Job 42

Shan

← Chapter 41 Jump to:

1မိူဝ်ႈၼၼ်ႉ ယေႃးၽႃႉ ၶိုၼ်းလဝ်ႊလၢတ်ႈတီႈထႃႇဝရႃႉၽြႃးလႄႈဝႃႈၸမ်ႉ၊-

2ၶႃႈၸဝ်ႈႁူႉလွင်ႈဢၼ်ၸဝ်ႈႁဝ်းတၢတ်ႈၼိူင်ႇလႆႈၵူႈၸိူဝ်ႉၵူႈပိူင် ဢိၵ်ႇတင်းလွင်ႈဢၼ်ၽူႈလႂ် ဢမ်ႇႁၢမ်ႈတၢပ်ႈႁႄႉၶႅၼ်တၢင်းၵျၢမ်ႇတၢင်းပွင်ၸဝ်ႈႁဝ်းလႆႈၼၼ်ႉယူႇတီႈၶႃႈဢေႃႈ။-

3ၵေႃႉဢၼ်ယင်းဢမ်ႇမီးပိင်ႇၺႃႇလႄႈ ႁႂ်ႈတၢင်းၵျၢမ်ႇတၢင်းပွင်ၸဝ်ႈႁဝ်း မိူၵ်ႈလပ်းသိင်ႇၼႆႉၼၼ်ႉၸမ်ႉ၊ ပဵၼ်ၽူႈလႂ်တီႈၶႃႈ၊ ပိူဝ်ႈၼႆလႄႈ ၶႃႈၸဝ်ႈလႆႈလၢတ်ႈလွင်ႈတၢင်းဢၼ်ဢမ်ႇပွင်ႇၸႂ်၊ လွင်ႈတၢင်းဢၼ်လီဢၢမ်းလႄႈ ဢမ်ႇသုတ်းဢမ်ႇသဵင်ႈလႆႈဢၼ်ၶႃႈၸဝ်ႈဢမ်ႇႁူႉၸိူဝ်းၼၼ်ႉ မႅၼ်ႈတီႈၶႃႈယဝ်ႉ။-

4ၶႅၼ်းတေႃႈထွမ်ႇငိၼ်းသေၵမ်းတီႈၶႃႈ။ ၶႃႈၸဝ်ႈတၵ်းလဝ်ႊလၢတ်ႈတီႈၶႃႈဢေႃႈ။ ၶႅၼ်းတေႃႈၵႄႈလိတ်ႈၵႂၢမ်းပျၢတ်ႈသၼႃႇ ဢၼ်ၶႃႈၸဝ်ႈတၵ်းလဝ်ႊထၢမ်တီႈၸဝ်ႈႁဝ်းၼၼ်ႉသေၵမ်းတီႈၶႃႈ။-

5ၶႃႈၸဝ်ႈဢဝ်တင်းႁူသေလႄႈ ယၢမ်ႈတွၼ်ႉငိၼ်းသတၢင်းသဵင်ၶၢဝ်ႇၸဝ်ႈႁဝ်းတီႈၶႃႈယဝ်ႉ။ မိူဝ်ႈလဵဝ်ၼႆႉၸမ်ႉ၊ မၢၵ်ႇတႃၶႃႈၸဝ်ႈ လႆႈႁၼ်ၸဝ်ႈႁဝ်းတီႈၶႃႈဢေႃႈ။-

6ၵွပ်ႈပိူဝ်ႈၼင်ႇၼၼ်လႄႈ ၶႃႈၸဝ်ႈလီႁင်ႈဢဵတ်ႇသဵတ်ႇတူဝ်ၸဝ်ႈၵဝ်ႇလႄႈ ၼင်ႈၵႃႈၼိူဝ်မုၼ်ႈလိၼ် တင်းတဝ်ႈသေလႄႈၶုၵ်းၸႂ်လႆႈသေလႄႈ ၶုၵ်းၸႂ်လႆႈမႆႈၸႂ်တီႈၶႃႈဢေႃႈ၊ ဝႃႈၼင်ႇၼႆဢေႃႈ။

7ၼင်ႇၼၼ်လႄႈ လိုၼ်းသေထႃႇဝရႃႉၽြႃးမီးဢမိင်ႉတီႈ ယေႃးၽႃႉ ၸိူဝ်ႉၼင်ႇၼၼ်ယဝ်ႉၼၼ်ႉ၊ မၼ်းၸဝ်ႈမီးဢမိင်ႉတီႈ ဢေးလီႉၽတ်ႉ ၵူၼ်းမဵဝ်း တေႇမၢၼ်ႇ ၼၼ်ႉလႄႈဝႃႈ၊ ၵဝ်ၸႂ်မႆႈၶႆႈၸႃႉတီႈမႂ်း ဢိၵ်ႇတင်းၵေႃႉသေႈမႂ်းသွင်ၵေႃႉၼၼ်ႉဢေႃႈ။ လွင်ႈမၼ်းၸမ်ႉ သူဢမ်ႇလၢတ်ႈလွင်ႈၵဝ်ၸိုဝ်ႈၸိုဝ်ႈၸႂ်ႈၸႂ်ႈ မိူၼ်ၸိူဝ်ႉၼင်ႇဢၼ်ၶႃႈၵဝ် ယေႃးၽႃႉ လၢတ်ႈၼၼ်ႉ။-

8ပိူဝ်ႈၼႆလႄႈဢွၼ်ၵၼ်ဢဝ်ဝူဝ်းပေႃႈၸဵတ်းတူဝ် တင်းသူဝ်းပေႃႈၸဵတ်းတူဝ်သေလႄႈ ၸူးၵႃႈတီႈၶႃႈၵဝ် ယေႃးၽႃႉ လႄႈ ပုၵ်ႈၸေႃႇယိတ်ႈဢၼ်တုတ်ႇၽႆး ပုၼ်ႈသူတႃႉ။ ၶႃႈၵဝ် ယေႃးၽႃႉ တၵ်းလႆႈသူးတွင်းပုၼ်ႈသူဢေႃႈ။ ၵဝ်တၵ်းထွၵ်ႈလူၺ်ႈၼႃႈမၼ်းသေလႄႈ ဢမ်ႇၸီႇယၢင်ႇၸွမ်းၼင်ႇဢပႅတ်ႈသူၼၼ်ႉဢေႃႈ။ လွင်ႈမၼ်းၸမ်ႉ သူဢမ်ႇလၢတ်ႈလွင်ႈၵဝ်ၸိုဝ်ႈၸိုဝ်ႈၸႂ်ႈၸႂ်ႈ မိူၼ်ၸိူဝ်ႉၼင်ႇၶႃႈၵဝ် ယေႃးၽႃႉ လၢတ်ႈၼၼ်ႉလူင်ပႄႇ၊ ဝႃႈၼင်ႇၼႆဢေႃႈ။-

9မိူဝ်ႈၼၼ်ႉ ဢေးလီႉၽတ်ႉ ၵူၼ်းမဵဝ်း တေႇမၢၼ်ႇ၊ ပီႉလတတ်ႉ ၵူၼ်းမဵဝ်း သူႉဢႃႇ၊ ၸေႃႇၽႃႇ ၵူၼ်းမဵဝ်း ၼေႇမတ်ႉ ၸိူဝ်းၼၼ်ႉ ဢွၼ်ၵၼ်ၵႂႃႇလႄႈ ႁဵတ်းၸွမ်းၵႃႈၼင်ႇဢၼ်ထႃႇဝရႃႉၽြႃးသင်ႇလၢတ်ႈဝႆႉတီႈၶဝ်ၼၼ်ႉလႄႈ ထႃႇဝရႃႉၽြႃးၵေႃႈထွၵ်ႈလူၺ်ႈၼႃႈ ယေႃးၽႃႉ ဢေႃႈ။

10ယေႃးၽႃႉ ၼၼ်ႉ သူးတွင်းပုၼ်ႈၵေႃႉသေႈမၼ်းတင်းလၢႆသေယဝ်ႉ၊ ထႃႇဝရႃႉၽြႃးပႄႇပႅတ်ႈလွင်ႈတၢင်းဢၼ်မၼ်းၶၢမ်ႇတုၵ်ႉၶႃႉ တၢင်းၽၢၼ်ၼၼ်ႉသေလႄႈ ထႃႇဝရႃႉၽြႃးပၼ်ဢုၵ်ႉၸႃႇဢၼ်လိူဝ်တွၼ်းၼႃႇသေ မိူဝ်ႈဢွၼ်တၢင်းၼၼ်ႉသွင်ပုၼ်ႈ တီႈ ယေႃးၽႃႉ ဢေႃႈ။-

11မိူဝ်ႈၼၼ်ႉပီႈၸၢႆးၼွင်ႉၸၢႆးမၼ်းတင်းသဵင်ႈတင်းလူင်၊ ပီႈၼၢင်းၼွင်ႉယိင်းမၼ်းတင်းသဵင်ႈတင်းလူင် ဢိၵ်ႇတင်းၶဝ်ၸိူဝ်းဢၼ်ႁူႉၸၵ်းမိုတ်ႈၵိုဝ်းမၼ်း မိူဝ်ႈဢွၼ်တၢင်းၵႃႈမီးၸိူဝ်းၼၼ်ႉ ဢွၼ်ၵၼ်မႃးၸူးၵႃႈတီႈမၼ်းလႄႈ ၵိၼ်ၶူပ်းလူၺ်ႈၵၼ်တင်းမၼ်းၵႃႈတီႈႁိူၼ်းမၼ်းဢေႃႈ။ ၶဝ်ဢွၼ်ၵၼ်ႁဵတ်းတၢင်းဢၼ် ၶၢင်းၶီၶၢင်းၽၢၼ်ဢိၵ်ႇတင်း တၢင်းဢၼ်ႁႂ်ႈပေႇၸႂ်ၼိမ်ၸႂ်လူၺ်ႈလွင်ႈတုၵ်ႉၶႃႉတၢင်းၽၢၼ်ဢၼ် ထႃႇဝရႃႉၽြႃးႁႂ်ႈႁွတ်ႈထိုင်ၵႃႈၼိူဝ်မၼ်းၵႃႈမီးၼၼ်ႉဢေႃႈ။ ၶဝ်ၼၼ်ႉဢွၼ်ၵၼ်ပၼ်ငိုၼ်း ယေႈၵေႃႉယေႈၶႅပ်း၊ သွႆၶမ်းႁွႆႈၶူႈလင် ယေႈၵေႃႉယေႈဢၼ်တီႈမၼ်းဢေႃႈ။

