Malachi 2

Shan

← Chapter 1 Jump to: Chapter 3 →

1ယိတ်ႈပရေႃးႁဵၵ်ႈၶဝ်ဢိူၺ်း၊ ၵႂၢမ်းပိင်းၺၢပ်ႈၼႆႉ ၸၢပ်ႈသႅင်ႇၵၼ်တင်းသူဢေႃႈ။-

2ၸဝ်ႈပူဝ်ႇပႃႇၵၢင်ႁၢဝ် ထႃႇဝရႃႉၽြႃးမီးဢမိင်ႉၸမ်ႉ၊ ပေႃးသူယင်းဢမ်ႇထွမ်ႇဢမ်ႇဢဝ်၊ ယင်းဢမ်ႇဢဝ်သႂၢင်းသႂ်ႇဝႆႉ ၵႃႈၼႂ်းၸႂ် ႁႂ်ႈလႆႈယွင်ႈယေႃးၼႃႇမႃႉၸိုဝ်ႈသဵင်ၵဝ်လႄႈ ယူႇၸိုင်၊ ၵဝ်တၵ်းပွႆႇၽေး တၢင်းဢၼ်ၵိၼ်ႇဝႃႈၸူး ၵႃႈၼိူဝ်သူလႄႈ ႁႂ်ႈမင်ႇၵလႃႇသူၸိူဝ်းၼၼ်ႉ ပဵၼ်ဢႃႉမင်ႇၵလႃႇ ၵႂႃႇဢေႃႈ။ လိူဝ်သေၼၼ်ႉဢမ်ႇၵႃး၊ ၵွပ်ႈပိူဝ်ႈဢၼ်သူ ယင်းဢမ်ႇဢဝ်သႂၢင်းသႂ်ႇဝႆႉၵႃႈၼႂ်းၸႂ်လႄႈ ယူႇၼၼ်ႉလႄႈ ၵဝ်ႁႂ်ႈပဵၼ်ဢႃႉမင်ႇၵလႃႇၵႂႃႇ ၸႃႉၸဵမ်မိူဝ်ႈလဵဝ်ၼႆႉယဝ်ႉ။-

3တူၺ်းလူး။ ၵဝ်တၵ်းယႃႉၽဵဝ်ႈ ၸိူဝ်ႉၽၼ်းသူပႅတ်ႈလႄႈ ဢဝ်ၶီႈ၊ဢဝ်ဢႃႇ ဢၼ်ဝႃႈၶီႈဢႃႇတရိၵ်ႈသၢၼ်ႇ ပွႆးထမ်ႇမႃႉသူၸိူဝ်းၼၼ်ႉ ပိုၼ်သႂ်ႇၼႃႈ၊ သႂ်ႇတႃသူဢေႃႈ။ သူတၵ်းလႆႈၶၢမ်ႇတၢင်းဢၼ် ဢဝ်ၵႂႃႇလူၺ်ႈၵၼ်တင်းၶီႈ၊တင်းဢႃႇၼၼ်ႉဢေႃႈ။-

4သူတၵ်းလႆႈႁူႉလွင်ႈဢၼ် ၵဝ်ဢဝ်ၵႂၢမ်းပိင်းၺၢပ်ႈၼႆႉ ပၼ်မႃးတီႈသူ ႁႂ်ႈပတီႉၺိၺ်ႇၵဝ် လႆႈတႄႇယူႇတီႈ မဵဝ်း လေႇဝီႉ ဢေႃႈ၊ ဝႃႈၼင်ႇၼႆလႄႈ ၸဝ်ႈပူဝ်ႇပႃႇၵၢင်ႁၢဝ် ထႃႇဝရႃႉၽြႃးမီးဢမိင်ႉဢေႃႈ။-

