2 Peter 3

Sidamo

← Chapter 2 Jump to:

1Jaalla'ya! Tini borreesseemmo'neti layinkimeeshshu sokkaati; lamenta sokka borreessoommo'nehu konne coye qaagiissatenni suwashsho hedo heedhanno'ne gede baqqi assammo'nera yeeti.

2Kunni albaanni qullaawa himanaano coyidhino qaalenna soqqamaasine'ne widoonni afidhinoonniha Mootichinkenna Gatisaanchinke hajajo qaagginara hasi'reemmo.

3Balaxxine konne coye wodanche: goofimarchu yannara hasidhu gede faasiiqqannorinna halchonsa hoode hadhanno haariimaasine dagganno.

4Insa, « ‹Daanno yini hexxo hiikkituyya?› Akaakkanke reyitu warinni kayise baalunku coyi kalaqamunni xaa geeshsha noo garinnilla no» yitanno.

5Kuni manni lowo yannara albaanni gordu Maganu qaalinni kalaqaminotanna baattono wayinni xaadde wayi mereero noota affanni heedhenni, afinokkihu gede ikkitanno.

6Hatte yannara noo baatto wayinni egemmante ba'ino.

7Magano magansidhannokkiri, xa noo gordinna baatto sa'anno barri yoonnihu geeshsha giirate qixxaabbe agartanno.

8Jaalla'ya! Ki'ne kayinni, Mootichunniwa mittu barri kumu diri gede, kumu diri mittu barri gede ikkinota konne mitto coye habbinoonte.

9Mitu mitu heddanno garinni ikkikkinni, Mootichu uyino hexxo wonshate dikeeshshanno. Ikkollana, baalunku aagintaawe higaranna ayino ba"ara hasi'rinokki daafira ki'nera yee cincanno.

10Mootichu barri kayinni mooraanchu gede hedeweelcho daanno. Hakko barra gorduwa lowo luulinni ba'anno; kalaqamu baalu giirame ba"anno. Baattonna baattote aana loonsoonniri baalu giiramanno.

11Kuni baalu hatto ikke ba"annoha ikkiro, ki'ne qullaawa heeshshonninna Magano lawatenni hee'ra mayira gibbinanniyya?

12Kunnira, Maganu barri daannota quqquxamatenni agadhitinannirenna rahe daanno gede loossinannire ikke; hakko barra gordu giirame ba"anno. Kalaqamuno giirate iibbillinni shiilanno.

13Ninke kayinni uyinonke hexxo garinni keeraanchimma heedhannoha haaro gordonna haaro baatto agadhineemmo.

14Kunnira, jaalla'ya! Kuni baalu ikkanno barra galaalchitinanni heedhiniro, Mootichu saalunna minshanniri nookkire ikkitine keere heedhineenna afi'ranno'ne gede feeffattine heedhe.

15Mootichinke cinca gato'nera ikkitinota affe. Baxaminohu rodiinke Phaawuloosino uyinoonnisi egenno garinni borreessino'nehuno konneeti.

16Isi tenne hajare sokkasi baalantera kunni garinni borreessino. Sokkasi giddo mitu mitu buuxate qarrisanno coyi no; egenno xe'inonsarinna yawaawulootu wole qullaawa maxaaffa shokkishshannonte gede, konne coyeno shokkishshanno. Hatto assansanni uminsa ba'anno.

17Jaalla'ya! Ki'ne kayinni konne coye balaxxine affinoonni daafira, haxawarrootu so'ronni goshooshantine murte'newiinni ba'inannikki gede qorophe!

18Roorenka, Mootichinkenna Gatisaanchinke Yesuusi Kiristoosi eltonninna egennonni lophe; isira xaano hegere geeshsha ayirrinyu ikkosi! Hamii'ni.

← Chapter 2 Jump to: