Psalms 119

Sidamo

← Chapter 118 Jump to: Chapter 120 →

1Suwashsho doogo hadhannorinna, Kaaliiqi seeri garinni heedhannori baraadhinoreeti.

2Hajajosi wonshitannorinna, wo'mu wodaninni iso hasidhannori baraadhinoreeti.

3Insa so'ro diloossanno; Kaaliiqi hedo gede ikkite heedhanno.

4Kaaliiqa! Ati seera oottonke; xeinsummokkinni hajajammeemmo gedeno kuloottonke.

5Wogakki agadhatenni ammanamoommoha ikkate, lowo geeshsha halchoommo.

6Hajajokki baala seekke agadhummoro, saalu horonta diamadannoe.

7Halaalaancho yookki afoommo deerrinni, keeraanchu wodaninni galaxxeemmohe.

8Wogakki ayirriseemmo; horontanni callachishshootie.

9Wedellu heeshshonsa hiitto assite keereensidhanno? Wogasi agadhatenniiti.

10Ate wo'mu wodani'yanni hasi'reemmo daafira, hajajokki wonsheemmo gede kaa'lie.

11Cubbo looseemmokki gede, qaalekki wodani'yara wodhoommo.

12Kaaliiqa'ya, galaxxeemmohe; wogakki rosiisie.

13Yootto yoo baala marro hige, aneneewa hasaaweemmo.

14Hajajokki wonsha, lowo jiro afi'rantenni roore tashshi assitanno.

15Wogakki buuxeemmo; rosiishshakkino hiinceemmo.

16Wogakki tashshi assitannoe; qaalekkino dihaweemmo.

17Lubbotenni hee'reemmo gedenna, ate woga agadheemmo gede, ane soqqamaanchikkirano dancha coye assie.

18Seerikki giddo nooha dhaggete halaale laeemmo gede, ille'ya fanie.

19Ani baattote aana harancho yannalla hee'reemmona, hajajokki maaxxootie.

20Lubbo'ya yookki affara yite, wo'manka woyite quqquxantu.

21Hajajokki wonshitannokki boonaleeyye, ati rufoottoreetinna rumoottoreeti.

22Ani hajajokki agadhoommo daafira, xononsanna mishshonsa aani'yanni hoolie.

23Roorrootu gamba yite anera gano gantanno; ani soqqamaanchikki kayinni wogakki buuxanni noommo.

24Hajajokki hagiirsiissannoe; amaaltannoetino iseeti.

25Qeelame reyote meddi yoommo; oottoehu hexxote qaali garinni heeshsho'ya haaroonsie.

26Assoommore baala atera ku'loommo; atino macciishshoottoena, xaate wogakki rosiisie.

27Wogakki wodancheemmo gede kaa'lie; anino dhaggenniha loosokki marro hige hedeemmo.

28Dadillunni kainohunni lubbo daaqque; qaalikki garinni wolqa'ya haaroonsie.

29Kapho anewiinni xeertisi; shaqqillikkinni seerakki rosiisie.

30Hajajama doodhoommo; yookki garinni hee'rate murci'roommo.

31Kaaliiqa! Hajajokki gede ikkoommona, saalfateemmo gede assitootie.

32Roore wodancha aattoe daafira, hajajokki jaate wonsheemmo.

33Kaaliiqa ballo! Wogakki garinni hee'ra rosiisie; anino wo'manka woyite ha'runseemmo.

34Ayirriseemmo gedenna, wo'mu wodani'yanni agadheemmo gede seerakki xawisie.

35Hajajokki tashshi yitannoe daafira, wonsheemmo gede kaa'lie.

36Jiro afi'rate beellamammontenni, hajajokki agadhate halcho heedhannoe gede assie.

37Haafare laeemmokki gede agarie; qaalikki garinni heeshsho'ya haaroonsie.

38Hajajantannoherira oottoha hexxote qaale, ane soqqamaanchikkirano wonshie.

39Yookki lowo geeshsha dhaggennitena, waajjishshanno xonowiinni agarie.

40Wogakki agadha hasi'reemmo; ati keeraancho ikkootto daafira haaro heeshsho uyie.

41Kaaliiqa! Bagamannokkiha baxillekki leellishie; hexxonnihu qaalikki garinni gatisie.

42Qaalekki addaxxeemmo daafira, xontannoerira baalaho tumo qola dandeemmo.

43Hexxeemmoti ate yoo ikkitinohura, wo'manka woyite halaale coyi'reemmo gede kaa'lie.

44Seerakki agurummokkinni hegere geeshsha agadheemmo.

45Wogakki wonsha hasi'reemmo daafira, keere hee'reemmo.

46Wogakki mootoollate kuleemmo; horonta disaalfateemmo.