5ပတီႉၺိၺ်ႇ ဢၼ်ၵဝ်ႁဵတ်းဝႆႉတီႈမဵဝ်းၼၼ်ႉ ပဵၼ်ဢသၢၵ်ႈ ဢိၵ်ႇတင်း တၢင်းဢၼ်ၼိမ်ဢၼ်လီဢေႃႈ။ ၵဝ်ႁဵတ်းဝႆႉ တီႈမဵဝ်းၼၼ်ႉ ႁႂ်ႈမၼ်းလႆႈ မီးတၢင်းဢၼ်ၵူဝ်ဢၼ်ႁႄလႄႈ မၼ်းၼၼ်ႉၵူဝ်ႁႄၵဝ်ယူႇသေလႄႈ တူၵ်းၸႂ် ၵွပ်ႈပိူဝ်ႈၼႃႇမႃႉၸိုဝ်ႈသဵင်ၵဝ်ၼၼ်ႉဢေႃႈ။-

6သဵတ်ႈၸႃႇတြႃး တႄႇယူႇၵႃႈၼႂ်းသူပ်းမၼ်းလႄႈ ဢမ်ႇထူပ်းဢမ်ႇႁၼ်ဢပႅတ်ႈ ၵႃႈၼႂ်းသီႇသူပ်းမၼ်းၼၼ်ႉ။ မၼ်းၵႂႃႇမႃးလူၺ်ႈၵၼ်တင်းၵဝ် ၸွမ်းၵႃႈၼင်ႇတြႃး တၢင်းဢၼ်ၼိမ်ဢၼ်လီ တြႃးတၢင်းဢၼ်သိုဝ်ႈတေႃႇ မီးၼၼ်ႉလႄႈ ၸၢင်ႈႁႂ်ႈၵူၼ်းၼမ်ၼႃႇ ဝႄႈပိူင်ႈသေ ဢပႅတ်ႈတူႉၸရိူၵ်ႈဢေႃႈ။-

7သီႇသူပ်းယိတ်ႈပရေႃးႁဵၵ်ႈၼၼ်ႉ တၵ်းလႆႈပႂ်ႉပိင်ႇၺႃႇလႄႈ ၵူၼ်းတင်းလၢႆ တၵ်းလႆႈဢွၼ်ၵၼ်ႁႃဢဝ်တြႃးၸဝ်ႈတီႈသူပ်းမၼ်း ၼၼ်ႉဢေႃႈ။ လွင်ႈမၼ်းၸမ်ႉ မၼ်းၼၼ်ႉ ပဵၼ်တမၢၼ်ႇ ဢၼ်ၸဝ်ႈပူဝ်ႇပႃႇၵၢင်ႁၢဝ် ထႃႇဝရႃႉၽြႃး ပွႆႇၸႂ်ႉဢေႃႈ။-

8သူၸမ်ႉ၊ ဢွၼ်ၵၼ်ၽိတ်းတၢင်းပိူင်ႈတၢင်းယဝ်ႉ။ သူဢွၼ်ၵၼ်ႁဵတ်းႁႂ်ႈ ၵူၼ်းၼမ်ၼႃႇ တိူဝ်ႉမႅၼ်ႈတြႃးၸဝ်ႈ သေလႄႈလူမ်ႉယဝ်ႉ။ သူဢွၼ်ၵၼ်ယႃႉပတီႉၺိၺ်ႇ ဢၼ်ႁဵတ်းဝႆႉ လူၺ်ႈၵၼ်တင်းမဵဝ်း လေႇဝီႉ ၼၼ်ႉ ပႅတ်ႈယဝ်ႉ၊ ဝႃႈၼင်ႇၼႆလႄႈ ၸဝ်ႈပူဝ်ႇပႃႇၵၢင်ႁၢဝ် ထႃႇဝရႃႉၽြႃးမီးဢမိင်ႉဢေႃႈ။-

