2 Peter 1

Shan

Jump to: Chapter 2 →

1ၵဝ် သီႉမုၼ်ႇပေႇတရူႉ ဢၼ်ပဵၼ်ၶႃႈ တင်းတမၢၼ်ႇၸဝ်ႈ ယေႇသူႉၶရိၸ်ႈ ၼၼ်ႉၼႆႉ ပၼ်ငိၼ်းၵႂႃႇတီႈၶဝ်ၸိူဝ်းဢၼ် လႆႈတၢင်းဢၼ်ယုမ်ႇမၢတ်ႈဢၼ်မျၢတ်ႈလီ မႅၼ်ႈၼင်ႇတၢင်းဢၼ်ႁဝ်းယုမ်ႇမၢတ်ႈ တြႃးတၢင်းသိုဝ်ႈတေႃႇၽြႃးပဵၼ်ၸဝ်ႈႁဝ်း ယေႇသူႉၶရိၸ်ႈ ၸဝ်ႈဢၼ်ၵႄႇၶျွတ်ႈဢဝ်ၼၼ်ႉၶႃႈဢေႃႈ။-

2ႁႂ်ႈၵျေးၸူးၸဝ်ႈ ဢိၵ်ႇတင်းတၢင်းၼိမ်ၼမ်ၵိုၼ်းယႂ်ႇမႃး ၵႃႈတီႈသူၼႂ်းၺၢၼ်ႇတၢင်းဢၼ်ႁူႉၽြႃးပဵၼ်ၸဝ်ႈ ဢိၵ်ႇတင်းၸဝ်ႈႁဝ်း ယေႇသူႉၶရိၸ်ႈ ၼၼ်ႉ သေၵမ်းလူၺ်ႈ။

3တၼ်းၶူဝ်းမၼ်းၸဝ်ႈၼၼ်ႉ ဢဵတ်းလူပၼ်လွင်ႈတၢင်းၵႃႈဢၼ် ၸၢပ်ႈသႅင်ႇၵၼ်တင်း တၢင်းဢၼ်ဢသၢၵ်ႈလိပ်း ဢိၵ်ႇတင်းတၢင်းဢၼ်မူၼ်ႈပျေႃႇ ၼႂ်းဝၢတ်ႈၽြႃးတီႈႁဝ်းၸိူဝ်ႉၼင်ႇၼၼ်လႄႈ ၵွပ်ႈပိူဝ်ႈၺၢၼ်ႇဢၼ်ႁဝ်းႁူႉၽြႃးပဵၼ်ၸဝ်ႈ ဢၼ်ဢဝ်မုၼ်ၽုင်းတၼ်းၶူဝ်းႁွင်ႉဢဝ်ႁဝ်းၼၼ်ႉယဝ်ႉ။-

4ၵွပ်ႈပိူဝ်ႈလွင်ႈတၢင်းၸိူဝ်းၼၼ်ႉၵေႃႈ၊ မၼ်းၸဝ်ႈဢဝ်ၵတီႉၸဝ်ႈ ဢၼ်မျၢတ်ႈလီယႂ်ႇၼႃႇလႄႈထိူၵ်ႈၵႃႈထိူၵ်ႈၶၼ်ၼၼ်ႉ ဢၢပ်ႈပၼ်တီႈႁဝ်းဢေႃႈ။ လွင်ႈမၼ်းၸမ်ႉ လွင်ႈၼင်ႇႁိုဝ်သူတၵ်းဢိင်ပိုင်ႈၵတီႉၸဝ်ႈၸိူဝ်းၼၼ်ႉသေလႄႈ ၵၢင်းလွတ်ႈတင်းတၢင်းဢၼ်ၵူဝ်ႈဢၼ်ၵိူၵ်ႇ ဢၼ်မီးၼႂ်းလေႃးၵႃႉၼႆႉ ၵွပ်ႈပိူဝ်ႈတၢင်းဢၼ်ၸႂ်ၸပ်းၸႂ်ၸွႆးၼၼ်ႉသေယဝ်ႉ၊ ပဵၼ်ၵေႃႉဢၼ်လႆႈသိူၵ်ႈသမ်ႇၵၼ်တင်း ပၵတီႉၽြႃးၸိုင်၊ ၸင်ႇပဵၼ်ဢေႃႈ။