47Hajajokki baxeemmo; hajajamatenni hagiirre afi'reemmo.

48Baxeemmota hajajokki ayirriseemmo; wogakkino marro hige hedeemmo.

49Ane soqqamaanchikkira oottoha hexxote qaale qaagi; hakku qaalino anera hexxo'yaati.

50Hexxote qaalikki heeshsho'ya haaroonsinoehura, qarru yannara nafa sheshifachishinoe.

51Boonaleeyye wo'manka woyite qacifattannoe; ani kayinni seerikkiwiinni difafoommo.

52Kaaliiqa'ya, bi're hundinni kayisse noota yookki qaageemmo woyite, jawaante afi'reemmo.

53Bushuullu seerakki huntanna afeemmo woyite, lowo geeshsha aarameemmo.

54Harancho baattote aani heeshsho'ya baalantenni, wogakki anera faarso'yaati.

55Kaaliiqa! Ate hashsha nafa qaageemmohe; seerakkino agadheemmo.

56Hajajokki wonshatenni hagiirre afi'reemmo.

57Kaaliiqa'ya, hasatto'ya ate callaati; seerakki agadhate murci'roommo.

58Wo'mu wodani'yanni huucci'reemmohena, hexxonnihu qaalikki garinni elie.

59Xaa geeshsha hee'roommo gara egennoommo daafira, hajajokki gede ikke hee'rate murci'roommo.

60Keeshshummokkinni rahotenni hajajokki wonsheemmo.

61Bushuullu woshshaado wortinoe; ani kayinni seerakki dihawoommo.

62Halaalaancho yookki daafira ate galatate, hashshu taalootira kaeemmo.

63Ani atera soqqantannoriranna, wogakki ayirrissannorira jaalaho.

64Kaaliiqa'ya! Baattote bagamannokkihu baxillikki wo'mino; anera wogakki rosiisie.

65Kaaliiqa'ya! Hexxonniha qaalekki agaroottoe; ane soqqamaanchikkirano eloottoe.

66Hajajokki hawaqi'reemmo daafira, ogimmanna egenno uyie.

67Ati seejjattoera albaanni so'reemmoho; xa kayinni qaalikkira hajajameemmo.

68Ati lowo geeshsha shooshaqahonna shaqqadohona, wogakki rosiisie.

69Boonaleeyye beebbatenni su'ma'ya huntanno; ani kayinni wogakki wo'mu wodaninni agadheemmo.

70Insa wodana beebbinoreeti; anera kayinni seerikki tashshi yaannoe.

71Wogakki roseemmo gede assitinoe daafira, seejjokki anera dancha ikkitinoe.

72Lowo culkinninna lowo birrinni roore, ati oottoe seeri woyyannoe.

73Kalaqoottoehunna seekkoottoehu ateeti; hajajokki roseemmo gede wodancha uyie.

74Hexxote qaalekki hawaqi'reemmo daafira, ate ayirrissannori baalu ane affanno woyite hagiidhitanno.

75Kaaliiqa'ya, yookki halaalaancho ikkitinota afoommo; seejjoottoehuno halaalaancho ikkoottohuraati.

76Ane soqqamaanchikkira oottoehu hexxote qaali garinni, bagamannokkihu baxillikki sheshifachishinoe.

77Seerikki tashshi yaannoe daafira, lubbotenni hee'reemmo gede, maarokki soyie.

78Beebbatenni gereertannoeri boonaleeyye shollito; ani kayinni wogakki marro hige hedeemmo.

79Ate ayirrissannorinna hajajokki egentinori, anewa daggo.

80Qeelame saalfateemmokki gede, wogakki garunni agadheemmo gede kaa'lie.

81Kaaliiqa'ya ballo, ati gatisattoera agadhanni, lowo geeshsha daafuroommo; ikkirono hexxo'ya qaalikki aana wodheemmo.

82«Mamoote kaa'lattoe ikka?» yaanni, hexxonniha qaalekki agadhanna ille daafurtue.

83Wiliilanno mini giddo sutame qoromoddino ogori gede ikkoommo; tenne giddoonni kayinni wogakki dihawoommo.

84Mamooti geeshsha cinceemmo? Okkitannoere rabbisattohu mamooteeti?

85Seerakki agartannokkiri boonaleeyye, ane woshshaaddara balla untino.

86Hajajokki baala hawaqi'nannite; kaphaasine beebbatenni okkitanni nooena kaa'lie.

87Shite hoogginoehu gatoommo; ikkollana wogakki lashshi diassoommo.

88Bagaminokkihu baxillikkinni heeshsho'ya haaroonsie; anino hajajokki agadheemmo.

89Kaaliiqa'ya, qaalikki hegereho; gordohono soorramikkinni hee'ranno.

90Halaalaanchimmakki ilamate ilama geeshsha heedhanno; baatto mitto darga uurrisittose; noowiinni milli yitukkinni heedhanno.

91Baalunku soqqamaasinekki ikkitinohura, yookki techo geeshsha soorrantukkinni heedhino.

92Seerikki hagiirri'ya buicho ikka hoogoommero, shetto'yanni kainohunni ree hoogoommo.

93Wogakkinni heeshsho oottoena, horontanni ise lashshi diasseemmo.

94Ani atehona gatisie; wogakkino agadhammora wo'naa'loommo.

95Bushuullu shitaera gaa'lite agartanno; ani kayinni hajajokki marro hige hedeemmo.

96Wo'munkuri gawalo afi'rinota afoommo; hajajokki kayinni hegere geeshsha disoorrantanno.

97Seerakki lowo geeshsha baxeemmo; barra wo'ma iso hedeemmo.

98Hajajokki wo'manka woyite ledo'ya no; baarigaarra'yanni roore wodancheemmoha assitannoe.

99Hajajokki marro hige hedatenni, rosiisaano'ya baalantenni roore wodancha afi'roommo.

100Wogakki baala wonsheemmo daafira, jajjabbunni roore hayyicha ikkeemmo.

101Qaalikkira hajajama hasi're, busha hoshsha aguroommo.

102Rosiisaanchi'ya ate ikkoottohura, yookki lashshi diassoommo.

103Qaalikki hiitto coommannoho! Malawu leonni roore coommannoho.

104Wogakkinni hayyo afi'roommo; kunnira, busha hoshsha giwoommo.

105Qaalikki lekka'yara caabbichoho; doogo'yara xawaabbaho.

106Halaalaancho yookki agadhate, afii'yanni fullo qaale disoorreemmo.

107Kaaliiqa'ya ballo, shetto batidhinoe daafira, hexxonnihu qaalikki garinni lubbotenni worie.

108Kaaliiqa'ya ballo, baxe uyi'reemmota galatu kakkalo adhie; yookkino rosiisie.

109Lubbo'ya yaaddote giddo heedhuro nafa, seerakki dihaweemmo.

110Haxawarrootu woshshaado wortinoe; ani kayinni wogakkiwiinni wirri diyoommo.

111Hajajokki geedote jiro'yaati; wodani'ya hagiirrino konneeti.

112Reyammo geeshsha wogakki, agadhate murci'roommo.

113Lamu wodaninni heedhannore giwoommo; seerakki kayinni baxoommo.

114Ati wonqo'yaatinna maaxameemmowaati; oottoe qaale hexxeemmo.

115Ani Magani'ya hajajo agadhammora hasi'reemmona, ki'ne cubbaataammu anewiinni faffe.

116Lubbotenni hee'reemmo gede, hexxote qaalikki garinni jawaachishie; hexxo'ya wo'ma hooggeenna ani saalfatoonke.

117Keerunni hee'reemmo gede irkisie; wo'manka woyite hajajokkino wonsheemmona.

118Hedonsa xagarro wo'mitinotanna kapho ikkitinohura, hajajokki agadhitannokkire baala giwatto.

119Bunshe assitannore baala ishinu gede kiiratto; kunnira hajajokki ani baxeemmo.

120Ate waajjatenni kainohunni mannimma'ya huxidhino; yookkino lowo geeshsha waajjoommo.

121Taalonna halaale ikkino coye assoommo; kunni daafira gadadissannoerira sayisse uyitootie.

122Ane soqqamaanchokki kaa'leemmohe yiie; boonaleeyye gawajjitannoe gede assitootie.

123Gatisaanchimmakkinna, hexxonniha qaalekki agadhanni daafuroommo.

124Ane soqqamaanchokki bagamannokkihu baxillikkinni towatie; wogakkino rosiisie.

125Ani soqqamaanchokkiitina; hajajokki egenneemmo gede wodancha uyie.

126Kaaliiqa ballo, mannu seerakki diigino daafira, loosokki loosattoti yanna xaati.

127Hajajokki culkunni roorse baxeemmo; filu culkinnino aleenni asse baxeemmo.

128Kunnira wogakki baala agadheemmo; so'rote doogo baala giweemmo.

129Hajajokki dhaggennite; anino wo'mu wodaninni agadheemmo.

130Qaalikki tiro xawaabba uyitanno; afa afidhinokkirirano wodancha uyitanno.

131Hajajokki lowo geeshsha goo'roommo daafira, afoo ha'ha yee he'loommo.

132Anewa higi; baxxannoherira assattonte gede aneno mararie.