9ပိူဝ်ႈၼႆၸင်ႇ၊ ၵွပ်ႈပိူဝ်ႈဢၼ်သူ ဢမ်ႇၸွမ်းသဵၼ်ႈတၢင်းၵဝ်တင်းလၢႆလႄႈ ထွၵ်ႈလူၺ်ႈၼႃႈၵူၼ်း ၼႂ်းဢမူႉတြႃးၼၼ်ႉလႄႈ၊ ၵဝ်ၸီႇယၢင်ႇ ႁႂ်ႈသူပဵၼ်တီႈဢၼ်ပိူၼ်ႈႁဵတ်း ဢမ်ႇပေႃးၼင်ႇႁိုဝ် ဢိၵ်ႇတင်း တီႈဢၼ်ပိူၼ်ႈၶျႃးတူၵ်းတီႈတႅမ်ႇယဝ်ႉ။

10ႁဝ်းတင်းသဵင်ႈတင်းလူင်ၼႆႉ မီးပေႃႈသူႇလဵဝ်ပႃးလဵဝ်ၵူၺ်း ဢမ်ႇၸႂ်ႈႁိုဝ်။ ၽြႃးပဵၼ်ၸဝ်ႈ သူႇလဵဝ်ပႃးလဵဝ်ၵူၺ်းၼၼ်ႉ ၽၢၼ်ႇသၢင်းႁဵတ်းပဵၼ်ႁဝ်း ဢမ်ႇၸႂ်ႈႁိုဝ်။ ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈ ႁဝ်းဢွၼ်ၵၼ် ၶျႃးပတီႉၺိၺ်ႇ ဢၼ်မၼ်းၸဝ်ႈႁဵတ်းဝႆႉ လူၺ်ႈၵၼ်တင်းပူႇႁဝ်းမွၼ်ႇႁဝ်းၸိူဝ်းၼၼ်ႉ တူၵ်းတီႈတႅမ်ႇလႄႈ ၵေႃႉၼိုင်ႈလႄႈၵေႃႉၼိုင်ႈယႃႉ သဵတ်ႈၸႃႇၵၼ်ၼင်ႇႁိုဝ်။-

11မဵဝ်း ယူႉတႃႉ ၼၼ်ႉ သဵတ်ႈၸႃႇလူႉလႄႈ မဵဝ်း ဢီႉသရေႇလႃႉ ဢိၵ်ႇတင်း ဝဵင်း ယေႇရူႉသလႅမ်ႇ ၼၼ်ႉ ႁဵတ်းလွင်ႈတၢင်းဢၼ် လီႁင်ႈဢဵတ်ႇသဵတ်ႇယဝ်ႉ။ မဵဝ်း ယူႉတႃႉ ၼၼ်ႉ ၶျႃးတြႃးတၢင်းဢၼ်မူတ်းၸၢင်ႇ ဢၼ်ထႃႇဝရႃႉၽြႃးႁၵ်ႉၼၼ်ႉ တူၵ်းတီႈတႅမ်ႇလႄႈ သွင်ႇမင်ႇၵလႃႇဢဝ်ၵၼ်တင်း လုၵ်ႈယိင်းၽြႃး ၵူၼ်းတၢင်ႇၸိူဝ်ႉတၢင်ႇၶိူဝ်းလူင်ပႄႇ။-

12ထႃႇဝရႃႉၽြႃးတၵ်းပႄႇတႅပ်း ၵေႃႉဢၼ်ႁဵတ်းၸိူဝ်ႉၼင်ႇၼၼ် ဢၼ်ဝႃႈၵေႃႉဢၼ်ပႂ်ႉ ဢိၵ်ႇတင်း ၵေႃႉဢၼ်ၶိုၼ်းဢိူဝ် တင်းၵေႃႉဢၼ်ဢဝ်ၶိူင်ႈပုၵ်ႈၸေႃႇ မႃးၸူးတီႈၸဝ်ႈပူဝ်ႇပႃႇၵၢင်ႁၢဝ် ထႃႇဝရႃႉၽြႃးၼၼ်ႉ ပႅတ်ႈသေၵႃႈၼႂ်းမူဝ်းၵႃႇ ယႃႇၵုပ်ႈ ၸိူဝ်းၼၼ်ႉဢေႃႈ။-

