2 Thessalonians 2

Sidamo

← Chapter 1 Jump to: Chapter 3 →

1Roduuwa'ya, Mootichinke Yesuusi Kiristoosi daanna ninkeno isi ledo hee'nammora gamba yineemmo gambo daafira,

2himanne woy qaale kulle woy ninke borreessine sonkoommo sokka gede assitine heddinanni, «Mootichu barri dayino» yitine shiimurinni gara habbinannikki gedenna hembeelantinannikki gede eegammeemmo'ne.

3Danni bunshe daggukkinninna baonnihu Bunshete Manchi leellikkinni hakku Barri didaannona, mayi doogonnino ikkeenna ayino dogoonke'ne.

4Kuni Bunshete Manchi maganoho yine magansi'nannihunni roore umosi gotti gotti asse, «Ani Maganoho» yaanni Qullaawa Mine ofollanno.

5Ki'ne ledo noommo yannara konne coye kuloommo'neta diqaagginanni?

6Hendoonnisi yanna dagga geeshsha, leellannokki gede mayi hoolannosiro affinoonni.

7Go'litinoti bunshete wolqa xa loossanni no. Ikkollana xa ittisannohu no; loossannohuno xa ittisannohu doogote aaninni hoo'la geeshshaati.

8Hakkunni gedensaanni Mootichu Yesuusi afiisi foolinni hunannohunna ayirrinyunni daanno woyite co'o yee ba"annohu Bunshete Manchi xawo fulanno.

9Bunshete Manchi daa, Sheexaanu wolqanni so'risiisanno dhagge, malaatenna maalale assatenniiti.

10Ba'annore so'risiisannohu, addi addi bunshe assatenniiti. Kuni manni ba"annohu, gatote iillishanno halaale baxe adha giwino daafiraati.

11Kunnira, kapho ammantanno gede Maganu so'rote wolqa soyannonsa.

12Kuni ikkannohu halaale ammana gibbe bunshetenni hagiidhitannori baalu qorichishantanno gedeeti.

13Mootichu baxanno'ne roduuwa, ninke ki'ne daafira wo'manka woyite Magano galata hasiissannonke. Galanteemmohuno, Ayyaanu qullaawoota asseenna'ne gattinanni gede Maganu umire asse doorino'nehuranna halaalaancho ammana'ne daafiraati.

14Maganu, kulloommo'nehu Danchu Duduwi widoonni qole woshshino'nehu, Mootichinke Yesuusi Kiristoosi ayirrinye gutantinaraati.

15Kunnira roduuwa'ya, kaajjitine uurre. Afiinkenninna sokkankenni rosiinsoommo'ne coye seekkitine cu'midhe.

16Mootichinke Yesuusi Kiristoosinni, qoleno baxinonkehunna eltosinni hegere jawaantenna dancha hexxo uyinonkehu Maganu Anninke,

17dancha coye baala assitinanninna coyidhinanni gede, wodana'ne jawaachishonna kaajjisho.

← Chapter 1 Jump to: Chapter 3 →