2 Peter 1

Sidamo

Jump to: Chapter 2 →

1Yesuusi Kiristoosi soqqamaanchonna soqqamaasincho ikkinohu Simiooni Pheexiroosiwiinni, Maganinkenna Gatisaanchinke Yesuusi Kiristoosi keeraanchimma widoonni afi'noommo ammana gedeeta ayirrado ammana afidhinoonnirira:

2Maganonna Mootichanke Yesuusa afatenni eltonna keeru bati'ro'ne.

3Ayirrinyisinninna danchummasinni woshshinonkeha afankenni maganimmate wolqasinni heeshshotenna Magano magansi'rate hasiisannore baala uyinonke.

4Busha yortora tenne gobba bunshewiinni xooqqine, hexxote qaali garinni maganimmate suude gutantinoonni; hakkaanni qole ayirradonna lowo geeshsha jawa hexxo uyinonke.

5Kunni daafira kunninni aane noo coyi lexxanno'ne gede jawaatte: ammanate aana danchumma, danchummate aana egenno,

6egennote aana umo qee'la, umo qee'late aana cinca, cincate aana Magano lawa,

7Magano lawate aana roduuwu baxama, roduuwu baxama aana baxille ledde.

8Kuni coyi bati're hee'ri'nero, Mootichanke Yesuusi Kiristoosi egennate mullootanna gumiweeloota ikkitinannikki gede assanno'ne.

9Kuni coyi noosikkihu illiweeloho; mule nooha calla la"anno; albi cubbiwiinni keeraawinota hawino.

10Kunnira, roduuwa'ya! Woshshama'nenna doorama'ne buuxi'rate albinni roore quqquxamme. Hatto ikkitiniro horontanni digufidhinanni.

11Kunni garinni hegereha Mootichinkenna Gatisaanchinke Yesuusi Kiristoosi gashshoote eate kaayyo uyinanni'ne.

12Konne coye affinoonnihanna amaddinoonni halaalinni kaajjitine heedhinoonniha ikkirono, ki'nera lede qaagiissa diagureemmo.

13Tenne heeshshonni noommo geeshsha, wo'manka woyite ki'ne qaagiissa hasiissanno yee hedeemmo.

14Mootichinke Yesuusi Kiristoosi kulinoe garinni ikkiro, tenne gobbanni rahe baxxeemmota afoommo.

15Ani xa diinaggaawanni noommohu, ki'newiinni ree baxxummoro nafa konne coye duuchanka woyite qaagginara yeeti.

16Mootichinke Yesuusi Kiristoosi wolqanna layinkimeeshshi daasire kullummo'ne yannara, ayirrinyesi illenkenni la'neeti ikkinnina, mannu hayyonni kalanqoonni maatto hoode ha'ratenni di"ikkino.

17«Baxeemmohu beetti'ya konneeti; isi yaannota macciishshe» yitanno huuro jawu ayirrinyisiwiinni daggusi yannara, ayirrinyenna gaacheena adhino.

18Qullaawu Ilaali aana ledosi hee'neenna, gordunni daggino huuro ninkenni macciishshinoommo.

19Konneno roorsine xunsineemmo gede assinonkehu himanaanote qaali noonke; kuni qaali hashshu sooda geeshshanna bakkalchu beeddakko wodaninke giddo xabba geeshsha, mannu tunsichu giddo xawanno caabbichira qorophannonte gede, konni qaalirano qorophitiniro danchaho.

20Duuchunkuri aleenni Qullaawa Borro giddo nooha aye himanano, mannu umisi hedo garinni tira dandaannokkita wodana assa hasiissanno.

21Mayira yiniro, aye himanino mannu fajjonni didayino; ikkollana himana Qullaawu Ayyaani massagino manni Maganuwiinni adhe coyi'rino.

Jump to: Chapter 2 →