Ruth 1

Shan

Jump to: Chapter 2 →

1ၶိင်ႇၵႃႇလႃႉမိူဝ်ႈဢၼ်ၵူၼ်းလူင်ဢၼ်ၸီႇယၢင်ႇတြႃးတင်းလၢႆ ဢုပ်ႉပိူင်ႇဝၢၼ်ႈမိူင်းယူႇၼၼ်ႉၸိုင်၊ မီးတၢင်းဢၼ်ၶဝ်ႈၵႃႈမၢၵ်ႇပႅင်းၵႃႈၼႂ်းမိူင်းၼၼ်ႉလႄႈ ၵူၼ်းဝဵင်း ပႅတ်ႉလႁႅမ်ႇ မိူင်း ယူႉတႃႉ ၵေႃႉၼိုင်ႈ ပႃးဢဝ်မေးမၼ်းဢိၵ်ႇတင်းလုၵ်ႈၸၢႆးမၼ်းသွင်ၵေႃႉသေလႄႈ ၵႂႃႇႁႂ်ႈလႆႈသွၼ်ႈပိုင်ႈၵႃႈတီႈမိူင်း မေႃႇၽႃႉ ဢေႃႈ။-

2ၸိုဝ်ႈသဵင်ၵေႃႉၼၼ်ႉၸမ်ႉ၊ ပဵၼ် ဢေးလီႉမလႅၵ်ႉ ၊ ၸိုဝ်ႈသဵင်မေးမၼ်းၸမ်ႉ၊ ပဵၼ် ၼေႃးမီႉ ၊ ၸိုဝ်ႈသဵင်လုၵ်ႈၸၢႆးမၼ်းသွင်ၵေႃႉၼၼ်ႉၸမ်ႉ၊ ပဵၼ် မႁႃႇလုၼ်ႇ တင်း ၶီႉလျုၼ်ႇ ဢေႃႈ။ ၶဝ်ၼၼ်ႉပဵၼ်ၵူၼ်း ဢေႇၽရတ်ႉ ၊ ဝဵင်း ပႅတ်ႉလႁႅမ်ႇ မိူင်း ယူႉတႃႉ လႄႈ ၵႂႃႇၵႃႈတီႈမိူင်း မေႃႇၽႃႉ သေလႄႈ ယူႇၵႃႈတီႈၼၼ်ႈဢေႃႈ။-

3ဢေးလီႉမလႅၵ်ႉ ၽူဝ် ၼေႃးမီႉ ၼၼ်ႉတၢႆလႄႈ မၼ်းဢိၵ်ႇတင်းလုၵ်ႈၸၢႆးမၼ်းသွင်ၵေႃႉၼၼ်ႉ ၵိုတ်းၵျၢၼ်ႇဝႆႉဢေႃႈ။-

4သွင်ၶႃၼၼ်ႉ ႁဵတ်းတၢင်းဢၼ်ပဵၼ်ႁိူၼ်းပဵၼ်ယေးလူၺ်ႈၵၼ်တင်းမႄႈယိင်းမိူင်း မေႃႇၽႃႉ ၼၼ်ႉလႄႈ ၵေႃႉၼိုင်ႈၸမ်ႉ၊ လႆႈၸိုဝ်ႈ ဢေႃးရပႃႉ ၊ ၵေႃႉၼိုင်ႈၸမ်ႉ၊ လႆႈၸိုဝ်ႈ ရူႉထႃႉ လႄႈ ၶဝ်ယူႇၵႃႈတီႈမိူင်းၼၼ်ႉသေသိပ်းပီႊၼိုင်ႈသေယဝ်ႉ၊-

5မႁႃႇလုၼ်ႇ ဢိၵ်ႇတင်း ၶီႉလျုၼ်ႇ ၸိူဝ်းၼၼ်ႉတၢႆလႄႈ ၼေႃးမီႉ ၼၼ်ႉယင်းဢမ်ႇမီးလုၵ်ႈၸၢႆး၊ ဢမ်ႇမီးၽူဝ်လႄႈ ၵိုတ်းၵျၢၼ်ႇဝႆႉဢေႃႈ။

6မၼ်းၸင်ႇလုၵ်ႉ ဢိၵ်ႇလူၺ်ႈၵၼ်တင်းလုၵ်ႈပႂ်ႉမၼ်းသွင်ၵေႃႉ ႁႂ်ႈလႆႈဢွၵ်ႇသေၵႃႈၼႂ်းမိူင်း မေႃႇၽႃႉ ၶိုၼ်းမိူဝ်းၵႂႃႇဢေႃႈ။ လွင်ႈမၼ်းၸမ်ႉ မၼ်းယူႇၵႃႈၼႂ်းမိူင်း မေႃႇၽႃႉ သေလႄႈ လႆႈငိၼ်းလွင်ႈဢၼ်ထႃႇဝရႃႉၽြႃး မႃးလူမႃးတူၺ်းၵူၼ်းမၼ်းၸဝ်ႈတင်းလၢႆလႄႈ ဢဵတ်းလူပၼ်ၶဝ်ႈမုၼ်းၼၼ်ႉဢေႃႈ။-

7မၼ်းဢွၵ်ႇသေၵႃႈတီႈဢၼ်မၼ်းသွၼ်ႈပိုင်ႈယူႇၼၼ်ႉႁူမ်ႈလူၺ်ႈၵၼ်တင်းလုၵ်ႈပႂ်ႉမၼ်းသွင်ၵေႃႉၼၼ်ႉသေယဝ်ႉ၊ ၶဝ်ၼၼ်ႉ ၵႂႃႇတၢင်းပႆတၢင်းႁႂ်ႈလႆႈၶိုၼ်းမိူဝ်းၸူးၵႃႈတီႈမိူင်း ယူႉတႃႉ ဢေႃႈ။-

8ၼေႃးမီႉ ၼၼ်ႉလၢတ်ႈတီႈလုၵ်ႈပႂ်ႉမၼ်းသွင်ၵေႃႉၼၼ်ႉလႄႈဝႃႈ၊ သွင်ၶိူဝ်ၵႂႃႇလႄႈ ၶိုၼ်းမိူဝ်းၸူးၵႃႈတီႈႁိူၼ်းမႄႈသွင်ၶိူဝ် ႁင်းၽႂ်ႁင်းမၼ်းတႃႉ။ ႁႂ်ႈထႃႇဝရႃႉၽြႃး ႁဵတ်းၵျေးၸူးတီႈသွင်ၶိူဝ် မိူၼ်ၸိူဝ်ႉၼင်ႇဢၼ်သွင်ၶိူဝ်ႁဵတ်းၵျေးၸူးတီႈၶဝ်ၸိူဝ်းဢၼ်တၢႆၵႂႃႇယဝ်ႉ ဢိၵ်ႇတင်းတီႈၵဝ်ၼႆႉၼၼ်ႉသေၵမ်းလူၺ်ႈ။-

9ႁႂ်ႈထႃႇဝရႃႉၽြႃး ဢဵတ်းလူပၼ်ဢၶႂၢင်ႉ ႁႂ်ႈသွင်ၶိူဝ်လႆႈယူႇၵတ်းယဵၼ်ၶျၢမ်းသႃႇ ၵႃႈၼႂ်းႁိူၼ်းၽူဝ်သွင်ၶိူဝ်ႁင်းၽႂ်ႁင်းမၼ်းၼၼ်ႉသေၵမ်းလူၺ်ႈ၊ ဝႃႈၼင်ႇၼႆယူႇသေလႄႈ ၼူမ်သွင်ၶႃဢေႃႈ။ သွင်ၶႃၵေႃႈ ၵိဝ်သဵင်လႄႈႁွင်ႉႁႆႈယူႇသေလႄႈ လၢတ်ႈတီႈမၼ်းလႄႈဝႃႈ၊-

10ဢမ်ႇၸႂ်ႈၶႃႈၵူၺ်ႉ၊ ႁဝ်းၶႃႈတၵ်းၸွမ်းၵၼ်တင်းၸဝ်ႈႁဝ်း မိူဝ်းၵႂႃႇၸူးၵႃႈတီႈပီႈၼွင်ႉၸိူဝ်ႉၶိူဝ်းၸဝ်ႈႁဝ်းၼၼ်ႉဢမၢၼ်ႇၶၼ်ပဵၼ်ၶႃႈဢေႃႈ၊ ဝႃႈၼင်ႇၼႆဢေႃႈ။-

11ၼေႃးမီႉ ၵေႃႈလၢတ်ႈလႄႈဝႃႈ၊ လုၵ်ႈယိင်းၵဝ်ၶဝ်ဢိူၺ်း၊ ၶိုၼ်းမိူဝ်းၵႂႃႇတႃႉ။ ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈ တၵ်းလႆႈၸွမ်းလူၺ်ႈၵၼ်တင်းၵဝ်ၵႂႃႇၼင်ႇႁိုဝ်။ ၵဝ်ယင်းမီးလုၵ်ႈၸၢႆးယူႇၵႃႈၼႂ်းတွင်ႉၵဝ်ၼႆႉ ပုၼ်ႈဢၼ်တၵ်းပဵၼ်ၽူဝ်သွင်ၶိူဝ်လူးၵွၼ်ႇႁိုဝ်။-

12လုၵ်ႈယိင်းၵဝ်ၶဝ်ဢိူၺ်း၊ ဝၢႆႇၶိုၼ်းလႄႈမိူဝ်းၵႂႃႇတႃႉ။ ၵဝ်ၼႆႉဢသၢၵ်ႈဢရွႆႇယႂ်ႇယဝ်ႉလႄႈ ဢမ်ႇထုၵ်ႇယူႇလူၺ်ႈၵၼ်တင်းၽူဝ်။ ဢမ်ႇၼၼ် ပေႃးၵဝ်လၢတ်ႈလႄႈဝႃႈ၊ ၵဝ်မီးတီႈဢၼ်တၵ်းမုင်ႈထႃႈမွင်းထႃႈယူႇဢေႃႈ၊ ဝႃႈၼင်ႇၼႆလႄႈ၊ ပေႃးၵဝ်ဢဝ်ၽူဝ်ၶိုၼ်းၼႆႉလႄႈ ၵိူတ်ႇလဵင်ႉလုၵ်ႈၸၢႆးတင်းလၢႆမႃးၸိုင်၊-

13သွင်ၶိူဝ်တၵ်းပႂ်ႉထႃႈယူႇတေႃႇထိုင်ႁွတ်ႈၶဝ်ၼၼ်ႉထၼ်ႈပေႃးယႂ်ႇမႃးၼၼ်ႉလူးၵွၼ်ႇႁိုဝ်။ ယင်းဢမ်ႇဢဝ်ၽူဝ်လႄႈ တၵ်းမုင်ႈထႃႈမွင်းထႃႈၶဝ်ၼၼ်ႉယူႇႁိုဝ်။ လုၵ်ႈယိင်းၵဝ်ၶဝ်ဢိူၺ်း၊ ဢမ်ႇလႆႈပဵၼ်ၸိူဝ်ႉၼင်ႇၼၼ်။ တီႈၵဝ်ၼႆႉပဵၼ်ဢၼ်ယၢပ်ႇၸႂ်ၶူမ်ၸႂ်ၼႃႇသေတီႈသူဢေႃႈ။ လွင်ႈမၼ်းၸမ်ႉ မိုဝ်းထႃႇဝရႃႉၽြႃးၶႂၢင်ယူႇၵႃႈတီႈၵဝ်ယဝ်ႉ၊ မိူဝ်ႈဢၼ်ဝႃႈၼင်ႇၼႆၸိုင်၊-

14သွင်ၶႃၼၼ်ႉသမ်ႉၵိဝ်သဵင်သေလႄႈ ႁွင်ႉႁႆႈထႅင်ႈဢေႃႈ။ မိူဝ်ႈၼၼ်ႉ ဢေႃးရပႃႉ ၼူမ်မႄႈၸဝ်ႈမၼ်းသေဢေႃႈ။ ရူႉထႃႉ ၸမ်ႉ၊ ယင်းႁွႆႈၸပ်းယူႇၵႃႈတီႈမႄႈၸဝ်ႈမၼ်းဢေႃႈ။-

