Haggai 2

Shan

← Chapter 1 Jump to:

1ၼႂ်းဝၼ်း လိူၼ်သတ်ႉတမႃႉ သၢဝ်းပၢႆဢဵတ်းဝၼ်း ၼၼ်ႉ၊ ၼုၵ်ႈၵပၢတ်ႈ ထႃႇဝရႃႉၽြႃး ဢဝ်ပရေႃးၽႅတ်ႈ ႁၵ်ႉၵႄး ႁွတ်ႈမႃးလႄႈ လၢတ်ႈလႄႈဝႃႈၸမ်ႉ၊-

2မႂ်းလၢတ်ႈတီႈ ၸေႇရူႉပႃႉပေႇလႃႉ လုၵ်ႈၸၢႆး သႃလႃႉသေးလႃႉ ၶုၼ်ဢၼ်ဢုပ်ႉပိူင်ႇမိူင်း ယူႉတႃႉ ဢိၵ်ႇတင်း ယေႃးသူႉ လုၵ်ႈၸၢႆး ယေႃးၸတိၵ်ႉ ၶုၼ်ယိတ်ႈပရေႃးႁဵၵ်ႈ တင်းၵူၼ်းတင်းလၢႆ ဢၼ်ၵိုတ်းဢၼ်ၵျၢၼ်ႇ ၸိူဝ်းၼၼ်ႉ လႄႈဝႃႈ၊-

3ၵေႃႉဢၼ် ယၢမ်ႈႁၼ်ႁိူၼ်းၸဝ်ႈၼႆႉ ပျေႉၸုမ်ႇဝႆႉ တင်းမုၼ်ၽုင်း မိူဝ်ႈဢွၼ်တၢင်းၼၼ်ႉ လႄႈ ၵိုတ်းၵျၢၼ်ႇဝႆႉယူႇ ၵႃႈၼႂ်းသူၸမ်ႉ၊ ပဵၼ်ၽူႈလႂ်။ မိူဝ်ႈလဵဝ်ၼႆႉ ႁၼ်ပဵၼ်ၸိူဝ်ႉၼင်ႇႁိုဝ်ဝႆႉ။ ပဵၼ်ၸိူဝ်ႉၼင်ႇဢၼ် ဢမ်ႇၸႂ်ႈၵႃႈသင်လႃးလႃး ၼၼ်ႉ သိုဝ်ႈၼႃႈတႂ်ႈတႃသူ ဢမ်ႇၸႂ်ႈႁိုဝ်။-

4ၼႂ်းဝႃႈၼၼ်သေၵေႃႈ ၸေႇရူႉပႃႉပေႇလႃႉ ဢိူၺ်း၊ ဢဝ်ႁႅင်းဢွၵ်ႇတႃႉ၊ ဝႃႈၼင်ႇၼႆလႄႈ ထႃႇဝရႃႉၽြႃး မီးဢမိင်ႉဢေႃႈ။ ယေႃးသူႉ လုၵ်ႈၸၢႆး ယေႃးၸတိၵ်ႉ ၶုၼ်ယိတ်ႈပရေႃးႁဵၵ်ႈဢိူၺ်း၊ ဢဝ်ႁႅင်းဢွၵ်ႇတႃႉ။ ၵူၼ်းဝၢၼ်ႈၵူၼ်းမိူင်း တင်းသဵင်ႈတင်းလူင်ၶဝ်ဢိူၺ်း၊ ဢဝ်ႁႅင်းဢွၵ်ႇလႄႈ ႁဵတ်းတႃႉ၊ ဝႃႈၼင်ႇၼႆလႄႈ ထႃႇဝရႃႉၽြႃး မီးဢမိင်ႉဢေႃႈ။-

5ၵဝ်မီးယူႇလူၺ်ႈၵၼ်တင်းသူ မႅၼ်ႈၸွမ်းၼင်ႇ ၵႂၢမ်းပတီႉၺိၺ်ႇ ဢၼ်ၵဝ်ႁဵတ်း လူၺ်ႈၵၼ်တင်းသူ ၼႂ်းမိူဝ်ႈဢၼ်သူ ဢွၵ်ႇသေၵႃႈၼႂ်းမိူင်း ဢေႇၵိပ်ႉတူႉ မႃးလႄႈ ဝီႉၺိၺ်ႇၵဝ် တူၵ်းတီႈတူၵ်းလႅၼ်ယူႇၵႃႈၼႂ်းသူ ၼၼ်ႉဢေႃႈ။ ယႃႇပေမႆႈၸႂ်ၶီၸႂ်၊ ဝႃႈၼင်ႇၼႆလႄႈ ၸဝ်ႈပူဝ်ႇပႃႇၵၢင်ႁၢဝ် ထႃႇဝရႃႉၽြႃး မီးဢမိင်ႉဢေႃႈ။-

6ၸဝ်ႈပူဝ်ႇပႃႇၵၢင်ႁၢဝ် ထႃႇဝရႃႉၽြႃး မီးဢမိင်ႉၸမ်ႉ၊ ထႅင်ႈၵမ်းဢွၼ်ႇၼိုင်ႈ၊ ၸူဝ်ႈဢၼ်ဢမ်ႇပႆႇႁိုင် ပႆႇၼၢၼ်းၼၼ်ႉ၊ ၵဝ်တၵ်းသၼ်ႇၶွၼ်း ၽႃႉၵၢင်ႁၢဝ်၊ လိၼ်မိူင်း၊ ပၢင်ႇလၢႆႇ၊ တီႈၵုင်းတင်းလၢႆဢေႃႈ။-

7ၵဝ်တၵ်းသၼ်ႇၶွၼ်း ၵူၼ်းၵူႈၸိူဝ်ႉၵူႈမဵဝ်းလႄႈ လွင်ႈတၢင်းဢၼ် ၵူၼ်းၵူႈၸိူဝ်ႉၵူႈမဵဝ်း လီထုၵ်ႇၸႂ်ၵျိူၵ်ႈၸႂ်ၼၼ်ႉ တၵ်းႁွတ်ႈထိုင်လႄႈ ၵဝ်တၵ်းႁႂ်ႈႁိူၼ်းၼႆႉ ပျေႉၸုမ်ႇတဵမ်ဝႆႉတင်း မုၼ်ၽုင်းဢေႃႈ၊ ဝႃႈၼင်ႇၼႆလႄႈ ၸဝ်ႈပူဝ်ႇပႃႇၵၢင်ႁၢဝ် ထႃႇဝရႃႉၽြႃး မီးဢမိင်ႉဢေႃႈ။-

8ငိုၼ်းပဵၼ်ၶွင်ၵဝ်ဢေႃႈ။ ၶမ်းပဵၼ်ၶွင်ၵဝ်ဢေႃႈ၊ ဝႃႈၼင်ႇၼႆလႄႈ ၸဝ်ႈပူဝ်ႇပႃႇၵၢင်ႁၢဝ် ထႃႇဝရႃႉၽြႃး မီးဢမိင်ႉဢေႃႈ။-

9မုၼ်ၽုင်းႁိူၼ်းၸဝ်ႈ ဢၼ်တႄႇႁဵတ်းၵမ်းလိုၼ်းၼႆႉ တၵ်းယဵင်ႈၶႅၼ်းယႂ်ႇၼႃႇသေ ႁိူၼ်းၸဝ်ႈၵမ်းဢွၼ်တၢင်းၼၼ်ႉဢေႃႈ၊ ဝႃႈၼင်ႇၼႆလႄႈ ၸဝ်ႈပူဝ်ႇပႃႇၵၢင်ႁၢဝ် ထႃႇဝရႃႉၽြႃး မီးဢမိင်ႉဢေႃႈ။ ၵႃႈၼႂ်းတီႈၼႆႈၵေႃႈ ၵဝ်တၵ်းပၼ် တၢင်းဢၼ်ၼိမ်ဢၼ်လီ၊ ဝႃႈၼင်ႇၼႆလႄႈ ၸဝ်ႈပူဝ်ႇပႃႇၵၢင်ႁၢဝ် ထႃႇဝရႃႉၽြႃး မီးဢမိင်ႉဢေႃႈ၊ ဝႃႈၼင်ႇၼႆတႃႉ၊ ဝႃႈၼင်ႇၼႆဢေႃႈ။

10ၼႂ်းၶူပ်ႇပီႊ ဢၼ်ၶုၼ်လူင် တႃႇရီႉ ၸၢမ်ႇႁၢင်ႈၸၢမ်ႇႁေႃ သွင်ပီႊ၊ လိူၼ်ၼဝမႃႉ၊ သၢဝ်းပၢႆသီႇဝၼ်း ၼၼ်ႉ၊ ၼုၵ်ႈၵပၢတ်ႈ ထႃႇဝရႃႉၽြႃး ဢဝ်တင်းပရေႃးၽႅတ်ႈ ႁၵ်ႉၵႄး ႁွတ်ႈမႃးလႄႈ လၢတ်ႈလႄႈဝႃႈ၊-

