1 John 1

Sidamo

Jump to: Chapter 2 →

1Heeshshote Qaalire bi're hundanni noohurenna macciishshinoommohure, illenkenni la'noommore, anfoommorenna angankenni amandoommore borreessine kulleemmo'ne.

2Tini heeshsho xawo fultino; ninkeno la'noommo; farci'neemmo. Maganu Annunniwa nooterenna ninkerano leeltinotere hegere heeshshore kulleemmo'ne.

3Ninke ledo mittimma heedhanno'ne gede, la'noommohanna macciishshinoommoha ki'nerano kulleemmo'ne; mittimmankeno Maganu Annunna Beettisi Yesuusi Kiristoosi ledooti.

4Hagiirri'ne guuta ikkanno gede konne coye borreessinoommo'ne.

5Isiwiinni macciishshinoommotinna ki'nera kulleemmo sokka, «Maganu xawaabbaho; tunsichu isiwa horonta dino» yitannote.

6Kunnira, «Maganu ledo mittimma noonke» yinanni hee'ne, tunsichoho hee'neemmoha ikkiro, kaphinoommo; giddonke halaaluno dino.

7Isi xawaabbaho hee'rannonte gede ninkeno xawaabbaho hee'nummoro, mimmitinke ledo mittimma heedhannonke. Qoleno Beettisi Yesuusi mundee cubbu baalunni keereensitannonke.

8«Cubbu dinonke» yinummoro umonke dongeemmo; halaaluno giddonke dino.

9Cubbonke Maganoho ku'linummoro, isi ammanaminohanna keeraancho ikkinohura, cubbonke baala agurannonke; saonke baalatennino keereensannonke.

10«Cubbo diloonsoommo» yinummoro, Magano kaphaancho assineemmo; qaalisino giddonke dino.

Jump to: Chapter 2 →