2 Thessalonians 1

Sidamo

Jump to: Chapter 2 →

1Maganu Anninkenna Mootichinke Yesuusi Kiristoosirira, Teselonqe beetekiristaane ammanaanora Phaawuloosi, Silaasinna Ximootewoosi sokkino sokka.

2Maganu Anninketinna Mootichu Yesuusi Kiristoosi eltonna keeri ki'ne ledo hee'ro.

3Roduuwa'ya, ki'nenni kainohunni Magano wo'manka woyite galanteemmo. Galatano hasiissannonkete; galanteemmohuno, ammana'ne roore lophitanni noohuranna mimmiti'nera noo'ne baxillino lexxanni noo daafiraati.

4Kunnira lowo qarrinna shetto iillitu'nerono, cincaaleeyyenna ammanatenni kaajjitinoonnire ikkitinoonnita kullanni, ninkeno wole ammanaano mereero hee'ne ki'nenni naaxxineemmo.

5Kuni coyi baalu, Maganu yoo halaalaancho ikkitinotanna ki'ne qarra adhitinoonnihura Maganu gashshootira guuta manna ikkitinoonnita leellishanno.

6Maganu halaalaancho yoo yaannoha ikkinohura, qarra kalaqqino'nere qarra abbe qorichishanno.

7Xa qarra adhitinannirira ninke ledo fooliishsho aanno'ne. Hatto assannohu, Mootichu Yesuusi wolqaataame sokkaasinesi ledo wala yitanno giiranni gordunni daanno warooti.

8Hatte yannara, Magano egentinokkirenna Danchu Duduwi Mootichu Yesuusihura hajajantannokkire qorichishanno.

9Insa Mootichu albinninna wolqaataamu ayirrinyisiwiinni baxxite, hegere qoricha adhitanno.

10Qorichansa adhitannohu, mannu baaluwiinni ayirrinye adharanna ammantinosiri baalu guwissasira daanno yannaraati. Ki'neno ninke kulloommo'ne sokka adhitinoonni daafira insa ledo kiirantinanni.

11Konne coye hedatenni ki'ne daafira wo'manka woyite huucci'neemmohu Maganinke, woshshino'ne heeshshora maltinoonnire ikkitinanni gedenna dancha coye assate noo'ne halchonna ammana'ne looso baala wolqasinni guuttinannire assanno'ne gedeeti.

12Mootichinke Yesuusi su'mi ki'nenni ayirranno gedenna ki'neno Maganinkenna Mootichinke Yesuusi Kiristoosi elto garinni isinni ayirritinanni gede Magano huuccineemmo.

Jump to: Chapter 2 →