Job 2

Shan

← Chapter 1 Jump to: Chapter 3 →

1လႆႈသမ်ႉ မိူဝ်ႈဢၼ်ထိုင်ႁွတ်ႈမိုဝ်ႉဝၼ်းဢၼ် လုၵ်ႈၽြႃးပဵၼ်ၸဝ်ႈတင်းလၢႆ လႆႈမႃးၶႃးၸႃးၵႃႈတီႈၽၢႆႇၼႃႈထႃႇဝရႃႉၽြႃး ၼၼ်ႉၸိုင်၊ ၸႃႇတၢၼ်ႇ ၵေႃႈ ပႃးလူၺ်ႈၵၼ်တင်းၶဝ် ႁႂ်ႈလႆႈၶႃးၸႃးၵႃႈတီႈၽၢႆႇၼႃႈထႃႇဝရႃႉၽြႃးဢေႃႈ။-

2ထႃႇဝရႃႉၽြႃးၵေႃႈ ထၢမ်တီႈ ၸႃႇတၢၼ်ႇ လႄႈဝႃႈ၊ မႂ်းလုၵ်ႉၵႃႈတီႈလႂ်မႃး၊ ဝႃႈၼင်ႇၼႆသေယဝ်ႉ၊ ၸႃႇတၢၼ်ႇ ၶိုၼ်းလဝ်ႊလၢတ်ႈလႄႈဝႃႈ၊ လုၵ်ႉသေၵႃႈတီႈတၢင်းဢၼ်လႄႇလဵပ်ႈၵႃႈၼိူဝ်လိၼ်မိူင်းလႄႈ ၵႂႃႇၵႂႃႇမႃးမႃးၼၼ်ႉမႃးတီႈၶႃႈဢေႃႈ၊ ဝႃႈၼင်ႇၼႆဢေႃႈ။-

3ထႃႇဝရႃႉၽြႃးမီးဢမိင်ႉတီႈ ၸႃႇတၢၼ်ႇ လႄႈဝႃႈ၊ မႂ်းၶႆႈၸႂ်ဝူၼ်ႉၸႂ်လူၺ်ႈၶႃႈၵဝ် ယေႃးၽႃႉ ၼၼ်ႉယဝ်ႉႁိုဝ်။ ၵႃႈၼိူဝ်လိၼ်မိူင်း ၵေႃႉဢၼ်မိူၼ်ၵၼ်တင်းမၼ်းၼၼ်ႉ ဢမ်ႇမီးသေၵေႃႉသေၵူၼ်း။ မၼ်းပဵၼ်ၵေႃႉဢၼ်ၸေးၸုမ်ႇ၊ ၵေႃႉဢၼ်သိုဝ်ႈတေႃႇဢေႃႈ။ ပဵၼ်ၵေႃႉဢၼ်ၵူဝ်ယမ်ၽြႃးပဵၼ်ၸဝ်ႈ၊ ၵေႃႉဢၼ်ဝႄႈပႅတ်ႈတၢင်းၵမ်တၢင်းၵျၢင်ႉဢၼ်ဢမ်ႇလီဢေႃႈ။ ပိၵ်ႉသမ်ႉမႂ်းတိုၵ်းယူင်းၵဝ်လွင်ႈၼင်ႇႁိုဝ် လွင်ႈမၼ်းယင်းဢမ်ႇမီးလႄႈ တၵ်းႁႂ်ႈၵဝ်ႁႂ်ႈမၼ်းလူႉလႅဝ်သေၵေႃႈ၊ မၼ်းၸွႆးၸပ်းလူၺ်ႈၸႂ်သၽေႃး ဢၼ်သိုဝ်ႈတေႃႇၼၼ်ႉယူႇဢေႃႈ၊ ဝႃႈၼင်ႇၼႆဢေႃႈ။-

4ၸႃႇတၢၼ်ႇ ၵေႃႈၶိုၼ်းလဝ်ႊလၢတ်ႈတီႈ ထႃႇဝရႃႉၽြႃးလႄႈဝႃႈ၊ ၸိူဝ်ႉၼင်ႇဢၼ်ဝႃႈ ၽိဝ်ၼင်ပုၼ်ႈၽိဝ်ၼင်၊ ဝႃႈၼင်ႇၼႆၼၼ်ႉ၊ ၵူၼ်းတၵ်းဢဝ်ၵႃႈဢၼ်မၼ်းမီးၼၼ်ႉ ပၼ်ပုၼ်ႈဢသၢၵ်ႈတူဝ်ၸဝ်ႈၵဝ်ႇတီႈၶႃႈဢေႃႈ။-

5မိူဝ်ႈလဵဝ်ၼႆႉ ပေႃးၸဝ်ႈႁဝ်းယဵတ်ႇမိုဝ်းလႄႈ တိူဝ်ႉထုၵ်ႇလုပ်ႇမၼ်း တင်းၼိူဝ်ႉမၼ်းၸိုင်၊ မၼ်းတၵ်းၸုၼ်ႉပႅတ်ႈၸဝ်ႈႁဝ်း သိုဝ်ႈၼႃႈတႂ်ႈတႃၸဝ်ႈႁဝ်းတီႈၶႃႈဢေႃႈ၊ ဝႃႈၼင်ႇၼႆဢေႃႈ။-

6ထႃႇဝရႃႉၽြႃးၵေႃႈ မီးဢမိင်ႉတီႈ ၸႃႇတၢၼ်ႇ လႄႈဝႃႈ၊ တူၺ်းလူး၊ မၼ်းၼၼ်ႉမီးယူႇၵႃႈၼႂ်းမိုဝ်းမႂ်းဢေႃႈ။ ၵူၺ်းၵႃႈ ႁႂ်ႈဢသၢၵ်ႈမၼ်းလွတ်ႈတႃႉ၊ ဝႃႈၼင်ႇၼႆသေယဝ်ႉ၊-

7ၸႃႇတၢၼ်ႇ ၼၼ်ႉဢွၵ်ႇသေၵႃႈတီႈၽၢႆႇၼႃႈထႃႇဝရႃႉၽြႃးၵႂႃႇလႄႈ ႁႂ်ႈတုမ်ႇၸဵပ်းတုမ်ႇၽီဢွၵ်ႇၵႃႈတီႈ ယေႃးၽႃႉ ဢဝ်ၵႃႈတီႈၽႃႇတိၼ်မၼ်း တေႃႇထိုင်ႁွတ်ႈၸိၵ်းႁူဝ်မၼ်းဢေႃႈ။-

8မၼ်းၵေႃႈယိပ်းၵမ်ဢဝ်ၽၢၵ်ႇမေႃႈ ပုၼ်ႈဢၼ်တၵ်းၶုတ်ႇတၵ်းယၢႆးတူဝ်ၸဝ်ႈၵဝ်ႇယူႇသေလႄႈ ၼင်ႈယူႇၵႃႈၼႂ်း တဝ်ႈၽီးၽႆးဢေႃႈ။-

9မိူဝ်ႈၼၼ်ႉ မေးမၼ်းလၢတ်ႈလႄႈဝႃႈ၊ မႂ်းယင်းၸွႆးၸပ်းလူၺ်ႈတြႃးဢၼ်သိုဝ်ႈတေႃႇယူႇလူးၵွၼ်ႇႁိုဝ်။ ၸုၼ်ႉပႅတ်ႈၽြႃးပဵၼ်ၸဝ်ႈသေလႄႈတၢႆတႃႉ၊ ဝႃႈၼင်ႇၼႆဢေႃႈ။-

10မၼ်းၵေႃႈၶိုၼ်းလၢတ်ႈလႄႈဝႃႈ၊ မႂ်းၼႆႉလၢတ်ႈမိူၼ်ၸိူဝ်ႉၼင်ႇဢၼ် မႄႈယိင်းမိူၵ်ႈၸၢင်ႈလၢတ်ႈၼၼ်ႉဢေႃႈ။ ပဵၼ်ၸိူဝ်ႉၼင်ႇႁိုဝ်ႁဝ်းၶၢမ်ႇဢဝ်သုၵ်ႉၶႃႉၵတ်းယဵၼ်ၶျၢမ်းသႃႇတီႈမိုဝ်းၽြႃးပဵၼ်ၸဝ်ႈလႄႈ ႁဝ်းဢမ်ႇလႆႈၶၢမ်ႇဢဝ်တုၵ်ႉၶႃႉတၢင်းၽၢၼ်ႁိုဝ်။ ဝႃႈၼင်ႇၼႆဢေႃႈ။ ၼႂ်းလွင်ႈတၢင်းၼႆႉတင်းသဵင်ႈတင်းလူင် ယေႃးၽႃႉ ဢမ်ႇၽိတ်းပိူင်ႈလူၺ်ႈသူပ်းမၼ်းလႃးလႃး။

11မိူဝ်ႈၼၼ်ႉ ၵေႃႉသေႈ ယေႃးၽႃႉ သၢမ်ၵေႃႉဢၼ်ဝႃႈ ဢေးလီႉၽတ်ႉ ၵူၼ်းမဵဝ်း တေႇမၢၼ်ႇ၊ ပီႉလတတ်ႉ ၵူၼ်းမဵဝ်း သူႉဢႃႇ၊ ၸေႃႇၽႃႇ ၵူၼ်းမဵဝ်း ၼေႇမတ်ႉ ၸိူဝ်းၼၼ်ႉ ငိၼ်းလွင်ႈၽေးလူင်ဢၼ်ႁွတ်ႈထိုင်ၵႃႈၼိူဝ်မၼ်း တင်းသဵင်ႈတင်းလူင်ၼၼ်ႉသေယဝ်ႉ၊ ဢွၼ်ၵၼ်လုၵ်ႉသေၵႃႈတီႈ တီႈယူႇတီႈသဝ်းၶဝ်ႁင်းၽႂ်ႁင်းမၼ်းသေလႄႈ ႁွတ်ႈမႃးၸွမ်းၵႃႈၼင်ႇဢၼ်ၶဝ်မၵ်းၶိၼ်းၶၢၼ်းဝႆႉ လူၺ်ႈလွင်ႈဢၼ်ၶဝ်တၵ်းၸူႉၵၼ်တုမ်ၵၼ် ႁႂ်ႈလႆႈႁဵတ်းတၢင်းဢၼ်ၶၢင်းၶီၶၢင်းၽၢၼ်၊ တၢင်းဢၼ်ႁႂ်ႈမၼ်းပေႇၸႂ်ၼိမ်ၸႂ်ၼၼ်ႉဢေႃႈ။-

12ၶဝ်ၼၼ်ႉယူႇတီႈဢၼ်ၵႆ မုင်ႈတူၺ်းလႄႈဢမ်ႇႁူႉၸၵ်းမၼ်းသေယဝ်ႉ၊ ဢွၼ်ၵၼ်ၵိဝ်သဵင်လႄႈႁႆႈႁွင်ႉဢေႃႈ။ ၶဝ်ဢွၼ်ၵၼ် ၸၵ်ႉသိၵ်ႇသိူဝ်ႈယၢဝ်းၶဝ်ႁင်းၽႂ်ႁင်းမၼ်းလႄႈ ဢဝ်မုၼ်ႈလိၼ်ပိုၼ်ၶိုၼ်ႈၵႃႈၼိူဝ်ၽႃႉၵၢင်ႁၢဝ် ႁႂ်ႈတူၵ်းသႂ်ႇၵႃႈၼိူဝ်ႁူဝ်ၶဝ်ဢေႃႈ။-

13ၸဵတ်းဝၼ်းၸဵတ်းၶိုၼ်းတဵမ်တဵမ် ၶဝ်ဢွၼ်ၵၼ်ၼင်ႈယူႇလူၺ်ႈၵၼ်တင်းမၼ်းၵႃႈၼိူဝ်လိၼ်လႄႈ ၽူႈလႂ်သေၵေႃႉသေၵူၼ်း ယင်းဢမ်ႇလၢတ်ႈၵႂၢမ်းတေႃႇမၼ်း သေၶေႃႈသေၵမ်းလႄႈယူႇ ၵွပ်ႈပိူဝ်ႈဢၼ်ၶဝ်ႁူႉႁၼ်လွင်ႈဢၼ် မၼ်းလႆႈၶၢမ်ႇတုၵ်ႉၶႃႉတၢင်းၽၢၼ်ၼႃႇလူင်လၢင် ၼၼ်ႉဢေႃႈ။

← Chapter 1 Jump to: Chapter 3 →