12ၼင်ႇၼၼ်လႄႈ ထႃႇဝရႃႉၽြႃးယဵင်ႈၶႅၼ်းပၼ်တၢင်းလီဢၼ်ပဵၼ်ၵမ်းလိုၼ်းၼၼ်ႉ လိူဝ်တွၼ်းၼႃႇသေတၢင်းဢၼ် ပၼ်တၢင်းလီဢၼ်ပဵၼ်မႃးယဝ်ႉ မိူဝ်ႈၵမ်းဢွၼ်တၢင်းၼၼ်ႉ တီႈ ယေႃးၽႃႉ လႄႈ မၼ်းၼၼ်ႉမၢၵ်ႈမီးသူဝ်းပႄႉ မိုၼ်ႇပၢႆသီႇႁဵင်၊ ၵလႃးဢုၵ်ႉႁူၵ်းႁဵင်၊ ဝူဝ်းႁဵင်ၵူႈ၊ လီႈမႄႈႁဵင်ၼိုင်ႈဢေႃႈ။-

13လုၵ်ႈၸၢႆးၸဵတ်းၵေႃႉ ဢိၵ်ႇတင်းလုၵ်ႈယိင်းသၢမ်ၵေႃႉၵေႃႈ မၼ်းသမ်ႉလႆႈထႅင်ႈဢေႃႈ။-

14မၼ်းႁွင်ႉႁဵၵ်ႈၸိုဝ်ႈလုၵ်ႈယိင်းလူင်မၼ်း ယေႇမီႇမႃႉ ၊ လုၵ်ႈယိင်းၵၢင်မၼ်း ၵေႇၸီႉ ၊ လုၵ်ႈယိင်းဢွၼ်မၼ်း ၵေႇရိၼ်ႇႁပ်ႉပုၵ်ႉ ဢေႃႈ။-

15ၵႃႈၼႂ်းမိူင်းတင်းမိူင်းၼၼ်ႉ၊ မႄႈယိင်းဢၼ်ႁၢင်ႈလီမိူၼ်ၸိူဝ်ႉၼင်ႇလုၵ်ႈယိင်း ယေႃးၽႃႉ ၸိူဝ်းၼၼ်ႉ ဢမ်ႇမီးသေၵေႃႉသေၵူၼ်း။ ပေႃႈၶဝ်ၽႄဢမူၺ်ႇဢုၵ်ႉၸႃႇမႅင်ႇပၼ်တီႈၶဝ်ၼၼ်ႉ တၢၼ်ႇပဵင်းၵၼ်တင်းပီႈၸၢႆးၼွင်ႉၸၢႆးၶဝ်ၸိူဝ်းၼၼ်ႉဢေႃႈ။

16လိုၼ်းၼၼ်ႉ ယေႃးၽႃႉ ဢသၢၵ်ႈလိပ်းယူႇ ပၢၵ်ႇပၢႆသီႇသိပ်းပီႊလႄႈ လႆႈႁၼ်လုၵ်ႈမၼ်းလၢၼ်မၼ်းလိၼ်မၼ်း တေႃႇထိုင်ႁွတ်ႈသိုပ်ႇၸတုၵ်ႉထႃႉဢေႃႈ။-

17ၼင်ႇၼၼ်လႄႈ မၼ်းမီးတၢင်းဢၼ်ဢသၢၵ်ႈထဝ်ႈၵႄႇယဝ်ႉ ဢိၵ်ႇတင်းတၢင်းဢၼ်ၶိင်ႇၵႃႇလႃႉမိုဝ်ႉဝၼ်းမၼ်းတဵမ်ယဝ်ႉၸေးယဝ်ႉၼၼ်ႉလႄႈ မၼ်းႁွတ်ႈဢၼိၵ်ႈၸႃႉသေဢေႃႈ။ ဝုတ်ႉထူႉယေႃးၽႃႉယဝ်ႉယဝ်ႉဢေႃႈ။

← Chapter 41 Jump to: