2 Peter 2

Shan

← Chapter 1 Jump to: Chapter 3 →

1ၼႂ်းဝႃႈၼၼ်သေၵေႃႈ ၵႃႈၼႂ်းၵူၼ်းတင်းလၢႆ မီးမိၵ်ႉသႃႇပရေႃးၽႅတ်ႈဢေႃႈ။ မိူၼ်ၸိူဝ်ႉၼင်ႇၼၼ်၊ ၵႃႈၼႂ်းသူၵေႃႈ တၵ်းမီးမိၵ်ႉသႃႇသြႃႇ ဢၼ်ဢဝ်တင်းပရီႉယႄႇသႂၢင်းသႂ်ႇ ဢယူႇမိၵ်ႉသႃႇတိၵ်ႉထီႉ ဢၼ်ၸၢင်ႈယႃႉၸၢင်ႈယူၵ်ႉလႄႈ ထဵင်ပႅတ်ႈၸဝ်ႈဢၼ်သိုဝ်ႉဢဝ်ၶဝ်ၼၼ်ႉယူႇသေလႄႈ၊ ၸၢင်ႈႁႂ်ႈတၢင်းလူႉတၢင်းလႅဝ်ႁွတ်ႈထိုင်ၵႃႈၼိူဝ်ၶဝ် ၶၼ်ၶၼ်ၽႂ်းၽႂ်းၼၼ်ႉဢေႃႈ။-

2ၵူၼ်းၼမ်ၼႃႇတၵ်းၸွမ်းထုင်းၸၢမ်ႇ တၢင်းဢၼ်ၶဝ်ၵမ်ၵျၢင်ႉ ဢၼ်ၵူဝ်ႈၵိူၵ်ႇၼၼ်ႉလႄႈ သရေႇသဵၼ်ႈတၢင်းသမ်ႇမႃႇတြႃးတၵ်းလူႉဢေႃႈ။-

3ၶဝ်ၼၼ်ႉလေႃးၽႃႉပူၼ်ႉလိူဝ်ယူႇသေလႄႈ တၵ်းဢဝ်တင်းၵႂၢမ်းဢၼ်ၸၢင်ႈၶျေႃးၸၢင်ႈဝွၼ်း ၶၢႆသူၵိၼ်ဢေႃႈ။ တၢင်းဢၼ်ၸီႇယၢင်ႇဢပႅတ်ႈၶဝ်ၼၼ်ႉၸိုင် ၸႃႉၸဵမ်ၵမ်ႇၽႃႇၸႃႉတႄႇၼၼ်ႉလႄႈ ဢမ်ႇၵိုတ်းဢမ်ႇသဝ်း တၢင်းလူႉတၢင်းလႅဝ်ၼၼ်ႉၵေႃႈ ဢမ်ႇၼွၼ်းဢမ်ႇလပ်း။

4လွင်ႈမၼ်းၸမ်ႉ ပေႃးၽြႃးပဵၼ်ၸဝ်ႈယင်းဢမ်ႇသေလၢႆ တမၢၼ်ႇၵၢင်ႁၢဝ် ဢၼ်ၽိတ်းဢၼ်ပိူင်ႈတင်းလၢႆၼၼ်ႉလႄႈ ဢဝ်ၶဝ်ၶျႃးသႂ်ႇၵႃႈၼႂ်းငရၢႆးသေယဝ်ႉ၊ ၶျုၵ်ႈဝႆႉလႄႈ ဢဝ်တင်းၸိူၵ်ႈလဵၵ်း ဢၼ်လပ်းသိင်ႇတင်းလၢႆမတ်ႉၽုၵ်ႇဝႆႉ ပုၼ်ႈလွင်ႈၼင်ႇႁိုဝ်တၵ်းလႆႈၸႅတ်ႈထၢမ် ၸီႇယၢင်ႇၶဝ်ၼၼ်ႉယူႇ၊-