13လႆႈသမ်ႉ လွင်ႈတၢင်းဢၼ်သူသမ်ႉ ႁဵတ်းထႅင်ႈၸမ်ႉ၊ သူဢွၼ်ၵၼ်ဢဝ်တၢင်းဢၼ် ၼမ်ႉတႃတူၵ်း၊ တၢင်းဢၼ်ႁႆႈႁွင်ႉ ပွင်ႉၶၢင်းၼၼ်ႉသေလႄႈ ႁူမ်ႇသုမ်ႇယိတ်ႈပလၢင်ႇ ထႃႇဝရႃႉၽြႃးယဝ်ႉ။ ပိူဝ်ႈၼႆလႄႈ မၼ်းၸဝ်ႈဢမ်ႇမၢတ်ႈ ၶိူင်ႈပုၵ်ႈၸေႃႇထႅင်ႈလႄႈ ဢမ်ႇမီးတၢင်းဢၼ်ထုၵ်ႇၸႂ်ၵျိူၵ်ႈၸႂ် ၶၢမ်ႇဢဝ်တီႈမိုဝ်းသူၼၼ်ႉ။-

14ၵူၺ်းၵႃႈ သူထၢမ်လႄႈဝႃႈ၊ ပဵၼ်ၵွပ်ႈပိူဝ်ႈၸိူဝ်ႉၼင်ႇႁိုဝ်။ ဝႃႈၼင်ႇၼႆဢေႃႈ။ ပဵၼ်ၵွပ်ႈပိူဝ်ႈဢၼ် ထႃႇဝရႃႉၽြႃးပဵၼ်သၢၵ်ႈသေႇ ယူႇၵႄႈဝူင်ႈၵၢင်မႂ်း တင်းမေးမႂ်းဢၼ်မႂ်းသွင်ႇမင်ႇၵလႃႇဢဝ်ၵၼ်တင်းမႂ်း ၼႂ်းမိူဝ်ႈဢၼ် မႂ်းယင်းလဵၵ်ႉယင်းၼုမ်ႇၼၼ်ႉလႄႈ ပိၵ်ႉသမ်ႉမၼ်းပဵၼ်ၵေႃႉသေႈမႂ်း၊ မေးမႂ်းဢၼ်ၸၢပ်ႈသႅင်ႇၵၼ်တင်း ပတီႉၺိၺ်ႇ ဢၼ်မႂ်းႁဵတ်းဝႆႉၼၼ်ႉသေၵေႃႈ မႂ်းယင်းဢမ်ႇပႂ်ႉသဵတ်ႈၸႃႇလႄႈ ၽိတ်းပိူင်ႈၼၼ်ႉဢေႃႈ။-

15မၼ်းၸဝ်ႈၽၢၼ်ႇသၢင်းႁဵတ်းပဵၼ် ၵေႃႉလဵဝ်ၵူၺ်းဢမ်ႇၸႂ်ႈႁိုဝ်။ ၼႂ်းဝႃႈၼၼ် သေၵေႃႈ၊ တီႈမၼ်းၸဝ်ႈၼၼ်ႉ မီးဝီႉၺိၺ်ႇၸဝ်ႈ ဢၼ်ယင်းၵိုတ်းယင်းၵျၢၼ်ႇယူႇဢေႃႈ။ ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈ ၽၢၼ်ႇသၢင်းႁဵတ်းပဵၼ်ၵေႃႉလဵဝ်ၵူၺ်း ၼင်ႇႁိုဝ်။ ဝႃႈၼႆၸမ်ႉ၊ မၼ်းၸဝ်ႈႁႃမဵဝ်းဢၼ် ထိူၵ်ႈတၢၼ်ႇၵၼ်တင်းၽြႃးပဵၼ်ၸဝ်ႈ ဢေႃႈ။ ပိူဝ်ႈၼႆလႄႈ ဢွၼ်ၵၼ်ၶျုၵ်ႈလဵင်ႉၸႂ်သၽေႃးသူဝႆႉတႃႉ။ ယႃႇပေဢွၼ်ၵၼ်ယႃႉသဵတ်ႈၸႃႇမေးဢၼ်သွင်ႇမင်ႇၵလႃႇ ဢဝ်ၵၼ်တင်းမႂ်း ၼႂ်းမိူဝ်ႈဢၼ် မႂ်းယင်းလဵၵ်ႉယင်းၼုမ်ႇၼၼ်ႉသေလႄႈ ၽိတ်းပိူင်ႈ။-

