthula mafuta pamanungo panga kuasasanyiratu pandzidzi wakuikhwa kwanga m'masiye.

13Chinchino ndikukupangani pyakuonadi kuti konsene kunalalikwa Mphangwa Zadidi padziko yonsene yapansi pano, pyachita mkaziyu pinalongwambo towera anthu amkumbuke.”

14Tenepo mbodzi wa anyakufunza khumi na awiri ale, dzinache Yudasi Iskarioti, adenda kuna anyansembe akulu

15mbakavunza mbati, “Ndingampereka Yesu kuna imwe, munandipagalinji?” Iwo adalengesa kobiri zasiliva makumatatu mbampasa Yudasi.

16Kubulukira ndzidzi wenewo Yudasi adatoma kusaka-saka ndzidzi wadidi wakupereka nawo Yesu kuna iwo.

17Pansiku yakutoma ya Phwando ya Mikate yakusowa chakufufumisira, anyakufunzache adadza kuna Yesu mbamvunza mbati, “Nkhupi kunafuna imwe kuti tikakusasanyireni Phwando ya Paska?”

18Iye adalonga mbati, “Ndokoni mumzindamu kumusa kwa munthu unango mukampange kuti Mfunzisi alonga mbati, ‘Ndzidzi wanga wafika; ine na anyakufunzanga tinasekera pabodzi Phwando ya Paska m'nyumba mwako.’ ”

19Tenepo anyakufunzache adenda kachita ninga montho mudaapangira Yesu mbasasanyadi Phwando ya Paska.

20Pidadoka kunja Yesu na anyakufunzache khumi na awiri adakhala pathebulu kudya.

21Pikhadya iwo, Yesu adalonga mbati, “Ndikukupangani kuti mbodzi wa imwe anati andipereke kuna anyamalwanga.”

22Anyakufunza ale adatsukwala napyo pyakwanga. Tenepo mbodzi na mbodzi adatoma kumvunza mbati, “Ayi, analonga imwe ndine pano, Mbuya?”

23Yesu adatawira mbati, “Weneyo anafonda na ine pabodzi m'palatomu, ndiye ene nyakundipereka.

24Mwana Munthu anati afe ninga munalongera Malemba. Mbwenye dzedze kuna nyakupereka Mwana Munthuyo! Mbapidakhala pyadidi kuti nyakumperekayo mbadakhonda balwa!”

25Tenepo Yudasi, nyakupereka Yesu ule adalonga mbati, “Ayi, Mfunzisi, analonga imwe ndine pano?” Yesu adamtawira mbati, “Ande, ndiwe ene.”

26Pikhadya iwo, Yesu adakwata mkate mbapereka takhuta kuna Mulungu mbaumenya. Tenepo adaupereka kuna anyakufunzache mbalonga mbati, “Kwatani mudye mkatewu; enewa ndi manungo anga.”

27Kubuluka penepo adakwata khomitcho mbapereka pontho takhuta kuna Mulungu. Iye adaipereka kuna iwo mbalonga mbati, “Monsenene, imwani!

28Chenechi ntchiropa changa chakuchuchusirwa kuna anthu azinji kulekerera pyakudawa pyawo; chiropa chakudziwisa chiverano cha Mulungu.

29Ndikukupangani kuti ine sinamwave vinyuyu tayu kufikirana nsiku inamwa ine vinyu wachinchino na imwe pabodzi mu Ufumu wa Babanga.”

30Natenepo iwo adaimba nyimbo mbaenda ku Phiri ya Olivi.

31Tenepo Yesu adalonga kuna iwo mbati, “Mosiku ontho uno, monsenene munati mundithawe mbamundisiya ndekha, thangwi Malemba alonga kuti, ‘Mulungu anapha makabuswa, tenepo mkumbi wa mabira unabalalikana.’

32Mbwenye ndingalamuka kuimfa ndinati nditsogole ku Galilea.”

33Peturo adatawira mbati, “Ine sinakuthawani tayu, podi onsene akuthaweni pyawo.”

34Yesu adalonga kuna Peturo mbati, “Ndikukupanga pyakuonadi kuti mosiku ontho uno, dzongwe mbadzati lira, unalonga katatu kuti hunandidziwa tayu.”

35Peturo adatawira mbati, “Sinalonga tenepo tayu, penu na kundipha kwene pabodzi na imwe!” Anyakufunza anango onsene adalongambo chibodzi-bodzi.

36Kubuluka penepo Yesu pabodzi na anyakufunzache adenda kumbuto yakuchemerwa Getsemani, tenepo iye adalonga kuna iwo mbati, “Khalani pano pinaenda ine uko kapemphera.”

37Iye adakwata Peturo, pontho na ana awiri a Zebedeo, mbaenda nawo pabodzi. Tenepo na kuva nsisi mumtima mwache,

38adalonga kuna iwo mbati, “Mtimanga una nsisi zakufa nazo. Khalani pano, pontho mukhale m'maso pabodzi na ine.”

39Iye adafendedza patsogolo pang'ono mbapiponya pansi na fufumimba mbapemphera mbati, “Babanga, pingakhala pinakwanisika, ndibulusirenimbo ine khomitcho ya nyatwayi. Kuleke khala kufuna kwanga, mbwenye kufuna kwanu.”

40Tenepo iye adabwerera kuna anyakufunzache atatu ale mbaagumana agona; natenepo iye adalonga kuna Peturo mbati, “Kadi imwe mungakwanise kukhala nane m'maso ora ibodzi tayu?

41Khalani m'maso, pontho mupemphere kuti muleke kuyeswa na pyakuipa. Mtima ukufuna, mbwenye manungo alenduka.”

42Yesu adenda pontho kapemphera mbati, “Babanga, ngakhala khomitcho ya nyatwayi hinakwanisika kubuluka kuna ine tayu, mbwenye kuti ndathema kuimwa, chitani kufuna kwanu.”

43Iye adabwerera pontho kuna anyakufunzache ale mbaagumana agona, thangwi akhali na chitulo pyakwanga.

44Yesu adaasiya mbaenda pontho kapemphera kachitatu na mafala onthowo.

45Tenepo iye adabwerera kuna anyakufunzache mbalonga mbati, “Mukugona na kupuma pyanu basi! Yang'anani! Ndzidzi wakwana wakuti Mwana Munthu aperekwe m'manja mwa anthu akudawa.

46Lamukani, tiende. Yang'anani nyakundipereka uyo anadzayo!”

47Yesu akhali m'kati kulonga, pidafika Yudasi, mbodzi wa anyakufunza khumi na awiri ale, pabodzi na chimwinji chakuphatira matalasada na pigomba. Iwo akhadatumwa na anyansembe akulu pontho na akulu-akulu.

48Nyakupereka Yesuyo akhadapangiza mwinji ule chidzindikiro chakuti, “Munthu anamwenyika ine mwakumpsompsonayo ndiye ene anafuna imwe; mmangeni.”

49Penepo Yudasi adenderatu kuna Yesu mbakalonga mbati, “Mfunzisi, mtendere mbukhale kuna imwe.” Tenepo adampsompsona.

50Yesu adatawira mbati, “Shamwali, chita pyadzera iwe.” Tenepo iwo adadza mbamphata Yesu mbammanga.

51Mbodzi wa ale akhali na Yesu ale adasolola talasadache mbakhamwadza bitchu wa Nyansembe Wamkulu mbagwandiratu khutu yache.

52Yesu adalonga kuna iye mbati, “Bwezera talasadayo m'mbuto mwache, thangwi onsene anamenyana pakuphatisa basa talasada, anafambo na talasada.

53Kani imwe nkhabe mukupidziwa tayu kuti ine mbandidakwanisa kuchemera Babanga kuti adze dzandiphedza, iyembo mbadatumiza kabodzi kene gulu ya anyankhondo ya angelo pikwi kupiringana khumi na awiri?

54Apo mbandidachita tenepo, mbapidakwana-kwana tani pile pidalonga Malemba kuti pyathema kuchitika?”

55Tenepo Yesu adalonga kuna mwinjiwo mbati, “Mwatani munachita kudza na matalasada pontho na pigomba dzandiphata khala ninga ndine phanga? Nsiku zonsene ndikhafunzisa m'Nyumba ya Mulungu, mbwenye imwe hamudandimanga tayu.

56Mbwenye pyonsenepi pyachitika towera pile pidalonga Malemba na maprofeti pikwane-kwane.” Tenepo anyakufunza onsene adamsiya mbathawa pyawo.

57Amuna akhadamanga Yesu ale adenda naye kunyumba ya Kayafa, Nyansembe Wamkulu, kule kukhadagumanyikana afunzisi a mwambo pabodzi pene na akulu-akulu.

58Peturo adamtewera na pakansinzo, kufikirana muchintalo mwa nyumba ya Nyansembe Wamkulu. Iye adapita muchintalo mbakhala pansi pabodzi na anyakulondali, towera aone kuti pyonsene pinamala tani.

59Anyansembe akulu na onsene a m'Thando ya miseru ya Chiyuda akhayesa kugumana umboni wakunama kupambizira nawo Yesu, towera amphe;

60podi kwene kuti anthu azinji ene adadza patsogolo mbamulongera pyakunama, mbwenye hadaugumane tayu. Pakumalisira amuna awiri adadza patsogolo

61mbalonga mbati, “Munthuyu adalonga mbati, ‘Ine ndinakwanisa kugwisa Nyumba ya Mulungu mbandiimanga pontho nsiku zitatu basi.’ ”

62Nyansembe Wamkulu adaimira mbalonga mbati, “Hunatawira tayu pinthu pinakulongera anthuwa?”

63Mbwenye Yesu adakhala pyache mulomo phoo. Nyansembe Wamkulu ule adalonga pontho kachiwiri mbati, “Ndikukutonga kuti udumbire pamaso pa Mulungu wamoyo: tipange ngakhala ndiwedi Khristu, Mwana Mulungu.”

64Penepo Yesu adamtawira mbati, “Ndimwe mwalonga tenepo. Mbwenye ndikukupangani monsenene kuti kubulukira pa ndzidzi uno munamuona Mwana Munthu akhala kumadyo kwa Mulungu wamphamvu zonsene pontho akudza pamakole a kudzulu!”

65Na kuva mafala enewa, Nyansembe Wamkulu ule adang'amba nguwo zache mbalonga mbati, “Ashola Mulungu! Ife nkhabe funa pontho mboni zinango tayu! Penepa mwava kushola kwachita iyeku!

66Mphapo, mukunyerezera tani?” Iwo adatawira mbati, “Iye adawa, pontho athema kuphiwa.”

67Tenepo iwo adamphulira mata kunkhope mbammenya; tenepo adamgasa mbama ale,

68adalonga mbati, “Lotera, Khristu! Mbani akumenya?”

69Peturo akhakhala pansi kunja muchintalo cha nyumbayo pidadza nyabasa wachitsikana wa Nyansembe Wamkulu mbalonga mbati, “Iwembo ukhali pabodzi na Yesu wa ku Galilea.”

70Mbwenye iye adatuna pamaso pa onsene mbati, “Pinalonga iwepyo, ine sinapidziwa tayu.”

71Tenepo adabulukiratu na pamsuwo wa chintalocho. Nyabasa unango wachitsikana adamuona mbalonga kuna amuna akhali penepowo mbati, “Uyu akhali pabodzi na Yesu wa ku Nazareti.”

72Penepo Peturo adakhonda pontho mbati, “Ndikudumbira kuti munthu weneyu sinamdziwa tayu!”

73Pidapita ndzidzi pang'ono, amuna adaimira penepo ale adadza kuna Peturo mbalonga mbati, “Ndimomwene, iwe ndiwe mbodzi wa iwo, thangwi malongero akowa akuonesadi kuti ndiwe mbodzi wa iwo.”

74Tenepo Peturo adalonga mbati, “Ndikudumbira kuti pinalonga inepi mphakuonadi! Ngakhala ndikulonga pyakunama, Mulungu mbanditchunyuse pyache! Munthuyu sinamdziwa tayu!” Penepo pene dzongwe adalira,

75tenepo Peturo adakumbuka pikhadampanga Yesu pile kuti: “Dzongwe mbadzati lira, iwe unati unalonge katatu kuti hunandidziwa tayu.” Iye adabuluka panja mbakalira na kutsukwala kukulu.