Hebrews 1

Sidamo

Jump to: Chapter 2 →

1Maganu bi're alba addi addi doogonni himanaanote widoonni qole annuwankera batinye hige coyi'rino.

2Xa kayinni kunni goofimarchu barrinni baalankare ragi'ranno gede assinohu Beettisi widoonni qole ninkerano coyi'rinonke. Kalqe baala kalaqinohuno isinniiti.

3Isi Maganu ayirrinye xawise leellishino; isi ewelummasinni gudise Maganu ledo mittoho. Kalqe baala wolqaataamu qaalisinni irkise amade no. Mannano cubbunni keereensihu gedensaanni, gordoho ayirradu gashshaanchi Maganu qiniiteenni ofollino.

4Isira uyinoonni su'mi sokkaasinete su'mira aliidiha ikkinonte gede, isino sokkaasinete aliidiho.

5Maganu, «Ati Beetto'yaati, techo iloommohe» woy, «Ani anna ikkeemmosi, isino Beetto'ya ikkanno» yiinohu hiikko sokkaasinchiraati?

6Maganu bayira Beettosi tenne gobba soyara kai yannara, Maganu sokkaasine baala magansidhannosi gede hajajino.

7Sokkaasinesire coyi'ranni, «Sokkaasinesi bubbe, soqqamaanosi giirate buwano assanno» yaanno.

8Beettisire qole, «Magano! Mootimmakki barcimi hegerera hee'rannoho; keeraanchimma gashshootikki siqqichooti.

9Keeraanchimma baxootto; bunshe giwootto; kunnira, Maganu Maganikki, jaallakkinni roorse hagiirru buuro buurinohe» yaanno.

10Hattono, «Mooticha! Ati umo assite baatto xintootto; gorduno angakki loosooti.

11Insa baalunku ba'anno; ati kayinni hee'ratto; insa uddanote gede akkaltanno.

12Seemmate gede assite xaaxattonsa; uddanote gede soorrantanno. Ati kayinni hegere geeshsha ateetilla; horontanni disoorramatto; dirikkino digoofanno» yaanno.

13Maganu mitto sokkaasinchono, «Baarigaarrakki lekkakkira woroonni qolammo geeshsha, qiniite'yaanni ofolli!» diyiino.

14Sokkaasine maatiyya? Maganoho soqqantannorenna gato ragidhannore kaa'late Maganu soyino ayyaanna di"ikkitino?

Jump to: Chapter 2 →