Colossians 1

Sidamo

Jump to: Chapter 2 →

1Maganu hedonni Yesuusi Kiristoosi soqqamaasincho ikkoommohu ani Phaawuloosinna rodiinke Ximootewoosi,

2Qolasiyaasi heedhinannirira, Kiristoosinni qullaawoota ikkitinoonnirira ammanantinoonni roduuwira, Maganu Anninke eltonna keeri ledo'ne hee'ro.

3Ki'nera huuccineemmo yannara, Mootichinke Yesuusi Kiristoosi Anna Magano wo'manka woyite galanteemmo.

4Yesuusi Kiristoosinni noo'ne ammananna ammanaano baalate noo'ne baxille macciishshinoommo.

5Halaalu qaali, Danchu Duduwi balaxe ki'newa dayi yannara, isi aanno hexxo macciishshitinoonni. Kunnira, ammana'nenna baxilli'ne gordoho qixxaabbe noo'ne hexxo aana xintamino.

6Ki'ne Dancha Duduwo macciishshitinihunna Maganu elto halaale ikkitinota huwattinihunni kayise giddo'ne hee'rinte gede, kuni Danchu Duduwi alame baalateno guma laalanninna lophanni no.

7Maganu eltore, ninke afoo ikke soqqaminohu Kiristoosira ammanaminohu ledonke soqqamaanchi Ephafira hasaawinonke.

8Isi, Maganu Ayyaaninni afidhinoonni baxilleno kulinonke.

9Kunnira, konne coye macciishshinummo barrinni kayinse, ki'nera ayyaanaame egennonninna buuxa baalatenni Maganu hedo afate egenno wonshanno'ne gede huuccanna Magano xa'ma diagurroommo.

10Qolleno, Mootichaho maltino heeshsho heedhinanni, baalunku coyinni dancha guma laaltinanninna Maganu egennonni lophitinanni wo'mante doogonni hagiirsiissinannisi gede huuccatto assineemmo'ne.

11Mootichu jawa wolqasinni jawaantesi baala oo'ne. Cincatenni baalanka coye dandaate hagiirrunni qixxaabbinoonnire asso'ne.

12Qoleno xawaabbu gashshooti giddo qullaawootu ledo iqqa adhitinanni gede assino'neha Magano Anna hagiirrunni galattesi.

13Isi tunsichu gashshooti giddonni fushshe, baxannohu Beettisi gashshooti giddora eessinonke.

14Isi wodeennanke cubbinke aguraminonke.

15Kiristoosi illete leellannokki Maganira halaalaancho lawishshaati. Isi kalaqamu baalunkura umiidiho.

16Gordohonna baattote aana noore illete leeltannorenna leeltannokkire wolqaataamma, mootoolla, gashshaanonna roorroota baala kalaqinohu isooti. Maganu baalanka coye kalaqinohu isinniiti; qoleno isiraati.

17Isi baalunku coyira albaanni no; baalunku coyi mimmito amade uurrinohu isinniiti.

18Isi bisosi ikkitinotera beetekiristaanete umoho. Baalunku coyira albiidiha ikkanno gede, reyotenni ka"atennino albiidihanna umiha ikkino.

19Kuni ikkinohuno, wo'ma maganimmasi Beettisi aana heedhanno gede Maganu Annu hedo ikkitinohuraati.

20Isi widoonni gordohono ikko baattote aana noo coye baala isinii ledo araarsino. Masiqalu aana du'nantino mundee Beettisitenni keere kalaqino.

21Kunni albaanni Maganuwiinni xeertidhine heedhinoonni; hedo'nenninna bushu loosi'nenni isira diina ikkitine heedhinoonni.

22Xa kayinni qullaawootanna fayyaaleeyye, kullanniri nookkire asse albisira shiqisha'nera, maalu reyo Beettisite widoonni qole Maganu umisi ledo araarsino'ne.

23Kuni ikkannohu, xintantinenna sigiiggine, Danchu Duduwinni daggino hexxowiinni miliqqi yitinikinni ammanatenni kaajjitine heedhinirootilla. Kuni Danchu Duduwi, ki'ne macciishshitinoonnihonna kalqe baalate kulloonniho. Ani Phaawuloosino soqqamaancho ikkoommohu kunni Danchu Duduwiraati.

24Xa ki'ne daafira yee adheemmo qarrinni tashshi yaannoe. Bisosi ikkitino beetekiristaanera Kiristoosi qarra beeqqatenni xeinoere maali'yanni wonsheemmo.

25Maganu Qaale ki'nera gudise kulate, Maganu uyinoe annimma garinni beetekiristaanete soqqamaancho ikkoommo.

26Kuni Maganu qaali sa'u yannara mannaho go'le keeshshinohonna xa kayinni Maganu ammantinosirira baalaho leellishinoho.

27Maganu hedo, daga baalate malinota go'lite keeshshitinota ayirrinyisi jiro qullaawootaho leellishate; go'le keeshshino coyino, ki'ne gutantinannihu Maganu ayirrinyi Kiristoosi giddo'ne hee'rate.

28Mittu mittunku Kiristoosinni guuta ikkanno gede assine shiqishate, manna baalaho hayyo baala rosiisatenninna seejjatenni Kiristoosire kulleemmo.

29Maganu jawa wolqasinni giddo'ya loosanno daafira, hatte wolqanni tini hedosi wo'mitanno gede sharramanni daafureemmo.

Jump to: Chapter 2 →