Matthew 8

Shan NCL

← Chapter 7 Jump to: Chapter 9 →

1မိူဝ်ႈဢၼ် ၸဝ်ႈယေႇသု၊ လူင်းလွႆမႃးၼၼ်ႉၵူၼ်းပဵၼ်မူႇပဵၼ်ၽုင်ၼမ်ၼႃႇၸွမ်းလင်မၼ်းၸဝ်ႈယူႇဢေႃႈ။-

2မိူဝ်ႈၼၼ်ႉၵူၼ်းတုတ်ႈ ၵေႃႉၼိုင်ႈမႃးၸူးမၼ်းၸဝ်ႈလႄႈၶုပ်ႉမူပ်ႇၽၢႆႇၼႃႈမၼ်းၸဝ်ႈလႄႈလဝ်ႈလၢတ်ႈဝႃႈ၊ “ပေႃးၸဝ်ႈႁဝ်းမီးဢလူဝ်ႇၸိုင်၊ႁႂ်ႈၵဝ်ၶႃႈမူတ်းသႂ်မႃးလႆႈယူႇၶႃႈဢေႃႈ၊” ဝႃႈၼင်ႇၼႆဢေႃႈ။

3မၼ်းၸဝ်ႈၵေႃႈယိုၼ်းမိုဝ်းသေတိူဝ်ႉသႂ်ႇၵေႃႉၼၼ်ႉလႄႈလၢတ်ႈဝႃႈ၊ “ၵဝ်မီးဢလူဝ်ႇဢေႃႈ။ ႁႂ်ႈမူတ်းသႂ်တႃႉ၊” ဝႃႈၼႆလႄႈယေႃးၵႃႇတုတ်ႈမၼ်းမူတ်းသႂ်ၵႂႃႇၵမ်းလဵဝ်ဢေႃႈ။-

4မၼ်းၸဝ်ႈသမ်ႉလၢတ်ႈတီႈမၼ်းထႅင်ႈလႄႈဝႃႈ၊ “ထွမ်ႇလူး။ ယႃႇပေမွၵ်ႇလၢတ်ႈပိူၼ်ႈလူးၵွၼ်ႇ။ ၵႂႃႇၼႄပျႃးတူဝ်မႂ်းတီႈယဵၸ်ႈပရေႃးႁဵၵ်ႈ ၵမ်းလဵဝ်ပုၼ်ႈလွင်ႈၼင်ႇႁိုဝ်တၵ်းႁဵတ်းတၢင်းလူႇဢၼ်ၸွမ်းၼင်ႇတြႃးပိင်းၺၢပ်ႈ မူဝ်းသေႇ၊ မီးဝႆႉၼၼ်ႉတႃႉ။ ပေႃးမႂ်းႁဵတ်းၸိူဝ်ႉၼင်ႇၼၼ်ၸင်ႇတေပဵၼ်သၢၵ်ႈသေႇတၢင်းဢၼ်မႂ်းမူတ်းသႂ်ယဝ်ႉၼၼ်ႉဢေႃႈ၊” ဝႃႈၼင်ႇၼႆဢေႃႈ။

5ယၢမ်းမိူဝ်ႈဢၼ် ၸဝ်ႈယေႇသု၊ ၶဝ်ႈဝဵင်း ၵပိူဝ်ႇၼေႇဢုမ်ႇ၊ ၵႂႃႇၼၼ်ႉၶုၼ်သိုၵ်း ရူဝ်းမႃႉ၊ ၶဝ်ၵေႃႉၼိုင်ႈမႃးႁပ်ႉႁူဝ်တၢင်းမၼ်းၸဝ်ႈႁႂ်ႈလႆႈယွၼ်းတၢင်းဢၼ်ၸွႆႈထႅမ်တီႈမၼ်းၸဝ်ႈလႄႈလဝ်ႈလၢတ်ႈဝႃႈ၊-

6“ၸဝ်ႈႁဝ်း။ ၶႃႈၵူၼ်းၸႂ်ႉၵဝ်ၶႃႈၵေႃႉၼိုင်ႈပဵၼ်တၢႆၽၢၵ်ႇလႄႈၼွၼ်းယူႇလႆႈၶၢမ်ႇတုၵ်ႉၶႃႉၼႃႇၶႃႈဢေႃႈ၊” ဝႃႈၼင်ႇၼႆလႄႈ။

