Daniel 9

Sotho 1951 (BIBELE)

← Chapter 8 Jump to: Chapter 10 →

1Ka ngwaga wa pele wa pušo ya Dario morwa wa Ahasiberose wa moloko wa Bameda, yo e bego e le kgoši ya mmušo wa Bakaladea,

2Ka wona ngwaga wa pele wa pušo ya gagwe, nna Daniele ka hlokomela palo ya nywaga ye e beilwego ke lentšu la Morena la go tlela moporofeta Jeremia, ge a re: Go tlo feta nywaga e masome a šupago motse wa Jerusalema e le mašope.

3Ka iša mahlo go Modimo Mong a bohle, ka mo nyaka ka dithapelo le ka diphegelo, le ka go ikona ke apere lenkgeretla ke le moloreng.

4Ka rapela Morena Modimo wa ka, ka itshola ka re: Joo Mong a ka! Modimo e mogolo e a tšhabegago! Ba ba go ratago, le ba ba yago ka melao ya gago o dula o ba botegetše ka kwano le ka kgaugelo.

5Go sentše rena; re dirile bokgopo le bobe; re go beetše mereba ka go arogana le melao ya gago le mekgwa ya gago.

6Le gona ga ra kwa baporofeta bahlanka ba gago, ba go bolela ka ina la gago le magoši a rena le bagolo ba rena, le botatawešo, le setšhaba ka moka sa naga ya gešo.

7Toko e go wena Mong a rena! Sa rena ke difahlogo tše di llwego ke dihlong, ka ge banna ba Juda le baagi ba Jerusalema le Baisiraele ka moka ba kgauswi le ba kgole o ba leleketše dinageng ka moka ka baka la masenyi a bona a ba go rumotšego ka ona.

8E, go bjalo Morena! Se se re swanetšego, rena le dikgoši tša rena, le bagolo ba rena le botatawešo, ke tšona difahlogo tše di llwego ke dihlong, ka gobane re go senyeditše.

9Fela, Modimo Mong a rena ke yo kgaugelo le wa tebalelo, le ge re mo hlanogetše,

10ra gana go kwa se Morena Modimo wa rena a se bolelago, ra gana go ya ka melao ya gagwe, ye a e beilego pele ga rena ka bahlanka ba gagwe ba baporofeta.

11Baisiraele ka moka ba lahlile molao wa gagwe ba hlanoga, ba gana go kwa ge o bolela le bona. Molato ke wona woo, ge re tletšwe ke mahlolakotši a a ngwadilwego molaong wa Moshe mohlanka wa Modimo, ka gobane re go senyetše.

12O dirile tše o di boletšego ge o kgala babuši ba rena ba ba bego ba re buša, wa re o tlo re tlišetša kotši e kgolo, ye ka tlase ga legodimo go se tlo ba le e nngwe e lekanago le yeo e tlogo tlela motse wa Jerusalema.

13Dikotsi ka moka di re tletše bjalo ka ge go ngwadilwe molaong wa Moshe; rena ra lesa go boelana le Morena Modimo wa rena; ga ra ka ra lahla makgopo a rena; ga ra ka ra ela therešo ya gago hloko.

14Morena a eleletša tša go tliša dikotši; a di tliša godimo ga rena. Gobane Morena Modimo o ya ka toko medirong ya gagwe ka moka ye a e dirago; go sentše rena ka go se kwe ge a bolela le rena.

15Gomme bjale Morena Modimo wa rena! Wena o kilego wa ntšha setšhaba sa gago nageng ya Egipita ka seatla se maatla, wa retiša ina lago le nankhono! Rena re basenyi, re mašaedi.

16Mong a rena, le go e eya ka tokotoko, hle gomiša kgalefo ya gago e wetšego motse wa Jerusalema, Thabakgethwa ya gago; gobane ke dibe tša rena, ke molato wa botatawešo, ge motse wa Jerusalema le setšhaba sa gago di nyadiwa ke bohle ba ba dutšego tikologong.

17Gomme bjale, Modimo wa rena, kwaa thapelo ya mohlanka wa gago, ge a go kgopela. Sekgethwa sa gago sela se se phušotšwego o se edišetše sefahlogo sa gago, ka baka la gago wena Mong a rena.

18Modimo wa ka! Sekega tsebe o kwe! Lebelela o bone marope a rena, motse woo o bitšwago ka leina la gago; ka gobane, ge re bea ditopo tša rena pele ga gago, ga re bone toko ya rena; re bona dikgaugelo tše kgolo tša gago.

19Mong a rena! Re kwe hlee! Mong a rena! Lebelela hlee! Mong a rena phafoga! O dire e le go itirela wena Mong, Modimo wa ka, ka gobane motseng woo wa gago, le setšhabeng sa gago, ke mo go bolwago leina la gago.

20Ke be ke sa rapela ke kgopela ke ipobola dibe tša ka le dibe tša setšhaba sa gešo sa Isiraele, ke bea ditopo tša ka pele ga Modimo wa ka ka baka la thaba e kgethwa ya Modimo wa ka.

21Ke sa rapela ke realo, gwa tla monna yola Gabriele, yo ke mmonego ponong yela ya mathomo; a tla a fofa a hlaganela, a tla kgauswi, e le lebaka la sedimo sa mantšiboa.

22A bolela le nna a re: Daniele! Nna bjale ke tlile gore ke go rute go lemoga.

23Lentšu le ke tlilego go go botša lona le tšweletše mola o thoma go rapela; ka gobane o moratiwa. Theetša gee, o hlaloganye tša dipono.

24Ke dibeke tše masome a šupago tše di beetšwego setšhaba sa geno le motse wa geno o mokgethwa, gore go fedišwe dikarogo, go lebalwe dibe, go dirwe poelano, go tšweletšwe toko ye e sa felego, go phethege dipono le diporofeto, go tle go kgakolwe Sekgethwakgethwa.

25Bjale tseba o kwešeše; go tloga ka lebaka la ge lentšu la go re Jerusalema go buše go agiwe go fihla go Motlotšwa Moetapele, ke beke tše di šupago. Ka beke tše masome a selelago a metšo e mebedi go tlo agiwa merako le mekgoba; fela, e le mehla e methata.

26Ge go fetile dibeke tše masome a selelago a metšo e mebedi, Motlotšwa o tlo tlošwa, a se ke a hlwa a eba gona; gomme motse le Sekgethwa di tlo senywa ke setšhaba sa kgoši e tlogo tla, ye e tlogo fela ka go gogolwa ke lefula; mme go fihla mafelong go tlo dula go na le dintwa le go thubiwa.

27Ba bantši o tlo ba thatafaletša kgwerano beke e tee; bogareng ga beke o tlo kgaotša sedimo le sebego, mme mosenyi o tlo tla ka diphego tša makgapha; yena mosenyi a tlo ba a tšhologelwa ke kotlo ye e mmeetšwego.

← Chapter 8 Jump to: Chapter 10 →