15ၼေႃးမီႉ ၵေႃႈလၢတ်ႈလႄႈဝႃႈ၊ တူၺ်းလူး၊ ပီႈလူဝ်းမႂ်းၼၼ်ႉ ၶိုၼ်းမိူဝ်းၵႂႃႇၸူးၵႃႈတီႈပီႈၼွင်ႉၸိူဝ်ႉၶိူဝ်းဢွၵ်ႇမၼ်း ဢိၵ်ႇတင်းၽြႃးဢွၵ်ႇမၼ်းယဝ်ႉ။ ၸွမ်းလင်ပီႈလူဝ်းမႂ်းၼၼ်ႉမိူဝ်းၵႂႃႇသေၵမ်း၊ မိူဝ်ႈဢၼ်ဝႃႈၼင်ႇၼႆၸိုင်၊-

16ရူႉထႃႉ ၶိုၼ်းလၢတ်ႈလႄႈဝႃႈ၊ ၵဝ်ၶႃႈၼႆႉၸိုင် ယႃႇပေတွင်းပၢၼ်ႇႁႂ်ႈလႆႈၸုၼ်ႉပႅတ်ႈၸဝ်ႈႁဝ်းသေလႄႈ ႁဵတ်းႁႂ်ႈဢမ်ႇလႆႈၸွမ်းလင်ၸဝ်ႈႁဝ်းလႄႈ ၶိုၼ်းမိူဝ်းၵႂႃႇသေၵမ်း။ ၵဝ်ၶႃႈတၵ်းၸွမ်းၵႂႃႇၵႃႈတီႈၵႃႈဢၼ်ၸဝ်ႈႁဝ်းၵႂႃႇၼၼ်ႉၶႃႈဢေႃႈ။ ၵဝ်ၶႃႈတၵ်းၼွၼ်းၵႃႈတီႈၵႃႈဢၼ်ၸဝ်ႈႁဝ်းၼွၼ်းၶႃႈဢေႃႈ။ မဵဝ်းၸဝ်ႈႁဝ်းၼၼ်ႉတၵ်းပဵၼ်မဵဝ်းၵဝ်ၶႃႈ၊ ၽြႃးၸဝ်ႈႁဝ်းၼၼ်ႉ တၵ်းပဵၼ်ၽြႃးၵဝ်ၶႃႈၶႃႈဢေႃႈ။-

17ၵဝ်ၶႃႈတၵ်းတၢႆၵႃႈတီႈဢၼ်ၸဝ်ႈႁဝ်းတၢႆၼၼ်ႉလႄႈ ၶၢမ်ႇတၢင်းဢၼ်သၢင်းၵျူဝ်ႇၵႃႈတီႈၼၼ်ႈၶႃႈဢေႃႈ။ ၼွၵ်ႈသေတၢင်းတၢႆၼၼ်ႉ ပေႃးၵဝ်ၶႃႈၽၢတ်ႇယၢၼ်ၵၼ်တင်းၸဝ်ႈႁဝ်း ၵွပ်ႈပိူဝ်ႈဢမူႉတၢင်ႇၸိူဝ်ႉတၢင်ႇဢၼ်ၸိုင်၊ ႁႂ်ႈထႃႇဝရႃႉၽြႃး ႁဵတ်းလိူဝ်တွၼ်းသေၼၼ်ႉတီႈၵဝ်ၶႃႈသေၵမ်းလူၺ်ႈ၊ ဝႃႈၼင်ႇၼႆဢေႃႈ။-

18မိူဝ်ႈဢၼ်မၼ်းႁူႉႁၼ်လွင်ႈဢၼ်မၼ်းၼၼ်ႉ မီးၸႂ်ဢၼ်မၼ်ႈၶိူင်ႇႁႂ်ႈလႆႈၸွမ်းလူၺ်ႈၵၼ်တင်းမၼ်းၼၼ်ႉၸိုင်၊ မၼ်းယူႇတဵတ်ႇတဵတ်ႇယူႇသေဢေႃႈ။

