Ecclesiastes 11

Shan NCL

← Chapter 10 Jump to: Chapter 12 →

1ဢဝ်တၢင်းၵိၼ်တၢင်းၶူပ်းမႂ်းထိမ်ႈတူၵ်းသႂ်ႇၵႃႈၼိူဝ်ၼႃႈၼမ်ႉတႃႉ။ ၶိင်ႇၵႃႇလႃႉႁိုင်ၼႃႇယဝ်ႉၸင်ႇမႂ်းတၵ်းလႆႈၶိုၼ်းထူပ်းၶိုၼ်းႁၼ်ဢေႃႈ။-

2ဢဝ်ၽႄမႅင်ႇပၼ်တီႈၵူၼ်းၸဵတ်းၵေႃႉဢမ်ႇၵႃး၊တီႈၵူၼ်းပႅတ်ႇၵေႃႉၼၼ်ႉၵေႃႈၽႄမႅင်ႇပၼ်တႃႉ။ ၵွပ်ႈပိူဝ်ႈဢၼ်မႂ်းဢမ်ႇႁုလွင်ႈဢၼ်ၽေးႁၢႆႉဢၼ်လႂ်တၵ်းႁွတ်ႈထိုင်ၵႃႈၼိူဝ်လိၼ်မိူင်းၼၼ်ႉ။

3တူၼ်ႈမႆႉၸိုင်၊မၼ်းလူမ်ႉၵႂႃႇၽၢႆႇလႂ်တၢင်းလႂ်သေဢမ်ႇဝႃႈ၊ၽၢႆႇဢၼ်မၼ်းလူမ်ႉၼၼ်ႉမၼ်းၵေႃႈမီးယူႇၸိူဝ်ႉၼင်ႇၼၼ်ဢေႃႈ။ မိူဝ်ႈဢၼ်မွၵ်ႇၵုမ်ႈၵၢမ်ႈမိုတ်ႈမႃးၼၼ်ႉၸၢင်ႈႁႂ်ႈၽူၼ်တူၵ်းဢေႃႈ။-

4ပေႃးမႂ်းပႂ်ႉထႃႈၽူၼ်လူမ်းယူႇၸိုင်၊မႂ်းတေဢမ်ႇလႆႈၽုၵ်ႇလႆႈသွမ်ႈသေၸိူဝ်ႉသေပိူင်လႄႈဢမ်ႇလႆႈပၢတ်ႇဢဝ်သိမ်းဢဝ်သေၸိူဝ်ႉသေမဵဝ်း။-

5ၸိူဝ်ႉၼင်ႇဢၼ်မႂ်းဢမ်ႇႁုသၢႆလူမ်းလႆႈ၊ဢမ်ႇၸၢင်ႈႁုတူဝ်ၶၼ်ႇထႃႇႁဵတ်းၸိူဝ်ႉၼင်ႇႁိုဝ်ပဵၼ်မႃးၵႃႈၼႂ်းတွင်ႉမႄႈမႂ်းလႆႈၼၼ်ႉ၊မႂ်းဢမ်ႇၸၢင်ႈႁုၽြႃးပဵၼ်ၸဝ်ႈႁဵတ်းၸိူဝ်ႉႁိုဝ်ၽၢၼ်ႇသၢင်းႁဵတ်းပဵၼ်ၵူႈၸိူဝ်ႉၵူႈပိူင်ၼၼ်ႉလႆႈ။-

6ဝၢၼ်ႇၸိူဝ်ႉဝၢၼ်ႇၽၼ်းၶိင်ႇၵၢင်ၼႂ်တႃႉ။ ၶိင်ႇႁူဝ်ၶမ်ႈၵေႃႈဝၢၼ်ႇပိုၼ်တႃႉ။ လွင်ႈမၼ်းၸမ်ႉ၊မႂ်းဢမ်ႇႁုလွင်ႈဢၼ်ၵႃႈဢၼ်မႂ်းဝၢၼ်ႇၼၼ်ႉတၵ်းငွၵ်ႈလီႁိုဝ်၊ဢမ်ႇၼၼ်ၵေႃႈဢၼ်လႂ်တၵ်းငွၵ်ႈလီသေဢၼ်လႂ်ၼၼ်ႉလႆႈ။

7တၢင်းဢၼ်လႆႈမူၼ်ႈပျေႃႇလႄႈၸူမ်းသိူဝ်းလူၺ်ႈသၢႆလႅတ်ႇၵၢင်ဝၼ်းၼၼ်ႉပဵၼ်ဢၼ်လီဢေႃႈ။-

8ၸူမ်းသိူဝ်းလႄႈတၢင်ႇၵျေးၸူးတီႈတၢင်းဢၼ်မႂ်းဢသၢၵ်ႈလိပ်းယူႇၵူႈပီၵူႈပီၼၼ်ႉတႃႉ။ ၵူၺ်းၵႃႈ၊ဢႃႇယုဢသၢၵ်ႈမႂ်းယိုၼ်းယၢဝ်းၵႃႈႁိုဝ်သေၵေႃႈမီးတၢင်းဢၼ်ၶုၵ်းၸႂ်လႆႈၶႆႈၸႂ်ထူပ်းလွင်ႈဢၼ်ဢမ်ႇပေႃးႁိုင်ပေႃးၼၢၼ်းမႂ်းတၵ်းလႆႈတၢႆၵႂႃႇယူႇၼၼ်ႉတႃႉ။ ၵႃႈဢၼ်တၵ်းပဵၼ်မႃးၼၼ်ႉပဵၼ်ဢၼတ်ႉတႃႉလွၼ်ႉလွၼ်ႉဢေႃႈ။

9ၵူၼ်းၼုမ်ႇၶဝ်႟။ မူၼ်ႈပျေႃႇလူၺ်ႈတၢင်းဢၼ်ဢသၢၵ်ႈယင်းၼုမ်ႇယင်းၵမ်ၼၼ်ႉတႃႉ။ ၵႃႈၼင်ႇဢၼ်ဢလူဝ်ႇၵၢင်ၸႂ်ၶႂ်ႈႁဵတ်းၼၼ်ႉ ႁဵတ်းၸွမ်းတႃႉ။ ၵူၺ်းၵႃႈ၊ၶုၵ်းၸႂ်လႆႈၶႆႈၸႂ်ထူပ်းလွင်ႈဢၼ်ၽြႃးပဵၼ်ၸဝ်ႈတၵ်းၸီႇယၢင်ႇၸွမ်းၵႃႈၼင်ႇဢၼ်မႂ်းႁဵတ်းၼၼ်ႉဢေႃႈ။

10ယႃႇပေႁႂ်ႈႁူဝ်ၸႂ်မႂ်းလႆႈမႆႈၸႂ်လူၺ်ႈလွင်ႈတၢင်းသေၸိူဝ်ႉသေပိူင် ဢမ်ႇၼၼ်ယႃႇပေႁႂ်ႈလႆႈမီးတၢင်းဢၼ်ၸဵပ်းၸႂ်။ လွင်ႈမၼ်းၸမ်ႉ၊ဢသၢၵ်ႈမႂ်းတၵ်းၼုမ်ႇၼႅၼ်ႈယူႇႁိုင်ၼႃႇလူင်လၢင်ဢမ်ႇၸႂ်ႈ။

← Chapter 10 Jump to: Chapter 12 →