7မၼ်းၸဝ်ႈၵေႃႈလၢတ်ႈလႄႈဝႃႈ၊ “ၵဝ်တၵ်းၸွမ်းၵႂႃႇႁဵတ်းႁႂ်ႈယေႃးၵႃႇမၼ်းၸိုၼ်ႈႁၢႆဢေႃႈ၊” ဝႃႈၼင်ႇၼႆဢေႃႈ။

8ၶုၼ်သိုၵ်းၼၼ်ႉၶိုၼ်းလဝ်ႈလၢတ်ႈလႄႈဝႃႈ၊ “ဢူဝ်း။ ဢမ်ႇၸႂ်ႈတီႈၶႃႈ။ ၵဝ်ၶႃႈဢမ်ႇၵိုင်ႇဢမ်ႇတၢၼ်ႇတၢင်းဢၼ်ၸဝ်ႈႁဝ်းတေၶဝ်ႈမႃးၵႃႈၼႂ်းႁူမ်ႈၽူၺ်းႁိူၼ်းၵဝ်ၶႃႈဢေႃႈ။ ပေႃးၸဝ်ႈႁဝ်းပူင်ဢမိင်ႉၶေႃႈၼိုင်ႈၵူၺ်းၵေႃႈယေႃးၵႃႇၶႃႈၵူၼ်းၸႂ်ႉၵဝ်ၶႃႈတၵ်းၸိုၼ်ႈႁၢႆၵႂႃႇၵမ်းလဵဝ်ၶႃႈဢေႃႈ။-

9ၵဝ်ၶႃႈၼႆႉပဵၼ်ၵူၼ်းယူႇၵႃႈတႂ်ႈဢႃႇၼႃႇၶုၼ်လူင်ဢေႃႈ။ ၼႂ်းဝႃႈၼၼ်သေၵေႃႈလုၵ်ႈသိုၵ်းၼမ်ၼႃႇမီးၵႃႈတႂ်ႈၵဝ်ၶႃႈလႄႈပေႃးပၼ်ဢမိင်ႉတီႈၵေႃႉၼိုင်ႈလႄႈဝႃႈ၊ ‘ၵႂႃႇတႃႉ၊’ ဝႃႈၼႆၸိုင်၊ၵေႃႉၼၼ်ႉၵႂႃႇဢေႃႈ။ သမ်ႉလၢတ်ႈတီႈၵေႃႉၼိုင်ႈလႄႈဝႃႈ၊ ‘မႃးတႃႉ၊’ ဝႃႈၼႆၸိုင်၊ၵေႃႉၼၼ်ႉၵေႃႈမႃးဢေႃႈ။ တီႈၵူၼ်းၸႂ်ႉၵဝ်ၶႃႈၵေႃႈပေႃးပၼ်ဢမိင်ႉဝႃႈ၊ ‘ႁဵတ်းဢၼ်ၼႆႉတႃႉ၊’ ဝႃႈၼႆၸိုင်၊မၼ်းႁဵတ်းၶႃႈဢေႃႈ၊” ဝႃႈၼင်ႇၼႆဢေႃႈ။

10မိူဝ်ႈဢၼ် ၸဝ်ႈယေႇသု၊ ငိၼ်းၵႂၢမ်းၼၼ်ႉၸိုင်၊ဢၢမ်းတၢင်းယုမ်ႇမၢတ်ႈမၼ်းၼၼ်ႉလႄႈလၢတ်ႈတီႈၶဝ်ၸိူဝ်းဢၼ်ၵႂႃႇၸွမ်းမၼ်းၸဝ်ႈၼၼ်ႉလႄႈဝႃႈ၊ “ၵဝ်ဝႃႈတီႈသူၸမ်ႉ၊တၢင်းယုမ်ႇမၢတ်ႈထၼ်ႇၼႆႉၸိုင်၊ၵႃႈၼႂ်းၵူၼ်းမဵဝ်း ဢိသရေး၊ ၼႆႉၵဝ်ဢမ်ႇပႆႇတွၼ်ႉထူပ်းသေပွၵ်ႈ။-

