Ruth 3

Shan

← Chapter 2 Jump to: Chapter 4 →

1မိူဝ်ႈၼၼ်ႉ မႄႈၸဝ်ႈမၼ်း ၼေႃးမီႉ ၼၼ်ႉ ထၢမ်တီႈမၼ်းလႄႈဝႃႈ၊ လုၵ်ႈယိင်းၵဝ်ဢိူၺ်း၊ လွင်ႈၼင်ႇႁိုဝ်မႂ်းတၵ်းလႆႈၵတ်းယဵၼ်ၶျၢမ်းသႃႇၸိုင်၊ ၵဝ်ဢမ်ႇလႆႈႁႃတီႈဢၼ်ၼိမ်ဢၼ်လီပုၼ်ႈမႂ်းႁိုဝ်။-

2ပေႃးၸႃႉ ၸဝ်ႈၶႃႈမႄႈယိင်း ဢၼ်မႂ်းႁဵတ်းၵေႃႉႁဵတ်းသေႈၸိူဝ်းၼၼ်ႉၼၼ်ႉ ပဵၼ်ပီႈပဵၼ်ၼွင်ႉႁဝ်းဢမ်ႇၸႂ်ႈႁိုဝ်။ တူၺ်းလူး၊ ၶိုၼ်းၼႆႉ မၼ်းလၢင်ၶဝ်ႈမူႉယေႃးယူႇၵႃႈတီႈတလၢင်းယဵပ်ႇၶဝ်ႈဢေႃႈ။-

3မႂ်းဢၢပ်ႇၼမ်ႉသေလႄႈ ဢဝ်ၼမ်ႉမၼ်းတႃးလႄႈ ၼုင်ႈၶူဝ်းႁၢင်ႈၶိူင်ႈသေယဝ်ႉ၊ လူင်းၸူးၵႃႈတီႈတလၢင်းယဵပ်ႇၶဝ်ႈၼၼ်ႉတႃႉ။ ၸူဝ်ႈဢၼ်မၼ်းဢမ်ႇပႆႇၵိၼ်ပႆႇၶူပ်းယဝ်ႉၼၼ်ႉၸိုင်၊ ယႃႇပေၼႄပျႃးတူဝ်ၸဝ်ႈၵဝ်ႇတီႈမၼ်းလႃးလႃး။-

4မိူဝ်ႈဢၼ်မၼ်းၼွၼ်းၼၼ်ႉၸိုင်၊ မၢတ်ႈတွင်းတီႈဢၼ်မၼ်းၼွၼ်းၼၼ်ႉသေလႄႈ ၶဝ်ႈၵႂႃႇလႄႈၽုၺ်ႇပိုတ်ႇၶူဝ်းလဵင်း ဢၼ်ႁူမ်ႇတိၼ်မၼ်းၼၼ်ႉသေယဝ်ႉ၊ ၼွၼ်းတႃႉ။ မၼ်းတၵ်းလၢတ်ႈလွင်ႈဢၼ်မႂ်းတၵ်းလႆႈႁဵတ်းၸိူဝ်ႉၼင်ႇႁိုဝ်ၼၼ်ႉတီႈမႂ်းဢေႃႈ၊ မိူဝ်ႈဢၼ်ဝႃႈၼင်ႇၼႆၸိုင်၊-

5မၼ်းႁပ်ႉတုင်းဢဝ်လႄႈဝႃႈ၊ ၵဝ်ၶႃႈတၵ်းႁဵတ်းၸွမ်းၵႃႈဢၼ်မႄႈႁဝ်းသင်ႇလၢတ်ႈဝႆႉၼၼ်ႉၶႃႈဢေႃႈ၊ ဝႃႈၼင်ႇၼႆသေလႄႈ၊-

6လူင်းၸူးၵႃႈတီႈတလၢင်းယဵပ်ႇၶဝ်ႈၼၼ်ႉလႄႈ ႁဵတ်းၸွမ်းၵႃႈၼင်ႇဢၼ်မႄႈၸဝ်ႈမၼ်းသင်ႇလၢတ်ႈဝႆႉၼၼ်ႉဢေႃႈ။-