19ၼင်ႇၼၼ်လႄႈ သွင်ၶႃၼၼ်ႉဢွၼ်ၵၼ်ၵႂႃႇတေႃႇထိုင်ႁွတ်ႈၵႃႈတီႈဝဵင်း ပႅတ်ႉလႁႅမ်ႇ ဢေႃႈ။ မိူဝ်ႈဢၼ်သွင်ၶႃ ႁွတ်ႈထိုင်ၵႃႈတီႈဝဵင်း ပႅတ်ႉလႁႅမ်ႇ ၼၼ်ႉၸိုင်၊ တင်းဝဵင်းဢူၼ်ဢဵၼ်ႁူၼ်ႈမေႃးၵၼ် လူၺ်ႈလွင်ႈသွင်ၶႃလႄႈ လၢတ်ႈၵၼ်ထၢမ်ၵၼ်လႄႈဝႃႈ၊ ၵေႃႉၼႆႉၸမ်ႉ၊ ပဵၼ် ၼေႃးမီႉ ဢမ်ႇၸႂ်ႈႁိုဝ်။ ဝႃႈၼင်ႇၼႆဢေႃႈ။-

20မၼ်းၵေႃႈၶိုၼ်းလၢတ်ႈတီႈၶဝ်လႄႈဝႃႈ၊ ယႃႇပေႁွင်ႉၵဝ်ၶႃႈလႄႈဝႃႈ ၼေႃးမီႉ သေၵမ်း။ ႁွင်ႉဝႃႈ မႃႇရႃႉ သေၵမ်း။ ၸဝ်ႈမႁႃႇတၼ်းၶူဝ်းၼၼ်ႉ ႁဵတ်းလွင်ႈတၢင်းဢၼ်ၶူမ်ၼႃႇလူင်လၢင်ၼၼ်ႉတီႈၵဝ်ၶႃႈယဝ်ႉ။-

21ၵဝ်ၶႃႈပျေႉၸုမ်ႇလိူင်ႇၸႂ်ယူႇသေလႄႈဢွၵ်ႇၵႂႃႇဢေႃႈ။ မိူဝ်ႈလဵဝ်ၼႆႉၸမ်ႉ၊ ၸုတ်ႈလုတ်ႈယၢၵ်ႈၽၢၼ်ယူႇသေလႄႈ မီးတူဝ်လဵဝ်ၵူၺ်းသေယဝ်ႉ၊ ထႃႇဝရႃႉၽြႃးၸင်ႇဢဝ်ၵဝ်ၶႃႈၶိုၼ်းသူင်ႇယဝ်ႉ။ ၵွပ်ႈပိူဝ်ႈဢၼ်ထႃႇဝရႃႉၽြႃးၶၢမ်ႇသၢၵ်ႈသေႇၽၢႆႇၼိုင်ႈ တင်းၵဝ်ၶႃႈလႄႈ ၸဝ်ႈဢၼၼ်ႇတႃႉတၼ်းၶူဝ်း ႁႂ်ႈၵဝ်ၶႃႈမီးတုၵ်ႉၶႃႉတၢင်းၽၢၼ်ၼၼ်ႉယဝ်ႉလႄႈ၊ ႁဵတ်းႁိုဝ်လႄႈသူၸဝ်ႈယင်းႁွင်ႉႁဵၵ်ႈၵဝ်ၶႃႈၸိုဝ်ႈ ၼေႃးမီႉ ယူႇၼင်ႇႁိုဝ်။ ဝႃႈၼင်ႇၼႆဢေႃႈ။-

22ၼင်ႇၼၼ်လႄႈ ၼေႃးမီႉ ဢိၵ်ႇတင်းလုၵ်ႈပႂ်ႉမၼ်း ရူႉထႃႉ မႄႈယိင်းမိူင်း မေႃႇၽႃႉ ဢၼ်လုၵ်ႉသေၵႃႈတီႈမိူင်း မေႃႇၽႃႉ ၸွမ်းမႃးလူၺ်ႈၵၼ်တင်းမၼ်းၼၼ်ႉ ၶိုၼ်းမႃးလႄႈႁွတ်ႈထိုင် ၵႃႈတီႈဝဵင်း ပႅတ်ႉလႁႅမ်ႇ ၼႂ်းၶိင်ႇဢၼ်ၸႃႉပၢတ်ႇၶဝ်ႈမူႉယေႃးၼၼ်ႉဢေႃႈ။

Jump to: Chapter 2 →