5ပိၵ်ႉသမ်ႉမၼ်းၸဝ်ႈဢမ်ႇသေလၢႆလေႃးၵထၢတ်ႈဢွၼ်ၼႆႉၼၼ်ႉသေၵေႃႈ ပႂ်ႉလူပႂ်ႉတူၺ်း ၼူဝ်းဢႃႇ ဢၼ်ႁေႃးလၢတ်ႈတြႃး တၢင်းသိုဝ်ႈတေႃႇ ဢိၵ်ႇတင်းၵူၼ်းၸဵတ်းၵေႃႉၼၼ်ႉလႄႈ ႁႂ်ႈၼမ်ႉထူမ်ႈပႅတ်ႈၵူၼ်းလေႃးၵီႇ ဢၼ်ဢမ်ႇၵူဝ်းၵႂၢႆႇၽြႃး ၵႃႈမီးတင်းသဵင်ႈတင်းလူင်ၼၼ်ႉယူႇ၊-

6ဢဝ်ၽႆးတုတ်ႇဝဵင်း သေႃးတုမ်ႇ ဢိၵ်ႇတင်းဝဵင်း ၵေႃးမေႃးရႃႉ ပႅတ်ႈလႄႈၸီႇယၢင်ႇပၼ်တၢမ်ႇ ယႃႉပႅတ်ႈသေယဝ်ႉ၊ ႁႂ်ႈပဵၼ်ပုင်ႇသၢၵ်ႈသေႇဝႆႉ တီႈၶဝ်ၸိူဝ်းဢၼ် တၵ်းၵမ်ၵျၢင်ႉတၢင်းၵမ်တၢင်းၵျၢင်ႉ ဢၼ်ဢမ်ႇတြႃးၵမ်းလိုၼ်းၼၼ်ႉယူႇ၊-

7ၵႄႇသႄႇၼုၵ်ႈဢဝ် လေႃးတႃႉ ဢၼ်သိုဝ်ႈတေႃႇ၊ ဢၼ်လႆႈၶၢမ်ႇတၢင်းဢၼ်ယႃႉယူၵ်ႉ ၵွပ်ႈပိူဝ်ႈတၢင်းၵမ်တၢင်းၵျၢင်ႉ ဢၼ်ၵူဝ်ႈဢၼ်ၵိူၵ်ႇ ဢၼ်ၵူၼ်းဢမ်ႇတြႃးတင်းလၢႆၵမ်ၵျၢင်ႉၼၼ်ႉ၊-

8ဢၼ်ၵွပ်ႈပိူဝ်ႈဢၼ်မၼ်းပဵၼ်ၵေႃႉဢၼ်သိုဝ်ႈတေႃႇလႄႈ ယူႇၼႂ်းၶဝ်ၸိူဝ်းဢၼ်ဢမ်ႇတြႃးၼၼ်ႉယူႇသေလႄႈ မၢၵ်ႇတႃလႆႈႁၼ်၊ ႁူၵေႃႈလႆႈငိၼ်း လွင်ႈတၢင်းဢၼ်ဢမ်ႇတြႃးၶဝ်ၼၼ်ႉလႄႈ ၼိၵ်ႈၸၢၵ်ႈငႅၼ်းသႄးႁူဝ်ၸႂ်တူဝ်ၸဝ်ႈၵဝ်ႇ ဢၼ်သိုဝ်ႈတေႃႇၼၼ်ႉၼႃႇလူင်လၢင်ၵူႈမိုဝ်ႉၵူႈဝၼ်းဢမ်ႇထၢတ်ႇယူႇၼၼ်ႉၸိုင်၊-

9ထႃႇဝရႃႉၽြႃးတၢတ်ႈၼိူင်ႇလႆႈ ႁႂ်ႈလႆႈၵႄႇသႄႇၼုၵ်ႈဢဝ်ၶဝ်ၸိူဝ်းဢၼ် မူၼ်ႈပျေႃႇၼႂ်းဝၢတ်ႈၽြႃးတင်းလၢႆ ၵႃႈၼႂ်းတၢင်းဢၼ်ၸၢမ်းတူၺ်းယႃႉယူၵ်ႉၼၼ်ႉ ဢိၵ်ႇတင်းႁႂ်ႈလႆႈဢဝ် ၶဝ်ၸိူဝ်းဢၼ်ဢမ်ႇတြႃးၼၼ်ႉ ၶျုၵ်ႈဝႆႉပုၼ်ႈဝၼ်းဢၼ်တၵ်းၸီႇယၢင်ႇတြႃးၼၼ်ႉ ႁႂ်ႈၶဝ်လႆႈၶၢမ်ႇတၢမ်ႇ၊-

