Matthew 27 — Sena Malawi

1Bzobzo na machibese anyansembe akulu onsene pabodzi pene na akulu-akulu adaverana pya kupha Yesu.

2Iwo adammanga na njema mbaenda naye kamtula kuna Pilato, mkulu wa boma ya Roma.

3Pidapiva Yudasi, nyakupereka Yesu ule, kuti Yesu atongwa kuphiwa, iye adatchunyuka mbakabwezera kobiri zasiliva makumatatu zidatambira iye kubulukira kuna anyansembe akulu na akulu-akulu.

4Iye adalonga mbati, “Ine ndadawa pakupereka munthu okhonda dawa kuti aphiwe!” Iwo adatawira mbati, “Ife tili napyo basa yanji? Mphyako penepyo!”

5Yudasi adaponya kobirizo pansi m'Nyumba ya Mulungu ile, mbabulukamo. Tenepo adenderatu pyache kapimangirika.

6Anyansembe akulu ale adalokota kobiri zile mbalonga mbati, “Izi ndi kobiri za chiropa, tenepo kuikha kobirizi kuthumba ya Nyumba ya Mulungu nkhudawira mwambo.”

7Pidamala iwo kuverana pyakuti achite na kobirizo, adaziphatisa basa kugulira munda wa nyakuumba pyombo, towera mundawo ukhale masiye a alendo.

8Ndi thangwi yache na lero mundawo umbachemerwa “Munda wa chiropa.”

9Tenepo pikhadalonga mprofeti Yeremia pile pidakwana-kwana: “Iwo adakwata kobiri zasiliva makumatatu zile, konta ikhadaverana anthu a ku Israele kumgula nazo,

10tenepo kobirizo adaziphatisa basa kugulira munda wa nyakuumba pyombo ninga mudanditongera Mbuya.”

11Yesu adaimira pamaso pa mkulu wa boma ya Roma, tenepo mkadamuyo adamvunza mbati, “Ayi iwe ndiwedi Mfumu wa Ayuda?” Iye adatawira mbati, “Mwalonga tenepo ndimwe.”

12Mbwenye iye hadalonge pinthu tayu pa pikhamulongera anyansembe akulu na akulu-akulu pile.

13Tenepo Pilato adalonga kuna iye mbati, “Kadi iwe ukuva tayu pinthu pyonsene pinakulongera anthuwa?”

14Mbwenye Yesu hadabuluse fala na ibodzi ene tayu kutawira, tenepo penepi pidachitisa kuti mkulu wa boma ule adodome pikulu.

15Pandzidzi onsene wa Phwando ya Paska, mkulu wa boma ya Roma akhali na nsambo wa kusudzula nyaperezo mbodzi anapempha anthu kuti asudzulwe.

16Pandzidzi wenewo pakhali nyaperezo wakuveka, dzinache Baraba.

17Natenepo pidagumanyikana mwinji, Pilato adaavunza mbati, “Mbani anafuna imwe kuti ndikusudzulireni? Baraba penu Yesu wakuchemerwa Khristu?”

18Pilato makayo adapidziwa kuti akadamu a Chiyuda akhadampereka Yesu m'manja mwache thangwi ya bivu.

19Pikhali Pilato m'nyumba yakutongeramo miseru, mkazache adatumiza mphangwa kuti: “Leka chita naye pinthu munthu okhonda dawayo, thangwi ine mosiku ndanenseka pyakwanga na ndoto za munthu weneyo.”

20Mbwenye anyansembe akulu na akulu-akulu adaswiswirisa mwinji ule kupempha Pilato kuti asudzule Baraba, pontho kuti Yesu aphiwe.

21Mbwenye Pilato adavunza mwinji ule mbati, “Pa awiriwa, mbani anafuna imwe kuti ndikusudzulireni?” Iwo adatawira mbati, “Baraba!”

22Pilato adaavunza mbati, “Mphapo ndichitenji naye munthu analongwa kuti ndi Khristuyu?” Onsene adatawira mbati, “Mkhomereni pamtanda!”

23Mbwenye Pilato adavunza mbati, “Munthu weneyu asosa mseru wanji?” Tenepo iwo adatomaletu kukhuwa mwakugaluza fala mbati, “Mkhomereni pamtanda!”

24Pidaona Pilato kuti anthu mbadakwanisikave tayu, pontho kuti iwo akhali chifupi kutoma chimpiningu, iye adakwata madzi mbasamba manjache pamaso pa mwinji mbalonga mbati, “Ine nkhabe mseru na imfa ya munthu weneyu! Mphyanu penepyo!”

25Tenepo mwinji onsene udatawira kuti, “Lekani mseru wa imfache ukhale pana ife na pana anathu ene!”

26Penepo Pilato adaasudzulira Baraba. Pidamala Yesu kwapulwa, adampereka kuna anyankhondo kuti akamkhomere pamtanda.

27Tenepo anyankhondo a Pilato adenda na Yesu kunyumba ya mkulu wa boma ya Roma, pontho anyankhondo onsene adagumanyikana mwakumzungulira.

28Iwo adamdulisa nguwo zache mbamvazika mkhanjo wakufira.

29Tenepo iwo adasasanya chipewu chachifumu cha minga mbachivazika msolo wache mbaikha ndodo kudzanjache yamadyo. Tenepo iwo adagodama pamaso pache mbamselusa mbati, “Dondowe, Mfumu wa Ayuda!”

30Iwo adamphulira mata, pontho adampokosera ndodo ile mbammenya nayo mumsolo mwache.

31Pidamala iwo kumselusa, adamdulisa mkhanjo ule mbamvazika nguwo zache. Tenepo adenda naye kamkhomera pamtanda.

32Pikhabuluka iwo mumzinda mule, adagumanikana na munthu wa kumzinda wa Kirene, dzinache Simoni, tenepo anyankhondo adamkhakhamiza kuthukula mtanda wa Yesu.

33Iwo adafika pambuto ya Gologota, kweneku nkhulonga kuti, “Mbuto ya Chibade chamsolo.”

34Penepo iwo adapasa Yesu vinyu wakuvungazwa na nyongo; mbwenye pidamulawa iye, adakhonda kummwa.

35Iwo adamkhomera pamtanda mbagawana nguwo zache pakuchita ntsango.

36Pidamala iwo penepi, adakhala penepo mbalondali Yesu.

37Padzulu pamsolo pache adaikhapo chidziwiso cha mseru udapherwa iye chakulembwa kuti, “Uyu ndi Yesu, Mfumu wa Ayuda.”

38Iwo adakhomera pontho mbava ziwiri pamitanda pabodzi na Yesu, mbodzi kumadyo, unangoyo kumabzere kwache.

39Anthu akugwanda na penepo adakupusa misolo yawo mbamtikanambo mbati,

40“Si iwe ukhalonga kuti unagwisa Nyumba ya Mulungu mbuimanga nsiku zitatu tayu? Apo lero, pipulumuse wekha, ngakhala ndiwedi Mwana Mulungu! Tchithatu pamtandapo!”

41Chibodzi-bodzi anyansembe akulu, akulu-akulu, pabodzi pene na afunzisi a mwambo adamselusambo mbalonga mbati,

42“Iye adapulumusa anthu anango, mbwenye akuchimwana kupipulumusa yekha ene! Ayi iye si Mfumu wa Israele tayu? Iye angatchitha chinchino pamtandapa, ife tinati timkhulupire!

43Iye ambanyindira Mulungu, pontho ambalonga kuti ndi Mwana Mulungu. Mphapo, dikhirani tione ngakhala Mulungu anafuna pyakumpulumusa chinchino.”

44Chibodzi-bodzi mbava zikhadakhomerwa pamtanda pabodzi naye zile, zidamtikanambo.

45Paora yakhumi na chiwiri na masikati padziko yonsene yapansi padachita mdima. Mdimawo udamala paora yachitatu na mawulo.

46Paora yachitatu na mawulo, Yesu adalira pikulu mbati, “Eloi, Eloi, lema sabakitani?” Kweneku nkhulonga kuti, “Mulungu wanga, Mulungu wanga, mwandisiyiranji ndekha ine?”

47Anthu anango adaimira penepowo adamva iye akulira, tenepo iwo adalonga mbati, “Iye akuchemera Elia!”

48Mbodzi penepo adathamanga kabodzi na kabodzi kafeka khwasa-khwasa kumuti mbachivika muvinyu wakujuja. Tenepo adadza nacho kuna Yesu mbampasa kuti amwe.

49Mbwenye anangombo adalonga mbati, “Dikhirani, tione ngakhala Elia anadza dzampulumusa!”

50Yesu adakhuwa pontho pikulu mbamalisika.

51Tenepo chinguwo chakutchinga nacho mbuto yakuchenesesa m'Nyumba ya Mulungu chidang'ambika kati na kati kubulukira padzulu kufikirana pansi. Dziko idatekenyeka, miyala idang'ambika pakati,

52masiye adafunguka, pontho anthu a Mulungu azinji akhadafa ale, adalamuka mbakhala na moyo.

53Iwo adabuluka m'masiye, tenepo pidalamuka Yesu kuimfa, iwo adenda ku Mzinda Wakuchena, mbaoniwa na anthu azinji.

54Mkadamu wa anyankhondo dzana pabodzi pene na anyankhondo akhalondali Yesu ale, adagoswerwa pyakwanga pidaona iwo chiteke-teke na pyonsene pidachitika pile. Tenepo iwo adalonga mbati, “Uyu akhalidi Mwana Mulungu!”

55Akazi azinji akhadatewera na kuphedza Yesu kubulukira ku Galilea ale, akhali penepo, kupiona na pakansinzo.

56Pakati pawo pakhali Maria wa ku Magadala, Maria mawo Yakobo na Yosefe, pontho na mkazi Zebedeo.

57Na mawulo, mamuna unango wakufuma wa kuluwani ya Arimatea, ule akhadasanduka nyakufunza wa Yesu, dzinache Yosefe, adafika.

58Iye adenda kuna Pilato kapempha mtembo wa Yesu. Pilato adatonga kuti mtembo wa Yesu uperekwe kuna Yosefe.

59Tenepo Yosefe adakwata mtembowo, mbaukukutiza na nguwo yachinchino yadidi yakuchena,

60mbakauikha m'masiye ache amwala akhadamaliswa kwene kusemwa ale. Iye adagulung'undisa mwala ukulu mbafunga nawo msuwo wa masiyewo. Tenepo adenda pyache.

61Maria wa ku Magadala pabodzi na Maria unango ule adakhala penepo kuyang'ana nthumbi ile.

62Mangwana mwache ikhali Nsiku Yakupuma, tenepo anyansembe akulu na Afarisi adagumanyikana pabodzi na Pilato.

63Iwo adalonga mbati, “Mbuya, ife tikukumbuka kuti pikhali munthu wakunama ule m'maso, akhalonga mbati, ‘Ine ndinalamuswa pangagwanda nsiku zitatu mbandikhala pontho na moyo.’

64Natenepo tongani kuti nthumbiyo ikalondalwi mwadidi mpakana nsiku zitatu, gopesera anyakufunzache anadza dzaba mtembowo mbakapanga anthu kuti iye alamuswa kuimfa. Kunama kwakumalisiraku kunakhala kwakuipa pyakwanga kupiringana kwakutoma kule.”

65Pilato adaatawira mbati, “Kwatani anyankhondo. Ndokoni mukasasanye nthumbiyo kuti ilondalwi ninga munafunira imwe.”

66Tenepo iwo adenda mbakamyatirira mwadidi mwalawo, pontho adaikha anyankhondo kuti alondali nthumbiyo.