133Hexxote qaalikki garinni uwatenni agarie; bushu coyi qeelannoe gede assitootie.

134Wogakki agadha dandeemmo gede, gadadissannoeri anganni gatisie.

135Muli'yara dagge maassi'rie; wogakkino rosiisie.

136Mannu seerakki diigino daafira, hindiiddo'ya wayimma lolakkanno.

137Kaaliiqa'ya, ati halaalaanchoho; yookkino taalote.

138Ati ootto seeri halaalehonna taaloho.

139Baarigaarra'ya hajajokki shotissinohura, lowo geeshsha aarame giiramoommo.

140Hexxonnihu qaalikki ximbiiwaminoho; anino lowo geeshsha baxeemmosi.

141Ani bashiloommokkihonna mishamoommoho; ikkollana wogakki dideoommo.

142Halaalaanchimmakki hegerera heedhanno; seerikkino wo'manka woyite halaaleho.

143Qarrunna yaaddo amaddinoe; hajajokki kayinni hagiirre uyitannoe.

144Hajajokki wo'manka woyite garaho; lubbotenni hee'reemmo gede wodancha uyie.

145Kaaliiqa ballo, wo'mu wodani'yanni, atewa hige raareemmona macciishshie; anino hajajokki wonsheemmo.

146Atewa hige raareemmona, macciishshite gatisie; anino hajajokki agadheemmo.

147Arrishsho fultukkinni kaa'lo afi'rate atewa hige raareemmo; oottoe qaali garinni hexxeemmo.

148Qaalekki marro hige buuxate, hashsha wo'ma la"anni galeemmo.

149Kaaliiqa'ya ballo, bagamannokkihu baxillikki daafira yite macciishshie; yookki garinni heeshshonniha assie.

150Seerikkiwiinni faffinori, okkitannoeri kaajjaddu anewa gamba yitino.

151Kaaliiqa'ya, ati kayinni ane mule nootto; hajajokki baalano halaaleho.

152Hundinni kayise hajajokki rosoommo; atino soorrantannokki gede assootto.

153Ani seerakki dihawoommo; kunnira qarra'ya la'e gatisie.

154Ane daafira coyi'rante tirie; hexxote qaalikki garinni gatisie.

155Wogakki agadhitannokki daafira, haxawarrootaho gatate hexxo dinonsa.

156Kaaliiqa'ya, maarokki lowote! Yookki garinni heeshsho'ya haaroonsi.

157Gibbannoerinna okkitannoeri batinyeho; ani kayinni hajajokkiwiinni wirri diyoommo.

158Qaalekki ayirrissannokki daafira, ate ammantinokkiriwa aana dibaxeemmo.

159Kaaliiqa'ya ballo, wogakki baxeemmota hedi; kunnira bagamannokkihu baxillikkinni heeshsho'ya haaroonsie.

160Qaalikki gudisame halaaleho; halaalaancho yookkino hegerete.

161Gashshaano beebbatenni okkitannoe; ani kayinni qaalekki lowo geeshsha ayirriseemmo.

162Lowo jajja afi're hagiidhanno manchi gede, hexxote qaalikkinni lowo geeshsha tashshi yaannoe.

163Kapho makki're giweemmo; seerakki kayinni baxeemmo.

164Halaalaancho yookki daafira, barrunni lamala hige galateemmohe.

165Seerakki baxxannorira co'o yiino keeri noonsa; horontanni mittu coyino sarraaqansara didandaanno.

166Kaaliiqa'ya, gatisaanchimmakki hexxotenni agadheemmo; hajajokkino wonsheemmo.

167Hajajokki agadheemmo; wo'mu wodani'yanni baxeemmo.

168Wogakkinna wodhokki ayirriseemmo; looseemmore baala ati afatto.

169Kaaliiqa'ya ballo, kaa'lo afi'rate atewa hige raareemmo woyite macciishshie; hexxote qaalikki garinni wodancha uyie.

170Huuccatto'ya atewa iillito; hexxote qaalikki garinni gatisie.

171Wogakki rosiisattoe daafira, wo'manka woyite galaxxeemmohe.

172Hajajokki halaale ikkitinohura, qaalikki daafira faarseemmo.

173Wogakki doodhoommo daafira, ballo kaa'lattoera wo'manka woyite qixxaawi.

174Kaaliiqa'ya, gatisaanchimmakki quqquxameemmo; seerikkino tashshi yaannoe.

175Ate galatanni hee'reemmo gede diro'ya seedisie; yookkino kaa'litoe.

176Ballehino ge'reewi gede raataawoommo; kayinnilla hajajokki hawoommokki daafira, ane soqqamaanchokki hasie.

← Chapter 118 Jump to: Chapter 120 →