5ပုၼ်ႈလွင်ႈၼင်ႇႁိုဝ်တၵ်းပဵၼ်ၸိူဝ်ႉၼင်ႇၼၼ်ၸိုင်၊ တီႈတၢင်းဢၼ်ယုမ်ႇမၢတ်ႈ သီႇလႃႉလႄႈသင်၊ တီႈသီႇလႃႉၼၼ်ႉ ပိင်ႇၺႃႇလႄႈသင်၊-

6တီႈပိင်ႇၺႃႇၼၼ်ႉ တၢင်းဢၼ်ၶျုၵ်ႈၵႃႇမၵုင်ႇလႄႈသင်၊ တီႈတၢင်းဢၼ်ၶျုၵ်ႈၵႃႇမၵုင်ႇၼၼ်ႉ တၢင်းဢၼ်ယိူၼ်ႉၶၢမ်ႇလႄႈသင်၊ တီႈတၢင်းဢၼ်ယိူၼ်ႉၶၢမ်ႇၼၼ်ႉ တၢင်းဢၼ်ႁဵတ်းဝၢတ်ႈၽြႃးလႄႈမူၼ်ႈပျေႃႇလႄႈသင်၊-

7တီႈတၢင်းဢၼ်မူၼ်ႈပျေႃႇၼၼ်ႉ တၢင်းဢၼ်ၸူမ်းပႅင်းပီႈၼွင်ႉၵၼ်လႄႈသင်၊ တီႈတၢင်းဢၼ်ၸူမ်းပႅင်းပီႈၼွင်ႉၵၼ်ၼၼ်ႉ တၢင်းႁၵ်ႉမႅတ်ႈတႃႇလႄႈသင်၊ သူဢဝ်ထၢပ်ႈထႅင်ႈလႄႈ ဢဝ်ႁႅင်းၵျူဝ်းၸႃးတႃႉ။-

8လွင်ႈမၼ်းၸမ်ႉ ပေႃးပႃႇရမီႇၸိူဝ်းၼၼ်ႉ မီးယူႇၵႃႈၼႂ်းသူလႄႈပျေႉၸုမ်ႇၼမ်ၵိုၼ်းယူႇၸိုင်၊ ၸၢင်ႈပွင်ႁဵတ်းပွင်မႄး ႁႂ်ႈသူဢမ်ႇလႆႈၶၢၼ်ႉလႆႈဢိူၼ် ဢိၵ်ႇတင်းႁႂ်ႈသူဢမ်ႇလႆႈပဵၼ် ဢၼ်ဢမ်ႇမီးဢၵျူဝ်းၼၼ်ႉ ၼႂ်းတၢင်းဢၼ်ႁူႉၸၵ်းၸဝ်ႈႁဝ်း ယေႇသူႉၶရိၸ်ႈ ၼၼ်ႉယူႇဢေႃႈ။-

9ၵေႃႉဢၼ်ဢမ်ႇမီးပႃႇရမီႇၸိူဝ်းၼၼ်ႉၸမ်ႉ၊ မၢၵ်ႇတႃမၼ်းမွတ်ႇဢေႃႈ။ မၼ်းဢိုတ်းမၢၵ်ႇတႃမၼ်းဝႆႉဢေႃႈ။ မၼ်းလိုမ်းလွင်ႈတၢင်းဢၼ်သုၵ်ႈပွတ်ႈဢပႅတ်ႈဢၼ်ၵဝ်ႇမၼ်းၼၼ်ႉပႅတ်ႈဢေႃႈ။

10ပိူဝ်ႈၼႆလႄႈပီႈၼွင်ႉၶဝ်ဢိူၺ်း၊ ယဵင်ႈၶႅၼ်းဢဝ်ႁႅင်းၵျူဝ်းၸႃး ႁႂ်ႈတၢင်းဢၼ်မၼ်းၸဝ်ႈႁွင်ႉဢဝ် ဢိၵ်ႇတင်းတၢင်းဢၼ်မၼ်းၸဝ်ႈလိူၵ်ႈၵဵပ်းဢဝ် ဢၼ်သူလႆႈၶၢမ်ႇၼၼ်ႉ တႄႇယူႇတႃႉ။ ပေႃးသူႁဵတ်းၸိူဝ်ႉၼင်ႇၼၼ်ၸိုင်၊ သူတၵ်းၵၢင်းလွတ်ႈတင်းတၢင်းဢၼ် တိူဝ်ႉမႅၼ်ႈလႄႈလူမ်ႉဢေႃႈ။-

11လွင်ႈမၼ်းၸမ်ႉ မၼ်းၸဝ်ႈတၵ်းဢဵတ်းလူပၼ်ဢၶႂၢင်ႉတၢင်းဢၼ် ၶဝ်ႈၸၢမ်ႇၸႃးၵႃႈၼႂ်းမိူင်းထႃႇဝရႃႉၸဝ်ႈ ယေႇသူႉၶရိၸ်ႈ ၸဝ်ႈဢၼ်ၵႄႇၶျွတ်ႈဢဝ်ႁဝ်းၼၼ်ႉ တီႈသူၼမ်ၵိုၼ်းၼႃႇလူင်လၢင်ဢေႃႈ။

12ပိူဝ်ႈၼႆလႄႈ ပိၵ်ႉသမ်ႉသူႁူႉလွင်ႈတၢင်းၸိူဝ်းၼၼ်ႉလႄႈ တႄႇယူႇၼႂ်းသမ်ႇမႃႇတြႃး ဢၼ်ႁေႃးလၢတ်ႈတေႃႈလဵဝ်ၼႆႉၼၼ်ႉယူႇသေၵေႃႈ၊ ၵဝ်ဢမ်ႇလူင်ဢမ်ႇလိုမ်းလွင်ႈဢၼ်ၵဝ်တၵ်းဢဝ်တင်းၵႂၢမ်းၸိူဝ်ႉၼင်ႇၼၼ် ပၼ်သတီႉတီႈသူသေႇသေႇယူႇၼၼ်ႉ။-

13ၵဝ်မၢတ်ႈတွင်းလွင်ႈဢၼ် ဢမ်ႇႁိုင်ဢမ်ႇၼၢၼ်း ၵဝ်တၵ်းလႆႈပႅတ်ႈဝႆႉသုမ်ႉထဵင်ၵႃႈဢၼ်ၵဝ်ယူႇၼႆႉသေလႄႈ ၵႂႃႇၵႃႈၼင်ႇဢၼ်၊-

14ၸဝ်ႈႁဝ်း ယေႇသူႉၶရိၸ်ႈ ပၼ်ပျႃႇတိၵ်ႈၼၼ်ႉဝႆႉၼၼ်ႉလႄႈ ၵဝ်လီပၼ်သတီႉလႄႈ တိုၵ်းယူင်းၸူဝ်းဢဝ်သူ ၼႂ်းမိူဝ်ႈဢၼ်ၵဝ်ယင်းမီးယူႇၼႂ်း သုမ်ႉထဵင်ၼႆႉဝႃႈၼႆ ၵဝ်မီးသၽေႃးယူႇဢေႃႈ။-

15လိူဝ်သေၼၼ်ႉ၊ ၵဝ်တၵ်းဢဝ်ႁႅင်းၵျူဝ်းၸႃး ႁႂ်ႈသူလႆႈတွင်းဝႆႉ၊ လွင်ႈတၢင်းၸိူဝ်းၼႆႉယူႇသေႇသေႇ လိုၼ်းသေဢၼ်ၵဝ် လၢႆႈၸၢတ်ႈၵႂႃႇယဝ်ႉၼၼ်ႉဢေႃႈ။

16မိူဝ်ႈဢၼ်ႁဝ်းႁေႃးလၢတ်ႈ တၼ်းၶူဝ်းၸဝ်ႈႁဝ်း ယေႇသူႉၶရိၸ်ႈ ဢိၵ်ႇတင်းတၢင်းဢၼ် မၼ်းၸဝ်ႈတၵ်းမႃးၼၼ်ႉ တီႈသူၼၼ်ႉၸိုင်၊ ႁဝ်းဢမ်ႇၸွမ်းၵႂၢမ်းတၢၼ်ႇတႃႇရီႇဢၼ် ဢဝ်တင်းပရီႉယႄႇမႄးႁဵတ်းဝႆႉၼၼ်ႉလႄႈ ပဵၼ်ၵေႃႉဢၼ် တူဝ်ၸဝ်ႈၵဝ်ႇလႆႈႁၼ်မုၼ်ဢႃႇၼူႉၽေႃႇၸဝ်ႈဢေႃႈ။-

17ပဵၼ်ၸိူဝ်ႉၼင်ႇႁိုဝ် ဝႃႈၼင်ႇၼႆၸမ်ႉ၊ ၸဝ်ႈၼၼ်ႉလႆႈၶၢမ်ႇၵုင်ႇသရေႇမုၼ်ဢႃႇၼူႉၽေႃႇ ၵႃႈတီႈၸဝ်ႈပေႃႈၽြႃးပဵၼ်ၸဝ်ႈ ၼႂ်းမိူဝ်ႈဢၼ်သဵင်ၸဝ်ႈဢၼ်လၢတ်ႈလႄႈဝႃႈ၊ ၵေႃႉၼႆႉပဵၼ်လုၵ်ႈဢၼ်ၵဝ်ႁၵ်ႉၼႃႇ၊ တီႈဢၼ်ၵဝ်ထုၵ်ႇၸႂ်ၵျိူၵ်ႈၸႂ်ၼႃႇဢေႃႈ၊ ဝႃႈၼင်ႇၼႆၼၼ်ႉ ဢွၵ်ႇသေၵႃႈၼႂ်းငဝ်းဢရွင်ႇ ဢၼ်မျၢတ်ႈလိူဝ်တွၼ်းၼႃႇမႃးလႄႈ ႁွတ်ႈထိုင်ၵႃႈတီႈမၼ်းၸဝ်ႈၼၼ်ႉဢေႃႈ။-

18သဵင်ၸဝ်ႈဢၼ်လုၵ်ႉသေၵႃႈတီႈ ၼိူဝ်ၵၢင်ႁၢဝ်ႁွတ်ႈမႃးၼၼ်ႉၸိုင်၊ ႁဝ်းလႆႈငိၼ်းၼႂ်းမိူဝ်ႈဢၼ်ႁဝ်း မီးယူႇလူၺ်ႈၵၼ်တင်းၸဝ်ႈၽြႃး ၵႃႈတီႈၼိူဝ်လွႆဢၼ်မူတ်းၸၢင်ႇၼၼ်ႉဢေႃႈ။

19လိူဝ်သေၼၼ်ႉ ၵႂၢမ်းဢၼႃႇၵၢတ်ႈတီႉၸဝ်ႈ ဢၼ်ယဵင်ႈၶႅၼ်းမၼ်ႈၶိူင်ႇၼၼ်ႉ ယင်းမီးယူႇတီႈႁဝ်းဢေႃႈ။ သူထုၵ်ႇလီမၢတ်ႈတွင်းဝႆႉ ၵႂၢမ်းဢၼႃႇၵၢတ်ႈတီႉၼၼ်ႉ မိူၼ်ၸိူဝ်ႉၼင်ႇၽႆးတဵၼ်း ဢၼ်ႁိူဝ်ႈလႅင်းၵႃႈၼႂ်းတီႈဢၼ်လပ်းသိင်ႇ တေႃႇထိုင်ႁွတ်ႈၶိင်ႇၵႃႇလႃႉႁူဝ်မိူင်းသႂ်လႄႈ လၢဝ်လႅင်းဢွၵ်ႇမႃးၵႃႈၼႂ်းႁူဝ်ၸႂ်သူၼၼ်ႉယူႇသေလႄႈ ဢိင်ပိုင်ႈယူႇဢေႃႈ။-

20ၵႂၢမ်းဢၼႃႇၵၢတ်ႈတီႉ ဢၼ်ပႃးၼႂ်းၵျၢမ်းလိၵ်ႈၼၼ်ႉၸမ်ႉ၊ ဢထိၵ်ႈပႄႇမၼ်း ဢမ်ႇပေႃႇဢမ်ႇဢွၵ်ႇၸွမ်းၼင်ႇ ဢလူဝ်ႇတူဝ်ၸဝ်ႈၵဝ်ႇဝႃႈၼႆ ႁူႉၸႅင်ႈမၢတ်ႈတွင်းဝႆႉဢွၼ်တၢင်းတႃႉ။-

21လွင်ႈမၼ်းၸမ်ႉ ၵႂၢမ်းဢၼႃႇၵၢတ်ႈတီႉၼၼ်ႉ ယၢမ်ႈတွၼ်ႉလႆႈပဵၼ်ၸွမ်းၼင်ႇဢလူဝ်ႇၵူၼ်း ဢမ်ႇၸႂ်ႈ။ ၵူၼ်းမူတ်းၸၢင်ႇၽြႃးပဵၼ်ၸဝ်ႈၸိူဝ်းၼၼ်ႉ လႆႈၶၢမ်ႇတၢင်းဢၼ် ဝီႉၺိၺ်ႇဢၼ်မူတ်းၸၢင်ႇၸဝ်ႈ တိုၵ်းယူင်းလႄႈႁေႃးလၢတ်ႈဢေႃႈ။

Jump to: Chapter 2 →