10ဢိၵ်ႇတင်းႁႂ်ႈၶဝ်ၸိူဝ်းဢၼ် ၸွမ်းဢလူဝ်ႇၵႃႇမၵုင်ႇ တင်းၵီႉလေႇသႃႇတၢင်းဢၼ်ၸွႆးၸပ်းဢၼ်ၵူဝ်ႈဢၼ်ၵိူၵ်ႇလႄႈ ႁဵတ်းဢမ်ႇပေႃးၼင်ႇႁိုဝ် တီႈဢႃႇၼႃႇၸၢၵ်ႈၼၼ်ႉ ယဵင်ႈၶႅၼ်းလႆႈၶၢမ်ႇတၢမ်ႇၼၼ်ႉယူႇဢေႃႈ။ ၶဝ်ၼၼ်ႉပဵၼ်ၵေႃႉဢၼ်ႁတ်းဢၼ်ႁၢၼ်၊ ၵေႃႉဢၼ်ၸၢင်ႈၸွမ်းဢလူဝ်ႇတူဝ်ၸဝ်ႈၵဝ်ႇလႄႈ ႁတ်းသႄႉႁတ်းသွမ်း ၶဝ်ၸိူဝ်းဢၼ်မုၼ်တၼ်းၶူဝ်းယႂ်ႇၼႃႇၼၼ်ႉဢေႃႈ။-

11တမၢၼ်ႇၵၢင်ႁၢဝ်တင်းလၢႆၸမ်ႉ၊ ပိၵ်ႉသမ်ႉမီးႁႅင်းတၼ်းၶူဝ်း ဢၼ်ယႂ်ႇၼႃႇသေၶဝ်ၼၼ်ႉသေၵေႃႈ၊ ဢမ်ႇႁဵတ်းတၢင်းဢၼ်သႄႉသွမ်း တၢင်ႇဢပႅတ်ႈတီႈၶဝ်ၼၼ်ႉ ၵႃႈတီႈၽၢႆႇၼႃႈၽြႃးပဵၼ်ၸဝ်ႈ။-

12ၶဝ်ၸမ်ႉ၊ ပဵၼ်ၸိူဝ်ႉၼင်ႇ တရိၵ်ႈသၢၼ်ႇၸႅတ်ႈၸႅတ်ႈ ဢၼ်ၽၢၼ်ႇသၢင်းႁဵတ်းပဵၼ် ပုၼ်ႈဢၼ်တၵ်းတီႉဢဝ်လႄႈယႃႉပႅတ်ႈၼၼ်ႉလႄႈ သႄႉသွမ်းလွင်ႈတၢင်းဢၼ်တူဝ်ၸဝ်ႈၵဝ်ႇ ဢမ်ႇႁူႉၼၼ်ႉယူႇသေလႄႈ၊ တၵ်းလႆႈႁွတ်ႈထိုင်တၢင်းလူႉတၢင်းလႅဝ် ၵွပ်ႈပိူဝ်ႈဢၼ်တူဝ်ၸဝ်ႈၵဝ်ႇ တူႇၼဝ်ႈၼၼ်ႉလႄႈ ၶၢမ်ႇဢပႅတ်ႈလွင်ႈတၢင်းဢၼ် ဢမ်ႇတြႃးၼၼ်ႉယူႇ၊-

13မီးသၽေႃးဢၼ်ဝႃႈ တၢင်းဢၼ်ၸၢမ်ႇၸႃးၵႃႇမၵုင်ႇပူၼ်ႉလိူဝ် ၼႂ်းၶိင်ႇၵၢင်ဝၼ်းၼၼ်ႉ ပဵၼ်တီႈဢၼ်မူၼ်ႈပျေႃႇ၊ ဝႃႈၼင်ႇၼႆလႄႈ ပဵၼ်ဢၼ်ၵူဝ်ႈဢၼ်ၵိူၵ်ႇ ဢၼ်ၵႂၢၵ်ႈဢၼ်ၵိၵ်ႈဝႆႉလႄႈ ႁဵတ်းတၢင်းဢၼ်ၽိတ်းပိူင်ႈ ၸၢမ်ႇၸႃးၵႃႇမၵုင်ႇပူၼ်ႉလိူဝ် ၼႂ်းမိူဝ်ႈဢၼ်ႁဵတ်းပွႆးၵိၼ်ပွႆးၶူပ်းလူၺ်ႈၵၼ်တင်းသူၼၼ်ႉယူႇ၊-

14မီးမၢၵ်ႇတႃဢၼ်ပျေႉၸုမ်ႇတင်းၵီႉလေႇသႃႇဢၼ်ၽိတ်းပိူင်ႈမေးပိူၼ်ႈလႄႈ ယင်းဢမ်ႇႁဵတ်းတူႉၸရိူၵ်ႈလႄႈဢမ်ႇယူႇလႆႈ၊ ၸၢင်ႈၸူဝ်းဢဝ်ၶဝ်ၸိူဝ်းဢၼ် ႁူဝ်ၸႂ်ဢမ်ႇမၼ်ႈဢမ်ႇၶိူင်ႇၼၼ်ႉ ၵႂႃႇၼႂ်းဢပႅတ်ႈယူႇ၊ ၵႂႃႇၵႂႃႇမႃးမႃးၼႂ်းတၢင်းဢၼ်လေႃးၽႃႉပူၼ်ႉလိူဝ်လႄႈ ပဵၼ်လုၵ်ႈတၢင်းဢၼ်ၵိၼ်ႇဢၼ်ဝႃႈယူႇ၊-

15ပိူင်ႈဢွၵ်ႇသေၵႃႈၼႂ်း သဵၼ်ႈတၢင်းဢၼ်သိုဝ်ႈဢၼ်တေႃႇၵႂႃႇလႄႈ ၸွမ်းသဵၼ်ႈတၢင်း ပႃႇလၢမ်ႇ လုၵ်ႈၸၢႆး ပေႃႇသေႃႇ ၊-

16ဢၼ်ၸွႆးၸပ်းၵႃႈၶၼ်လွင်ႈတၢင်းဢၼ် ဢမ်ႇတြႃးလႄႈလႆႈၶၢမ်ႇတၢင်းဢၼ် သင်ႇသွၼ်သုင်းမႃႉ ၵွပ်ႈပိူဝ်ႈတူႉၸရိူၵ်ႈတူဝ်ၸဝ်ႈၵဝ်ႇၼၼ်ႉယူႇဢေႃႈ။ ပဵၼ်ၸိူဝ်ႉၼင်ႇႁိုဝ်ဝႃႈၼႆၸမ်ႉ၊ လီႈဢၼ်ဢမ်ႇလၢတ်ႈၵႂၢမ်းလႆႈၼၼ်ႉ လၢတ်ႈၵႂၢမ်းၽႃႇသႃႇၵူၼ်းသေလႄႈ ႁၢမ်ႈတၢပ်ႈႁႄႉၶႅၼ်တၢင်းမိူၵ်ႈ ပရေႃးၽႅတ်ႈဢေႃႈ။

17ၶဝ်ၼၼ်ႉပဵၼ်ၸိူဝ်ႉၼင်ႇ ၼမ်ႉမေႃႇဢၼ်ဢမ်ႇမီးၼမ်ႉ ဢိၵ်ႇတင်းၽႃႈၽူၼ် ဢၼ်လူမ်းထူဝ်းလႄႈပိဝ်ၵႂႃႇၼၼ်ႉဢေႃႈ။ ပုၼ်ႈၶဝ်ၼၼ်ႉၸိုင် မီးတၢင်းဢၼ်ဢဝ်လပ်းသိင်ႇထႃႇဝရႃႉ ဢၼ်လိုၵ်ႉၼႃႇၼၼ်ႉသိမ်းဝႆႉယူႇဢေႃႈ။-

18လွင်ႈမၼ်းၸမ်ႉ ၶဝ်လၢတ်ႈၵႂၢမ်းသုင် ဢၼ်လၢႆလၢႆဢမ်ႇပွင်ႇလွင်ႈၵႃႈသင်လႄႈ ဢဝ်တင်းတၢင်းဢၼ်ၸႃႇတီႉပၵတီႉ ၸွႆးၸပ်း၊ တင်းတၢင်းဢၼ်ၵီႉလေႇသႃႇပူၼ်ႉလိူဝ်ၸိူဝ်းၼၼ်ႉ ၸူဝ်းဢဝ်ၶဝ်ၸိူဝ်းဢၼ်ၸမ်တၵ်း ဢွၵ်ႇပၢႆႈသေၵႃႈၼႂ်းၶဝ်ၸိူဝ်းဢၼ်ၵႂႃႇၵႂႃႇ မႃးမႃး ၼႂ်းတၢင်းဢၼ်ၽိတ်းပိူင်ႈၼၼ်ႉၵႂႃႇ ၵႃႈၼႂ်းဢပႅတ်ႈဢေႃႈ။-

19ပိၵ်ႉသမ်ႉၶဝ်ႁပ်ႉတုင်းဢဝ်လႄႈဝႃႈ၊ မီးဢၶႂၢင်ႉတၢင်းဢၼ်လွတ်ႈယူႇဢေႃႈ၊ ဝႃႈၼင်ႇၼႆယူႇသေၵေႃႈ၊ ပဵၼ်ၶႃႈတၢင်းဢၼ်တူဝ်ၸဝ်ႈၵဝ်ႇတူႇၼဝ်ႈယူႇၼၼ်ႉဢေႃႈ။ ပဵၼ်ၸိူဝ်ႉၼင်ႇႁိုဝ်ဝႃႈၼႆၸမ်ႉ၊ လွင်ႈတၢင်းဢၼ်ပႄႉၼႅင်ႇၵူၼ်းၸိုင် ပဵၼ်ၸဝ်ႈၵူၼ်းဢေႃႈ။-

20ပေႃးၵၢင်းလွတ်ႈတင်း တၢင်းဢၼ်ၵူဝ်ႈဢၼ်ၵိူၵ်ႇလေႃးၵီႇ ၵွပ်ႈပိူဝ်ႈတၢင်းဢၼ်ႁူႉၸၵ်းၸဝ်ႈ ဢၼ်ၵႄႇၶျွတ်ႈဢဝ်ဢၼ်ဝႃႈ ၸဝ်ႈ ယေႇသူႉၶရိၸ်ႈ ၼၼ်ႉသေယဝ်ႉ သမ်ႉၶိုၼ်းထုၵ်ႇတူင်ႇႁႅဝ်ႉလႄႈသုမ်းၵႂႃႇၸိုင် ဢၼ်ပဵၼ်ၵမ်းလိုၼ်း ယဵင်ႈၶႅၼ်းႁၢႆႉၼႃႇသေ ဢၼ်ပဵၼ်ဢွၼ်တၢင်းဢေႃႈ။-

21ဢၼ်ယူႇလႄႈဢမ်ႇႁူႉသဵၼ်ႈတၢင်းတြႃး တၢင်းဢၼ်သိုဝ်ႈတေႃႇၼၼ်ႉ ယဵင်ႈၶႅၼ်းလီၼႃႇသေ ဢၼ်ႁူႉသဵၼ်ႈတၢင်းၼၼ်ႉယူႇလႄႈ ၵမ်းလိုၼ်းသမ်ႉပႄႇပႅတ်ႈသေ ပိင်းၺၢပ်ႈဢၼ်မူတ်းၸၢင်ႇ ဢၼ်တူဝ်ၸဝ်ႈၵဝ်ႇလႆႈၶၢမ်ႇယဝ်ႉၼၼ်ႉဢေႃႈ။-

22ၵႂၢမ်းဢပုမ်ႇဢၼ်မၢၼ်ႇဢၼ်မႅၼ်ႈဢၼ်ဝႃႈ၊ မႃၸိုင်သမ်ႉၶိုၼ်းၵိၼ်ႁၢၵ်ႈတူဝ်ၸဝ်ႈၵဝ်ႇဢေႃႈ။ မူၵေႃႈသုၵ်ႈသီယဝ်ႉသမ်ႉၶိုၼ်း ဢိူၵ်ႇၵႃႈၼႂ်းၵူမ်ႇဢေႃႈ၊ ဝႃႈၼင်ႇၼႆၼၼ်ႉ ပျေႉၸုမ်ႇၼႂ်းၶဝ်ၼၼ်ႉဢေႃႈ။

← Chapter 1 Jump to: Chapter 3 →