11ၸဝ်ႈပူဝ်ႇပႃႇၵၢင်ႁၢဝ် ထႃႇဝရႃႉၽြႃး မီးဢမိင်ႉၸမ်ႉ၊ တွင်ႈထၢမ်လူၺ်ႈလွင်ႈတြႃး တီႈယိတ်ႈပရေႃးႁဵၵ်ႈ တင်းလၢႆ လႄႈဝႃႈ၊-

12ပေႃးသေၵေႃႉသေၵူၼ်း ဢဝ်ၼိူဝ်ႉဢၼ်မူတ်းၸၢင်ႇၼၼ်ႉ ပူၵ်ႉႁေႃႇ ၵႃႈတီႈၶူဝ်းၼုင်ႈမၼ်းမႃးလႄႈ ဢဝ်တင်းၶူဝ်းၼုင်ႈၼၼ်ႉ တိူဝ်ႉထုၵ်ႇသႂ်ႇၶဝ်ႈမုၼ်း၊ ၽၵ်း၊ ၼမ်ႉၸပိတ်ႈ၊ ၼမ်ႉမၼ်း၊ တၢင်းၵိၼ်တၢင်းၶူပ်း သေၸိူဝ်ႉသေပိူင်ၸိုင် တၢင်းၵိၼ်တၢင်းၶူပ်းၼၼ်ႉ တၵ်းမူတ်းၸၢင်ႇႁိုဝ်။ ဝႃႈၼင်ႇၼႆတႃႉ၊ ဝႃႈၼင်ႇၼႆဢေႃႈ။ မိူဝ်ႈၼၼ်ႉ ယိတ်ႈပရေႃးႁဵၵ်ႈတင်းလၢႆ ၶိုၼ်းလၢတ်ႈလႄႈဝႃႈ၊ ဢမ်ႇမူတ်းၸၢင်ႇၵူၺ်ႉ၊ ဝႃႈၼင်ႇၼႆဢေႃႈ။-

13ႁၵ်ႉၵႄး ၵေႃႈ ၶိုၼ်းတွင်ႈထၢမ်လႄႈဝႃႈ၊ ပေႃးၵေႃႉဢၼ် ဢမ်ႇမူတ်းသႂ် ၵွပ်ႈပိူဝ်ႈတူဝ်တၢႆၼၼ်ႉ တိူဝ်ႉထုၵ်ႇသႂ်ႇ လွင်ႈတၢင်းၼၼ်ႉ သေၸိူဝ်ႉသေပိူင်ၸိုင် တၵ်းမီးတၢင်းဢၼ် ၵူဝ်ႈၵိူၵ်ႇႁိုဝ်။ ဝႃႈၼင်ႇၼႆသေယဝ်ႉ၊ ယိတ်ႈပရေႃးႁဵၵ်ႈၸိူဝ်းၼၼ်ႉ ၶိုၼ်းလၢတ်ႈလႄႈဝႃႈ၊ ပဵၼ်ဢၼ်ၵူဝ်ႈ ဢၼ်ၵိူၵ်ႇဢေႃႈ၊ ဝႃႈၼင်ႇၼႆဢေႃႈ။-

14ႁၵ်ႉၵႄး ၵေႃႈ သမ်ႉၶိုၼ်းလၢတ်ႈထႅင်ႈလႄႈဝႃႈ၊ မဵဝ်းၵူၼ်းၼႆႉ၊ ၵူၼ်းမိူင်းၼႆႉၸိူဝ်းၼႆႉ ပဵၼ်မိူၼ်ၸိူဝ်ႉၼင်ႇၼၼ် ၵႃႈတီႈၽၢႆႇၼႃႈၵဝ်ဢေႃႈ။ ၵႃႈဢၼ်ၶဝ် ဢဝ်မိုဝ်းၶဝ် သၢင်ႈႁဵတ်းၼၼ်ႉၵေႃႈ ပဵၼ်မိူၼ်ၸိူဝ်ႉၼင်ႇၼၼ်ဢေႃႈ။ ၶိူင်ႈပိူင်ဢၼ်ၶဝ် ပုၵ်ႈၸေႃႇတီႈၵဝ်ၵေႃႈ ပဵၼ်ဢၼ်ၵူဝ်ႈၵိူၵ်ႇဢေႃႈ၊ ဝႃႈၼင်ႇၼႆလႄႈ ထႃႇဝရႃႉၽြႃး မီးဢမိင်ႉဢေႃႈ။

15မိူဝ်ႈလဵဝ်ၼႆႉ သူဢွၼ်ၵၼ် ၶႆႈၸႂ်ဝူၼ်ႉၸႂ် လွင်ႈတၢင်းၸႃႉၸဵမ်ဝၼ်းမိူဝ်ႈၼႆႉ ၶိုၼ်းမိူဝ်းပႃႈလင် ၸူဝ်ႈဢၼ်ဢမ်ႇပႆႇဢဝ် မၢၵ်ႇႁိၼ်လုၵ်ႈၼိုင်ႈ တၢင်ႇသႂ်ႇၵႃႈၼိူဝ်မၢၵ်ႇႁိၼ်လုၵ်ႈၼိုင်ႈ တီႈပိၵ်ႈမၢၼ်ႇ ထႃႇဝရႃႉၽြႃးၼၼ်ႉ သေၵမ်း။-

16ၸႃႉၸဵမ် ၶိင်ႇမိုဝ်ႉဝၼ်းၼၼ်ႉလႄႈ ယၢမ်းမိူဝ်ႈဢၼ်ၵူၼ်း မႃးၸူးၵႃႈတီႈၵွင်ၶဝ်ႈပိူၵ်ႇ ဢၼ်လႆႈဢွၵ်ႇ သၢဝ်းတၢင် ၼၼ်ႉၸိုင်၊ လႆႈသိပ်းၼိုင်ႈ ၵူၺ်းဢေႃႈ။ ယၢမ်းမိူဝ်ႈဢၼ် မႃးၸူးၵႃႈတီႈႁၢင်းၼူတ်ႈမၢၵ်ႇၸပိတ်ႈ ႁႂ်ႈလႆႈဢဝ်မေႃႈၼမ်ႉၸပိတ်ႈႁႃႈသိပ်း ၼၼ်ႉၸိုင်၊ လႆႈသၢဝ်းၼိုင်ႈ ၵူၺ်းဢေႃႈ။-

17ၵဝ်ဢဝ်ၽေးတၢင်းဢၼ် လူမ်းတိူဝ်ႉထုၵ်ႇလႄႈ တူၼ်ႈမၼ်းတၢႆ၊ ၽေးတၢင်းဢၼ်သႃးလႄႈ တူၼ်ႈမၼ်းတၢႆ ဢိၵ်ႇတင်းၽေးမၢၵ်ႇႁဵပ်းပၼ်တၢမ်ႇတီႈသူ ၼႂ်းၵႃႈဢၼ်သူ ဢဝ်မိုဝ်းသူသၢင်ႈႁဵတ်းၼၼ်ႉ မႃးယဝ်ႉ။ ၵူၺ်းၵႃႈ သူဢမ်ႇဢွၼ်ၵၼ် ၶိုၼ်းမႃးၵႃႈတီႈၵဝ်၊ ဝႃႈၼင်ႇၼႆလႄႈ ထႃႇဝရႃႉၽြႃး မီးဢမိင်ႉဢေႃႈ။-

18သူဢွၼ်ၵၼ်ၶႆႈၸႂ်ဝူၼ်ႉၸႂ် လွင်ႈတၢင်းၸႃႉၸဵမ်ဝၼ်းမိူဝ်ႈၼႆႉ ၶိုၼ်းမိူဝ်းပႃႈလင်ၼၼ်ႉ ဢၼ်ပဵၼ် လိူၼ်ၼဝမႃႉ၊ သၢဝ်းပၢႆသီႇဝၼ်း၊ ဝၼ်းဢၼ်ၶျႃးငဝ်ႈႁၢၵ်ႈတိူၵ်ႈပိၵ်ႈမၢၼ်ႇထႃႇဝရႃႉၽြႃး ၼၼ်ႉသေၵမ်း။ လွင်ႈတၢင်းဢၼ် တၵ်းလႆႈၶႆႈၸႂ်ဝူၼ်ႉၸႂ်ၸမ်ႉ၊-

19ၵႃႈၼႂ်းယွင်ၶဝ်ႈယေးၶဝ်ႈ ယင်းမီးၶဝ်ႈပိူၵ်ႇယူႇ လူးၵွၼ်ႇႁိုဝ်။ ၶိူဝ်းတူၼ်ႈၸပိတ်ႈ၊ တူၼ်ႈမၢၵ်ႇလိူဝ်ႇသၢင်းၽေႃး၊ တူၼ်ႈမၢၵ်ႇၸင်ႈ၊ တူၼ်ႈ သၢၼ်ႇလုၼ်ႇ ၸိူဝ်းၼၼ်ႉ ဢမ်ႇပႆႇတိၼ်ႇ၊ပႆႇမၢၵ်ႇ။ ၵူၺ်းၵႃႈ ဢဝ်ၵႃႈတီႈ ၸႃႉၸဵမ်ဝၼ်းမိူဝ်ႈၼႆႉၵႂႃႇလႄႈ ၵဝ်တၵ်းပၼ်တၢင်းလီ တီႈသူဢေႃႈ၊ ဝႃႈၼင်ႇၼႆဢေႃႈ။

20ၼႂ်းလိူၼ်ၼၼ်ႉ လႆႈ သၢဝ်းပၢႆသီႇဝၼ်း ၼၼ်ႉ၊ ၼုၵ်ႈၵပၢတ်ႈ ထႃႇဝရႃႉၽြႃး သမ်ႉႁွတ်ႈမႃးတီႈ ႁၵ်ႉၵႄး လႄႈဝႃႈၸမ်ႉ၊-

21မႂ်းလၢတ်ႈတီႈ ၸေႇရူႉပႃႉပေႇလႃႉ ၶုၼ်ဢၼ်ဢုပ်ႉပိူင်ႇမိူင်း ယူႉတႃႉ ၼၼ်ႉ လႄႈဝႃႈ၊ ၵဝ်တၵ်းသၼ်ႇၶွၼ်း ၽႃႉၵၢင်ႁၢဝ် ဢိၵ်ႇတင်း လိၼ်မိူင်းဢေႃႈ။-

22ၵဝ်တၵ်းၶႂမ်ႈပိၼ်ႈ ရႃႇၸႃႉပလၢင်ႇ သိုင်ႇၸိုင်ႈဝၢၼ်ႈမိူင်းတင်းလၢႆပႅတ်ႈလႄႈ ယႃႉၽဵဝ်ႈ တၼ်းၶူဝ်းသိုင်ႇၸိုင်ႈဝၢၼ်ႈမိူင်းၵူၼ်း ၵူႈၸိူဝ်ႉၵူႈမဵဝ်းပႅတ်ႈဢေႃႈ။ လေႃႉရထႃးတင်းလၢႆ ဢိၵ်ႇတင်း ၶဝ်ၸိူဝ်းဢၼ်ၶီႇလေႃႉရထႃးၸိူဝ်းၼၼ်ႉ ၵေႃႈ ၵဝ်တၵ်းၶႂမ်ႈပိၼ်ႈပႅတ်ႈ လႄႈ မႃႉတင်းၵူၼ်းသိုၵ်းၶီႇမႃႉ ၸိူဝ်းၼၼ်ႉ ပီႈၼွင်ႉၵၼ် ၼင်ႇၵၼ်ၵၼ်ၵေႃႉၼိုင်ႈလႄႈၵေႃႉၼိုင်ႈ တၵ်းဢဝ်လၢပ်ႇၶႃႈၵၼ်၊ၽၼ်းၵၼ်လႄႈ လူမ်ႉတၢႆဢေႃႈ။-

23ၸဝ်ႈပူဝ်ႇပႃႇၵၢင်ႁၢဝ် ထႃႇဝရႃႉၽြႃး မီးဢမိင်ႉၸမ်ႉ၊ ၶႃႈၵဝ် ၸေႇရူႉပႃႉပေႇလႃႉ လုၵ်ႈၸၢႆး သႃလႃႉသေးလႃႉ ဢိူၺ်း၊ ၼႂ်းမိုဝ်ႉဝၼ်းၼၼ်ႉ ၵဝ်တၵ်းဢဝ်မႂ်းလႄႈ ၶၢၼ်းဝႆႉ မိူၼ်ၸိူဝ်ႉၼင်ႇ မွင်းၵူၺ်း တၼ်းသိၵ်ႈ ၼၼ်ႉဢေႃႈ၊ ဝႃႈၼင်ႇၼႆလႄႈ ထႃႇဝရႃႉၽြႃး မီးဢမိင်ႉဢေႃႈ။ ၵျၢမ်းဢၼႃႇၵၢတ်ႈတီႉႁၵ်ႉၵႄး ယဝ်ႉယဝ်ႉဢေႃႈ။

← Chapter 1 Jump to: