Joel 1

Sidamo

Jump to: Chapter 2 →

1Puteeli beetti Iyueeliwa Kaaliiqiwiinni dayinohu himanu qaali kunninni aane nooho:

2Ki'ne geerru konne coye macciishshe! Baattote aana heedhinanniri baalunku macca'ne kawa qolle! Togoo coyi yanna'nera, woy akaakka'ne yannara ikke egenninoni?

3Konne coye ooso'nera kulle; ooso'neno oosonsara kultona; ooso'ne oosono qolte dagganno ilamara kultona.

4Sixuwiinni gatino gide, kanchafaru gudino. Kanchafaruwiinni gatinoha, shiimmaaddu kanchafari itino; hakkiinni gatinoha qooliweelu kanchafari itino.

5Woyinete haqqe baalanti ba'ino daafira, kunni ka'a haaro woyinete xajje suumetenni dikissinanni. Kunni daafira ki'ne dimbaano, baqqi yitine ka'ine wi'le. Ki'ne woyinete xajje agginanniri, heqqifattinanni wi'le.

6Kiiro nookkihu wolqaataamu kanchafari, horranno diini gede baattonke aanira dayino. Hinkosino doobbiyunnite gede qaraamete. Keltisino meya doobbiyi gedeeho.

7Woyinete kaashshonke baala huni. Balasete haqqenkeno quuxare iti. Sinnano waajjo asse, omollano sholoole tugi.

8Kunnira, huucci'rinohu reennase, xiddu uddano uddidhe wi'litannote gede, ki'neno hatto ikkitine wi'le.

9Maganu minira uyinannihu, giduno woyinete xajjeno hooggino daafira, Maganu mine soqqantanno qeese wi'litanno.

10Gatu mullicho ikkino. Gidu baino. Woyinete kaashshi moolino. Zayitete ejedheno qoortino; kunni daafira baatto wi'litanno.

11Qamadenna hayixu, wolu gidino baino daafira, ki'ne loosidhinanniri dadille; ki'ne woyinete kaashshi annuwa wi'le.

12Woyinete kaashshinna balase qoortino. Saattunna laaltanno haqqe baala mooltino. Kunninni kainohunni hagiirru mannuwiinni baino.

13Magani'nera uyitinanniri, gidinna woyinete xajje nookki daafira, ki'ne kakkallanni darga soqqantinanni qeese, xiddu uddano uddidhine dadille. Qullaawu Minirano e'ine hashsha wo'ma wi'le.

14Mannu itanna aga agure huucci'ranno gede lallabbe! Manna baala xaado woshshe! Geerranna gobbate manna wo'manka, Maganu Kaaliiqi Minira gamba asse. Kaaliiqi widirano raarre.

15Kaaliiqi barri gambisino. Wo'munkura Aliidi Magani bao abbanno barri iillino. Hakkunni barrira aanne'e!

16Gidinke ba"anna dadillunni la'neemmo. Qullaawaho Maganinke Kaaliiqi Minira, jilunna hagiirru dino.

17Winxoonni gidi baalu baattote giddo dukukke baino. Gidu hoogino daafira, gide worranni dargi baalu mulla ikkino. Gootarrano diigantino.

18Saada hayisso hoogge godooddanno; ge'reewuno hudi're raataawanno.

19Kaaliiqa ballo, xawu hayissonna dubbu haqqe baala, giirroonnihu gede co'o yite mooltino daafira, ate widira hige raareemmo.

20Xashshuwa baalanti mooltinohuranna, xawu hayisso baala giirante ba'ino daafira, dubbu moyichi ate widira hige godoodanno.

Jump to: Chapter 2 →