16ၵဝ်ၸင်းဢမူႉ တၢင်းဢၼ်ပႅတ်ႈမေး၊ ဝႃႈၼင်ႇၼႆလႄႈ ထႃႇဝရႃႉၽြႃး ၽြႃးပဵၼ်ၸဝ်ႈမဵဝ်း ဢီႉသရေႇလႃႉ မီးဢမိင်ႉဢေႃႈ။ ၵဝ်ၸင်းၵေႃႉဢၼ် ဢဝ်တၢင်းဢၼ်ႁဵတ်းဢႃႉထမ်ႇမႃႉ ႁူမ်ႇသုမ်ႇၶူဝ်းၼုင်ႈမၼ်းဝႆႉၼၼ်ႉဢေႃႈ၊ ဝႃႈၼင်ႇၼႆလႄႈ ၸဝ်ႈပူဝ်ႇပႃႇၵၢင်ႁၢဝ် ထႃႇဝရႃႉၽြႃးမီးဢမိင်ႉဢေႃႈ။ ပိူဝ်ႈၼႆလႄႈ ဢွၼ်ၵၼ်ၶျုၵ်ႈလဵင်ႉၸႂ်သၽေႃးသူဝႆႉတႃႉ။ ယႃႇပေဢွၼ်ၵၼ်ယႃႉသဵတ်ႈၸႃႇ။

17သူၼႆႉ ဢွၼ်ၵၼ်သူပ်းၼမ်ၵႂၢမ်းၼမ် တေႃႇထိုင်ႁွတ်ႈထၼ်ႈပေႃး ႁူထႃႇဝရႃႉၽြႃး လၵ်ႉလႆႈဢေႃႈ။ ၵူၺ်းၵႃႈ သူထၢမ်လႄႈဝႃႈ၊ ႁဝ်းႁဵတ်းမႅၼ်ႈ တေႃႇထိုင်ႁွတ်ႈထၼ်ႈပေႃး ႁႂ်ႈႁူမၼ်းၸဝ်ႈ လၵ်ႉလႆႈၼၼ်ႉ ၸိူဝ်ႉၼင်ႇႁိုဝ်။ ဝႃႈၼင်ႇၼႆဢေႃႈ။ ပဵၼ်လွင်ႈတၢင်းဢၼ် သူၸၢင်ႈဢွၼ်ၵၼ် လၢတ်ႈလႄႈဝႃႈ၊ ၵႃႈပဵၼ်ၵေႃႉဢၼ်ႁဵတ်းတူႉၸရိူၵ်ႈၼၼ်ႉ ပဵၼ်ဢၼ်လီဢၼ်ငၢမ်း ၵႃႈတီႈၽၢႆႇၼႃႈထႃႇဝရႃႉၽြႃးလႄႈ၊ မၼ်းၸဝ်ႈထုၵ်ႇၸႂ်ၵျိူၵ်ႈၸႂ်ၵူၼ်း ၸိူဝ်ႉၼင်ႇၼၼ်ယဝ်ႉ၊ ဝႃႈၼင်ႇၼႆလႄႈ သမ်ႉလၢတ်ႈလႄႈဝႃႈ၊ ၽြႃးပဵၼ်ၸဝ်ႈ ဢၼ်ၸႅတ်ႈထၢမ်ၸီႇယၢင်ႇၼၼ်ႉၸမ်ႉ၊ မီးၵႃႈလႂ်၊ ဝႃႈၼင်ႇၼႆၼၼ်ႉလူင်ပႄႇ။

← Chapter 1 Jump to: Chapter 3 →