11ၵဝ်သမ်ႉဝႃႈထႅင်ႈၸမ်ႉ၊ၵူၼ်းၼမ်ၼႃႇတၵ်းလုၵ်ႉသေတၢင်းဢွၵ်ႇတၢင်းတူၵ်းမႃးလႄႈဢိင်ယူႇလူၺ်ႈၵၼ်တင်း ဢႃႇပြႃႇႁၢမ်ႇ၊ဢိၸၢၵ်ႈ၊ယႃႇၵုပ်ႈ၊ ၶဝ်ၵႃႈၼႂ်းပၢင်ပွႆးမိူင်းၵၢင်ႁၢဝ်ၸဝ်ႈၼၼ်ႉဢေႃႈ။-

12ၵူၺ်းၵႃႈ၊ၵူၼ်းမိူင်းၵၢင်ႁၢဝ်ၸဝ်ႈတင်းလၢႆ၊သမ်ႉတေလႆႈၶၢမ်ႇတၢင်းဢၼ်ႁေႃႈဢွၵ်ႇၸူးတီႈဢၼ်လပ်းသိင်ႇလႄႈလႆႈႁႆႈလႆႈႁွင်ႉ၊တီႈဢၼ်ၵတ်းၶဵဝ်ႈၵတ်းၽၼ်းၼၼ်ႉဢေႃႈ၊” ဝႃႈၼင်ႇၼႆယဝ်ႉၸင်ႇ၊-

13သမ်ႉလၢတ်ႈတီႈၶုၼ်သိုၵ်းၼၼ်ႉလႄႈဝႃႈ၊ “မိူဝ်းၵႂႃႇတႃႉ။ တၢင်းယုမ်ႇမၢတ်ႈမႂ်းႁႂ်ႈဢလူဝ်ႇမႂ်းပျေႉၸုမ်ႇယဝ်ႉ၊” ဝႃႈၼင်ႇၼႆလႄႈ၊ ယေႃးၵႃႇၶႃႈၵူၼ်းၸႂ်ႉၶုၼ်သိုၵ်း ရူဝ်းမႃႉ၊ ၼၼ်ႉၵေႃႈၸိုၼ်ႈႁၢႆၵႂႃႇၼႂ်းၶိင်ႇၼၼ်ႉၵမ်းလဵဝ်ဢေႃႈ။

14လိုၼ်းၼၼ်ႉ၊ ၸဝ်ႈယေႇသု၊ ၵႂႃႇၶဝ်ႈၵႃႈၼႂ်းႁိူၼ်း ပေႇတရု၊ လႄႈလႆႈထူပ်းႁၼ်မႄႈဢွၵ်ႇၼၢႆး ပေႇတရု၊ ၼၢဝ်လႄႈၼွၼ်းယူႇဢေႃႈ။-

15မၼ်းၸဝ်ႈယိပ်းၵမ်မိုဝ်းမႄႈယိင်းၼၼ်ႉလႄႈတၢင်းၼၢဝ်မၼ်းၸိုၼ်ႈႁၢႆၵႂႃႇၵမ်းလဵဝ်သေယဝ်ႉ၊လုၵ်ႉၶၢမ်ႇၶႅၵ်ႇတီႈမၼ်းၸဝ်ႈဢေႃႈ။

16မိူဝ်ႈဢၼ်ထိုင်ၶိင်ႇႁူဝ်ၶမ်ႈၸိုင်၊ပိူၼ်ႈဢဝ်ၵူၼ်းဢၼ်ၽီၶဝ်ႈၽိူဝ်ႉၶဝ်ႈတင်းလၢႆမႃးၼမ်ၼႃႇလႄႈမၼ်းၸဝ်ႈဢဝ်တင်းၵႂၢမ်းၶေႃႈလဵဝ်ၵူၺ်းႁေႃႈၽီဢွၵ်ႇပႅတ်ႈဢေႃႈ။ ၵူၼ်းၶႆႈၵူၼ်းပဵၼ်ၼမ်ၼႃႇၵေႃႈမၼ်းၸဝ်ႈႁႂ်ႈၸိုၼ်ႈႁၢႆဢေႃႈ။-

