Esther 3

Sotho 1951 (BIBELE)

← Chapter 2 Jump to: Chapter 4 →

1Ditaba tše ge di diregile, kgoši Ahasiwerosi a godiša Hamani morwa wa Hamedatha wa Agagi, a mo dira e mogolo, sedulo sa gagwe a se bea pele ga bakgoma bohle ba gagwe.

2Bahlanka bohle ba kgoši ba ba bego ba le mošate ba khunama ba lotšha Hamani; Morodekai yena a se ke a khunama a inamela fase.

3Bahlanka ba kgoši ba kgorong ya mošate ba bolela le Morodekai ba re: O reng o nyatša molao wa kgoši?

4Ba fela ba realo ka mehla, yena a sa kwe; ba ba ba botša Hamani taba ye gore ba bone ge mantšu a Morodekai a ka tia; ka gobane o be a ba boditše a re: Ke Mojuda!

5Bjale Hamani ge a bona Morodekai a sa khuname a mo lotšha, a tlalwa ke pelo.

6Gomme a nyatša go ka swara Morodekai a nnoši, ka gobane ba be ba mmoditše setšhaba sa ga boMorodekai; mme a eleletša go fediša Bajuda ka moka ba mmušong wa Ahasiwerosi ka ge e le ba ga Morodekai.

7Bjale ka kgwedi ya pele ya Nisani ka ngwaga wa lesome la metšo e mebedi wa pušo ya Ahasiwerosi, ba thoma go laola ka ditaola pele ga Hamani; ba fela ba dira bjalo ka mehla, ya ba gwa fela dikgwedi gwa tla ya lesome la metšo e mebedi ya Adara.

8Ke mo Hamani a boletšego le kgoši Ahasiwerosi a re: Go na le setšhaba se se dutšego se gašane gara ditšhaba tša mmušo wa gago ka moka; molao wa sona ga o swane le molao wa ditšhaba tše dingwe; le gona ga se dire ka molao wa kgoši. Ga go a swanela kgoši ge batho bao ba ka fo leswa.

9Ge kgoši e ka dumela, a go ngwalwe lengwalo la gore ba fedišwe. Gomme nna ke tlo ntšhetša bahlanka ba kgoši disilifera tše e ka bago diponto tše diketekete tše tharo le makgolo a šupago a nago le masome a mahlano a dikete, tša tšhelwa mo polokelong ya mahumo a kgoši.

10Ke mo kgoši e rotšego palamonwana seatleng sa yona, ya e nea Hamani morwa wa Hamedatha wa Agagi, lenaba leo la Bajuda.

11Kgoši ya bolela le Hamani ya re: Tšhelete yeo e tlo ba ya gago; le setšhaba seo ke se gafetše wena, gore o se dire ka mo o ratago.

12Ke moka bangwadi ba kgoši ba bitšwa ka tšatši la lesome la metšo e meraro la kgwedi ya pele; gwa ngwalwa tšohle tse Hamani a di bolelago; tša ngwalelwa bakgoma ba kgoši le babuši ba dinaga ka moka, ka mmolelo wa setšhaba se sengwe le se sengwe; gwa ngwalwa ka leina la kgoši Ahasiwerosi; gwa gatišwa ka seka sa palamonwana ya kgoši.

13Mangwalo ao a išwa dinageng ka moka tša kgoši ka bakganyeši, gwa thwe; Bajuda ka moka, ba bafsa le ba bagolo, le bana le basadi, ba fedišwe, ba bolawe, ba senywe ka tšatši letee la lesome la metšo e meraro la kgwedi ya Adara, mme thoto ya bona e tšewe ka moka.

14Gomme lengwalo le be le re: Go bewe molao dinageng ka moka, o goelelwe ditšhabeng ka moka, gore ba itokišetše tšatši leo.

15Bakganyeši bao ba wela tsela ba kitima ka ge ba romilwe ke kgoši. Gomme molao woo wa goelelwa le mo Susani motseng wa mošate. Ge e le kgoši le Hamani ba be ba duletše go nwa, mola motse wa Susani ka moka o gakanegile.

← Chapter 2 Jump to: Chapter 4 →