Esther 6

Sotho 1951 (BIBELE)

← Chapter 5 Jump to: Chapter 7 →

1Bošego bja mohla woo kgoši ya lala ya felelwa ke boroko, ya laela gore go tlišwe puku ya ditaba tša kgale; gomme puku yeo ya balwa pele ga kgoši.

2Gwa hwetšwa go ngwadilwe tša ge Morodekai a nago a sebela ba mošate tša ge Bikithani le Therese bahlanka bala ba babedi ba mošate baletakgoro, ba bego ba lakane go iša kgoši Ahasiwerosi diatla.

3Kgoši ya botšiša ya re: Morodekai ge a dirile tšeo o lebogilwe kang, a godišwa kang? Masogana a bego a hlankela kgoši a re: Aowaa, ga a newa selo.

4Kgoši ya re: Fao lapeng go mang? Gobane lapeng la ngwako wa kgoši go be go eme Hamani, a tlile go botša kgoši gore Morodekai a fegwe kwateng ye a bego a e tsemile.

5Masogana a fetola a botša kgoši a re: Hamani šoo ka lapeng! Kgoši ya re: A a tsene.

6Hamani a sa tsena, kgoši ya mo rera ya re: Monna yo kgoši a ratago go mo godiša a ka dirwa bjang? Hamani ka pelong ya gagwe a re: Yo kgoši e ratago go mo godiša e ka ba mang ge e se nna!

7A fetola a botša kgoši a re: Monna yo kgoši a ratago go mo godiša,

8e ka kgona go tlišwe seaparo sa bogoši se se aparwago ke kgoši, le pitsi e namelwago ke kgoši, a rwešwe mofapahlogo hlogong ya gagwe.

9Gomme seaparo seo le pitsi di neelwe seatleng sa e mongwe wa bakgoma ba kgoši, e mogolo wa bona. Mme monna yo kgoši e ratago go mo godiša, a apešwe seaparo seo, a sepedišwe mapatlelong a motse a nametše pitsi yeo; gomme pele ga gagwe go hlabiwe mokgoši, ba re: Tšona tše ke tše di dirwago monna yo kgoši a ratago go mo godiša!

10Ke ge kgoši e botša Hamani ya re: Napa o tšee seaparo seo le pitsi yeo, gomme tše o di boletšego o di dire Morodekai Mojuda e a dutšego kgorong ya kgoši. O se ke wa lebala le setee sa tše o di boletšego.

11Ke moka Hamani a tšea seaparo le pitsi, a apeša Morodekai a mo nametša pitsi, a mo sepediša mapatlelong a motse, a hlaba mokgoši a mo etile pele a re: Tšona tše ke tše di dirwago monna yo kgoši e ratago go mo godiša!

12Morodekai a kgono boela kgorong ya kgoši; Hamani yena a akgofa a tloga a ya ngwakong wa gagwe a senyegile pelo, a khurumetše hlogo.

13A tla a laodišetša Seresa mosadi wa gagwe le bagwera ba gagwe tšohle di mo diregetšego. Bahlalefi bao le Seresa mosadi wa gagwe ba mmotša ba re: Ge Morodekai yeo o thomilego lehono go mo lotšha, e le wa mohuta wa Bajuda, o ka se ke wa ba wa mo kgona, o tlo ba wa mo lotšha sa ruri.

14Ya re ba sa bolela le yena gwa tla bahlanka ba mošate, ba hlaganela ba iša Hamani selalelong se Esitere a se lokišitšego.

← Chapter 5 Jump to: Chapter 7 →