17ဢၼ်မၼ်းၸဝ်ႈႁဵတ်းၸိူဝ်ႉၼင်ႇၼႆၼႆႉ၊ၵႂၢမ်းပရေႃးၽႅတ်ႈ ဢိသႃႇယႃႉ၊ ႁေႃးဝႆႉဝႃႈ၊ “မၼ်းၸဝ်ႈဢဝ်တၢင်းၶႆႈတၢင်းပဵၼ်ႁဝ်းဢိၵ်ႇတင်းယေႃးၵႃႇႁဝ်းၵႃႈမီးၵႂႃႇယဝ်ႉ၊” ဢၼ်ဝႃႈၼၼ်ႉပျေႉၸုမ်ႇဢေႃႈ။

18မိူဝ်ႈဢၼ် ၸဝ်ႈယေႇသု၊ ႁၼ်ၵူၼ်းၼမ်ၼႃႇလွမ်ႉႁွပ်ႈမၼ်းၸဝ်ႈယူႇၼၼ်ႉမၼ်းၸဝ်ႈသင်ႇလၢတ်ႈႁႂ်ႈတပႄးၸဝ်ႈတင်းလၢႆၶၢမ်ႈၵႂႃႇၽၢႆႇပုၼ်ႉၽင်ႇၼွင်ဢေႃႈ။-

19ယၢမ်းမိူဝ်ႈၼၼ်ႉ၊သြႃႇမေႃၵျၢမ်းထမ်ႇမႃႉၵေႃႉၼိုင်ႈမႃးၸူးတီႈမၼ်းၸဝ်ႈလႄႈလၢတ်ႈဝႃႈ၊ “သြႃႇၸဝ်ႈ။ ၵဝ်ၶႃႈတၵ်းၸွမ်းၸဝ်ႈႁဝ်းၵႂႃႇၵႃႈတီႈၵႃႈဢၼ်ၸဝ်ႈႁဝ်းၵႂႃႇၵူႈတီႈၵူႈလႅၼ်ၼၼ်ႉၶႃႈဢေႃႈ၊” ဝႃႈၼင်ႇၼႆဢေႃႈ။

20မၼ်းၸဝ်ႈၵေႃႈၶိုၼ်းလၢတ်ႈတီႈမၼ်းၼၼ်ႉလႄႈဝႃႈ၊ “မႃလိၼ်တင်းလၢႆယင်းမီးႁူး။ ၼူၵ်ႉတင်းလၢႆယင်းမီးႁင်းပုၼ်ႈၶဝ်တၵ်းယူႇတၵ်းသွၼ်ႈဢေႃႈ။ လုၵ်ႈၵူၼ်း၊ ၸမ်ႉ၊ယင်းဢမ်ႇမီးတီႈတၵ်းဝၢင်းႁူဝ်၊” ဝႃႈၼင်ႇၼႆဢေႃႈ။

21ၵူၼ်းတၢင်ႇၵေႃႉဢၼ်ပဵၼ်တပႄးၸဝ်ႈၼၼ်ႉၵေႃႉၼိုင်ႈသမ်ႉဝႃႈ၊ “ၸဝ်ႈႁဝ်းႁႂ်ႈၵဝ်ၶႃႈလႆႈၵႂႃႇသၢင်းၵျူဝ်ႇပေႃႈၵဝ်ၶႃႈဢွၼ်တၢင်းလူးၵွၼ်ႇၶႃႈ၊” ဝႃႈၼင်ႇၼႆဢေႃႈ။

22မၼ်းၸဝ်ႈၶိုၼ်းလၢတ်ႈလႄႈဝႃႈ၊ “ၸွမ်းပႃႈလင်ၵဝ်တႃႉ။ ႁႂ်ႈၵူၼ်းတၢႆတင်းလၢႆသၢင်းၵျူဝ်ႇၵူၼ်းတၢႆၶဝ်တႃႉ၊” ဝႃႈၼင်ႇၼႆဢေႃႈ။

23ၸဝ်ႈယေႇသု၊ ၶဝ်ႈၵႃႈၼႂ်းႁိူဝ်းၵႂႃႇလႄႈတပႄးၸဝ်ႈတင်းလၢႆၵေႃႈၶဝ်ႈၸွမ်းဢေႃႈ။-

24ယၢမ်းၼၼ်ႉၵႃႈၼႂ်းၼွင်ၼၼ်ႉၽူၼ်လူင်လူမ်းလူင်ထူဝ်းပတ်ႉမႃးႁႅင်းယႂ်ႇၼႃႇထၢၼ်ႈပေႃးလႅင်းၼမ်ႉပိူပ်ႈၼမ်ႉလုၵ်ႉၶိုၼ်ႈထိပ်ႇၽင်ႈၶဝ်ႈႁိူဝ်းမႃးဢေႃႈ။ ၽွင်းယၢမ်းၼၼ်ႉ ၸဝ်ႈယေႇသု၊ ၼွၼ်းလပ်းယူႇဢေႃႈ။-

25တပႄးၸဝ်ႈၸိူဝ်းၼၼ်ႉဢွၼ်ၵၼ်ပူၵ်းမၼ်းၸဝ်ႈလႄႈတွင်းပၢၼ်ႇဝႃႈ၊ “ၸဝ်ႈႁဝ်း။ လုၵ်ႉလႄႈၵႄႇသႄႇဢဝ်ႁဝ်းၶႃႈသေၵမ်းၶႃႈ။ ႁဝ်းၶႃႈတေႁွတ်ႈတၢင်းလုတၢင်းလႅဝ်ၶႃႈယဝ်ႉ၊” ဝႃႈၼင်ႇၼႆဢေႃႈ။

26မၼ်းၸဝ်ႈၵေႃႈလၢတ်ႈလႄႈဝႃႈ၊ “သူၸိူဝ်းဢၼ်တၢင်းယုမ်ႇမၢတ်ႈၵေႇၼႆႉ႟၊ႁဵတ်းသင်လႄႈသူၵူဝ်ထၼ်ႇၼႆႉ၊” ဝႃႈၼင်ႇၼႆယဝ်ႉၸင်ႇ၊လုၵ်ႉလႄႈပူင်ဢမိင်ႉတီႈၽူၼ်လူမ်းတင်းလႅင်းၼမ်ႉလႄႈၽိဝ်ၼမ်ႉၵေႃႈထၢတ်ႇယဵၼ်ၼိမ်ၵႂႃႇၵမ်းလဵဝ်ဢေႃႈ။

27ၶဝ်ၵူႈၵေႃႉဢၢမ်းလွင်ႈတၢင်းဢၼ်ပဵၼ်မႃးၼၼ်ႉလၢတ်ႈလႄႈဝႃႈ၊ “ၵေႃႉၼႆႉပဵၼ်ၵူၼ်းၸိူဝ်ႉၼင်ႇႁိုဝ်ၼေႃ၊လူမ်းတင်းလႅင်းၼမ်ႉလႆႈထွမ်ႇဢဝ်ဢမိင်ႉမၼ်းတႄႉယဝ်ႉ။” ဝႃႈၼင်ႇၼႆဢေႃႈ။

28မိူဝ်ႈဢၼ် ၸဝ်ႈယေႇသု၊ ႁွတ်ႈထိုင်ဢိူင်ႇ ၵႃႇတရႃႉ၊ ၽၢႆႇပုၼ်ႉၽင်ႇၼွင်ယဝ်ႉၼၼ်ႉ၊ မီးၵူၼ်းသွင်ၵေႃႉဢၼ်ၽီႁၢႆႉၶဝ်ႈလႄႈႁၢႆႉၵျၢမ်းၼႃႇထၢၼ်ႈပေႃးၽူႈလႂ်ဢမ်ႇႁတ်းပႆတၢင်းသဵၼ်ႈၼၼ်ႉ၊ ၶဝ်သွင်ၵေႃႉဢွၵ်ႇသေၵႃႈတီႈပႃႇႁဵဝ်ႈမႃးႁူပ်ႉမၼ်းၸဝ်ႈလႄႈ၊-

29ႁွင်ႉပၢဝ်ႇတီႈ ၸဝ်ႈယေႇသု၊ လႄႈလၢတ်ႈဝႃႈ၊ “ဢူဝ်း ယေႇသု၊ လုၵ်ႈၽြႃးပဵၼ်ၸဝ်ႈၼႆႉ႟၊ၸဝ်ႈႁဝ်းလူဝ်ႇၵႃႈသင်တင်းႁဝ်းၶႃႈ။ ၸဝ်ႈႁဝ်းမႃးပၼ်တုၵ်ႉၶႃႉဝူၺ်ႇတၼႃႇတီႈႁဝ်းၶႃႈၸူဝ်ႈဢၼ်ဢၶိင်ႇမၼ်းယင်းဢမ်ႇပႆႇႁွတ်ႈထိုင်ၼၼ်ႉၶႃႈႁိုဝ်း၊” ဝႃႈၼင်ႇၼႆဢေႃႈ။

30တီႈဢၼ်ၵႆၵၼ်တင်းၶဝ်တၢၼ်ႇတၢၼ်ႇၼၼ်ႉမီးၽုင်မူၽုင်ၼိုင်ႈၵိၼ်ယူႇဢေႃႈ။-

31ၽီႁၢႆႉၸိူဝ်းၼၼ်ႉတွင်းပၢၼ်ႇ ၸဝ်ႈယေႇသု၊ လႄႈဝႃႈ၊ “ပေႃးၸဝ်ႈႁဝ်းၶႃႈႁေႃႈႁဝ်းၶႃႈဢွၵ်ႇပႅတ်ႈၸိုင်၊ပၼ်ဢၶႂၢင်ႉႁႂ်ႈႁဝ်းၶႃႈလႆႈၵႂႃႇၶဝ်ႈၵႃႈတီႈၽုင်မူၼၼ်ႉသေၵမ်းၶႃႈ၊” ဝႃႈၼင်ႇၼႆလႄႈ။

32မၼ်းၸဝ်ႈၵေႃႈလၢတ်ႈလႄႈဝႃႈ၊ “ၵႂႃႇတႃႉ၊” ဝႃႈၼင်ႇၼႆဢေႃႈ။ ၵမ်းၼၼ်ႉ ၽီႁၢႆႉၸိူဝ်းၼၼ်ႉဢွၵ်ႇသေၵူၼ်းသွင်ၵေႃႉၼၼ်ႉလႄႈ၊ၵႂႃႇၶဝ်ႈၵႃႈၼႂ်းၽုင်မူသေယဝ်ႉ၊မူတင်းၽုင်ၶုၼ်ႇလႅၼ်ႈလူင်းႁိုၵ်းၸၼ်းၸူးၵႃႈၼႂ်းၼမ်ႉၼွင်လႄႈၵႅၼ်ႉၼမ်ႉတၢႆဢေႃႈ။

33ၵူၼ်းလဵင်ႉၽုင်မူၶဝ်ၸိူဝ်းၼၼ်ႉၶုၼ်ႇလႅၼ်ႈၶဝ်ႈၵႂႃႇၵႃႈၼႂ်းဝဵင်းလႄႈမွၵ်ႇလၢတ်ႈလွင်ႈတၢင်းၵူႈၸိူဝ်ႉၵူႈပိူင်ၸိူဝ်းၼၼ်ႉ၊ ဢိၵ်ႇတင်းလွင်ႈဢၼ်ပဵၼ်မႃးၵႃႈတီႈၵူၼ်းဢၼ်ၽီႁၢႆႉၶဝ်ႈၸိူဝ်းၼၼ်ႉဢေႃႈ။-

34ႁဵတ်းၼၼ်လႄႈၵူၼ်းတင်းဝဵင်းဢွၼ်ၵၼ်ဢွၵ်ႇမႃးႁႂ်ႈလႆႈထူပ်းႁၼ် ၸဝ်ႈယေႇသု၊ ယဝ်ႉၸင်ႇ၊ ၶဝ်တွင်းပၢၼ်ႇလဝ်ႈလၢတ်ႈႁႂ်ႈမၼ်းၸဝ်ႈဢွၵ်ႇသေဢိူင်ႇၶဝ်ၵႂႃႇဢေႃႈ။

← Chapter 7 Jump to: Chapter 9 →