7မိူဝ်ႈဢၼ် ပေႃးၸႃႉ ၼၼ်ႉၵိၼ်ၶူပ်းလႄႈ သႂၢင်ႇၸႂ်သိူဝ်းၸႂ်ယူႇသေလႄႈ ၵႂႃႇၼွၼ်းၵႃႈတီႈႁိမ်းတီႈသုတ်းၵွင်ၶဝ်ႈၼၼ်ႉယဝ်ႉၼၼ်ႉၸိုင်၊ မၼ်းတဵတ်ႇတဵတ်ႇသုတ်ႉၸပ်းသုတ်ႉၸူးလႄႈ ၽုၺ်ႇပိုတ်ႇၶူဝ်းလဵင်းဢၼ်ႁူမ်ႇတိၼ်မၼ်းၼၼ်ႉသေယဝ်ႉ၊ ၼွၼ်းဢေႃႈ။-

8ၶိင်ႇတဵင်ႈၶိုၼ်း ၵူၼ်းၸၢႆးၼၼ်ႉတူၵ်းၸႂ်လႄႈဝၢႆႇၸူးသေယဝ်ႉ၊ ႁူႉလွင်ႈဢၼ်မႄႈယိင်းမီးၵႃႈတီႈပၢႆတိၼ်မၼ်းၼၼ်ႉယူႇသေလႄႈ၊-

9ထၢမ်လႄႈဝႃႈ၊ မႂ်းပဵၼ်ၽူႈလႂ်ဝႃႈၼင်ႇၼႆသေယဝ်ႉ၊ မၼ်းလၢတ်ႈလႄႈဝႃႈ၊ ၶႃႈၸဝ်ႈပဵၼ် ရူႉထႃႉ ၊ မႄႈယိင်းၶႃႈၸဝ်ႈႁဝ်းၶႃႈဢေႃႈ။ ၶႅၼ်းတေႃႈဢဝ်ႁိမ်းၸဵင်ႇလႅမ်ၶူဝ်းလဵင်းၸဝ်ႈႁဝ်းႁူမ်ႇၶႃႈၸဝ်ႈႁဝ်းသေၵမ်းၶႃႈ။ လွင်ႈမၼ်းၸမ်ႉ ၸဝ်ႈႁဝ်းပဵၼ်ၵေႃႉဢၼ်ပိူင်ႇထုတ်ႇဢဝ်ၶႃႈဢေႃႈ၊ မိူဝ်ႈဢၼ်ဝႃႈၼင်ႇၼႆၸိုင်၊-

10မၼ်းၼၼ်ႉလၢတ်ႈလႄႈဝႃႈ၊ လုၵ်ႈယိင်းၵဝ်ဢိူၺ်း၊ ႁႂ်ႈထႃႇဝရႃႉၽြႃးပၼ်တၢင်းလီတီႈမႂ်းသေၵမ်းလူၺ်ႈ။ မႂ်းယင်းဢမ်ႇၸွမ်းလင် ၽူႈမၢဝ်ႇဢၼ်ယၢၵ်ႈဢၼ်ၽၢၼ်၊ ၽူႈမၢဝ်ႇဢၼ်ၸၢင်ႈမၢၵ်ႈၸၢင်ႈမီးသေၵေႃႉသေၵူၼ်းလႄႈ ၵျေးၸူးဢၼ်မႂ်းႁဵတ်းၵမ်းလိုၼ်းၼႆႉ ယဵင်ႈၶႅၼ်းယႂ်ႇၼႃႇသေ ၵျေးၸူးဢၼ်မႂ်းႁဵတ်း ၵမ်းဢွၼ်တၢင်းၼၼ်ႉဢေႃႈ။-

11တေႃႈလဵဝ်ၼႆႉယႃႇပေမႆႈၸႂ်။ လုၵ်ႈယိင်းၵဝ်ဢိူၺ်း၊ ၵဝ်တၵ်းႁဵတ်းၸွမ်းၵႃႈဢၼ်မႂ်းယွၼ်းၼၼ်ႉဢေႃႈ။ ဝဵင်းဢၼ်ၵူၼ်းမဵဝ်းၵဝ်ယူႇၼႆႉတင်းဝဵင်း ႁူႉလွင်ႈဢၼ်မႂ်းပဵၼ်မႄႈယိင်းဢၼ်ပျေႉၸုမ်ႇဝႆႉတင်းသီႇလႃႉၼၼ်ႉယူႇဢေႃႈ။-

12ၵဝ်ၼႆႉပဵၼ်ၵေႃႉဢၼ်ပိူင်ႇထုတ်ႇဢဝ်ၸႂ်ႈတႄႉတႄႉဢေႃႈ။ ၵူၺ်းၵႃႈ ၵေႃႉဢၼ်ပိူင်ႇထုတ်ႇဢဝ်ဢၼ်ယဵင်ႈၶႅၼ်းၸမ်ၼႃႇသေၵဝ်ၼႆႉၼၼ်ႉ ယင်းမီးယူႇၵေႃႉၼိုင်ႈလူးၵွၼ်ႇဢေႃႈ။-

13ၶိုၼ်းၼႆႉၸိုင် သဝ်းလူးၵွၼ်ႇတႃႉ။ ပေႃးမၼ်းၼၼ်ႉၶႂ်ႈႁဵတ်းဝၢတ်ႈ ၵေႃႉဢၼ်ပိူင်ႇထုတ်ႇဢဝ်ၸိုင်လီယဝ်ႉ။ ႁႂ်ႈမၼ်းႁဵတ်းဝၢတ်ႈၵေႃႉဢၼ်ပိူင်ႇထုတ်ႇဢဝ်ၼၼ်ႉတႃႉ။ ပေႃးမၼ်းၼၼ်ႉဢမ်ႇၶႂ်ႈႁဵတ်းဝၢတ်ႈၵေႃႉဢၼ်ပိူင်ႇထုတ်ႇဢဝ်ၼၼ်ႉတီႈမႂ်းၸိုင်၊ ၵႃႈၼင်ႇဢၼ် ထႃႇဝရႃႉၽြႃးဢသၢၵ်ႈလိပ်းယူႇၼၼ်ႉ ၵဝ်တၵ်းႁဵတ်းဝၢတ်ႈၵေႃႉဢၼ်ပိူင်ႇထုတ်ႇဢဝ်ၼၼ်ႉတီႈမႂ်းဢေႃႈ။ ၼွၼ်းယူႇတေႃႇထိုင်ႁွတ်ႈၶိင်ႇၵၢင်ၼႂ်လူးၵွၼ်ႇသေၵမ်း၊ ဝႃႈၼင်ႇၼႆဢေႃႈ။

14မၼ်းၼွၼ်းၵႃႈတီႈႁိမ်းတိၼ်မၼ်းၼၼ်ႉတေႃႇထိုင်ႁွတ်ႈၶိင်ႇၵၢင်ၼႂ်သေယဝ်ႉ၊ လုၵ်ႉမိူဝ်ႈဢၼ်ဢမ်ႇပႆႇတၼ်းႁွတ်ႈထိုင်ၶိင်ႇဢၼ် ၵေႃႉၼိုင်ႈလႄႈၵေႃႉၼိုင်ႈ ႁူႉၵၼ်လႆႈၼၼ်ႉသေဢေႃႈ။ လွင်ႈမၼ်းၸမ်ႉ မၼ်းၼၼ်ႉလၢတ်ႈလႄႈဝႃႈ၊ ယႃႇပေႁႂ်ႈၽူႈလႂ်လႆႈႁူႉလွင်ႈဢၼ်မႄႈယိင်းမႃးၵႃႈတီႈတလၢင်းယဵပ်ႇၶဝ်ႈၼႆႉသေၵမ်း၊ ဝႃႈၼင်ႇၼႆဝႆႉဢေႃႈ။-

15မၼ်းၼၼ်ႉသမ်ႉလၢတ်ႈလႄႈဝႃႈ၊ ဢဝ်ၽႃႈမႆဢၼ်ပႃးၵႃႈတီႈမႂ်းၼၼ်ႉမႃးလႄႈၽႄႇသိူဝ်ႇတႃႉ၊ ဝႃႈၼင်ႇၼႆသေယဝ်ႉ၊ မၼ်းၽႄႇၵီႈသေလႄႈ မၼ်းၼၼ်ႉတုင်းဢဝ်ၶဝ်ႈမူႉယေႃးႁူၵ်း ဢေႃးမေႇ သႂ်ႇလႄႈ တၢင်ႇပၼ်ၵႃႈၼိူဝ်မၼ်းသေယဝ်ႉ၊ မၼ်းၼၼ်ႉၵႂႃႇၵႃႈၼႂ်းဝဵင်းဢေႃႈ။-

16မိူဝ်ႈဢၼ်မၼ်းႁွတ်ႈထိုင်ၵႃႈတီႈမႄႈၸဝ်ႈမၼ်းၼၼ်ႉၸိုင်၊ မႄႈၸဝ်ႈမၼ်းၼၼ်ႉထၢမ်လႄႈဝႃႈ၊ လုၵ်ႈယိင်းၵဝ်ဢိူၺ်း၊ ပဵၼ်မႃးၸိူဝ်ႉၼင်ႇႁိုဝ်တီႈမႂ်း၊ ဝႃႈၼင်ႇၼႆသေယဝ်ႉ၊ မၼ်းမွၵ်ႇလၢတ်ႈၵႃႈဢၼ်ၵေႃႉၼၼ်ႉ ႁဵတ်းတီႈမၼ်းၼၼ်ႉဢေႃႈ။-

17မၼ်းလၢတ်ႈလႄႈဝႃႈ၊ ၵေႃႉၼၼ်ႉဢဝ်ၶဝ်ႈမူႉယေႃးႁူၵ်း ဢေႃးမေႇ ၼႆႉ ပၼ်တီႈၵဝ်ၶႃႈလႄႈဝႃႈ၊ မႂ်းဢမ်ႇလႆႈမိူဝ်းၵႂႃႇတိၼ်လၢႆမိုဝ်းပဝ်ႇ ၸူးၵႃႈတီႈမႄႈၸဝ်ႈမႂ်းၼၼ်ႉ၊ ဝႃႈၼင်ႇၼႆၶႃႈယဝ်ႉ၊ ဝႃႈၼင်ႇၼႆဢေႃႈ။-

18မၼ်းၼၼ်ႉၵေႃႈလၢတ်ႈလႄႈဝႃႈ၊ လုၵ်ႈယိင်းၵဝ်ဢိူၺ်း၊ ၼင်ႈယူႇၼိမ်ၼိမ်လီလီ တေႃႇထိုင်ႁွတ်ႈႁႂ်ႈထၼ်ႈပေႃးလႆႈႁူႉလွင်ႈဢၼ် ဢမူႉၼႆႉတၵ်းယဝ်ႉတၵ်းတူဝ်ႈၸိူဝ်ႉၼင်ႇႁိုဝ်ၼၼ်ႉတႃႉ။ ၵူၼ်းၸၢႆးၼၼ်ႉ တၵ်းဢမ်ႇယူႇၼိမ်ၼိမ်လီလီတေႃႇထိုင်ႁွတ်ႈထၼ်ႈပေႃးႁႂ်ႈဢမူႉၼႆႉယဝ်ႉတူဝ်ႈၼႂ်းဝၼ်းမိူဝ်ႈၼႆႉဢေႃႈ၊ ဝႃႈၼင်ႇၼႆဢေႃႈ။

← Chapter 2 Jump to: Chapter 4 →