Genesis 8

Sotho 1951 (BIBELE)

← Chapter 7 Jump to: Chapter 9 →

1Bjale Modimo a gopola Noage, le diphoofolo ka moka, le diruiwa ka moka, tše di bego di na le yena mo polokelong; a roma phefo ya foka mo lefaseng; meetse a na a boela.

2Methopo ya bodiba ya thibja, le maroba a legodimo a thibja; le pula ya seretla ya legodimo ya khudišwa.

3Meetse a mo lefaseng a boela, a fela a boela a eya; a thomile go phohlela ge go fedile ona matšatši a lekgolo le masome a mahlano.

4Polokelo ya tla ya ema mo dithabeng tša Ararate ka tšatši la lesome le metšo e šupago la kgwedi ya go šupa.

5Meetse a fela a phohlela a eya go fihla kgweding ya lesome. Ka yona kgwedi ya lesome, ka tšatši la pele la yona, dintlha tša dithaba tša napa tša bonala.

6Ya re go fetile matšatši a masome a mane, Noage a bula lešoba la mo polokelong, le a le dirilego.

7A ntšha legukubu; lona la fela le fofa le boaboa, meetse a ba a pšha mo lefaseng.

8A tsebo ntšha leeba, gore a bone ge meetse a epšha mo lefaseng.

9Leeba lona la hloka bogato mo le kago tsokama gona, la boela mo polokelong, ka gobane meetse a be a sa le gona lefaseng ka moka. Noage a ntšha seatla, a le swara, a le bušetša polokelong.

10A dula gape a fetša matšatsi a šupago, a buša a ntšha leeba polokelong.

11Lona le la boela go yena ka mantšibuoa, ba kgotsa le swere letlakala le lefsa la mohlware ka molomo. Ya ba gona Noage a tsebago gore meetse a a pšha mo lefaseng.

12A dula gape matšatši a mangwe a a šupago, a ntšha gape leeba: lona le la se hlwe le boela go yena.

13Ka tšatši la pele la kgwedi ya pele ya ngwaga wa makgolo a selelago le motšo o tee meetse a be a gopile lefaseng. Ke mo Noage a rutlilego dirulelo tša polokelo, a lebelela a bona ge lefase le oma.

14Ka 'tšatši la masome a mabedi le metšo e šupago la kgwedi ya bobedi lefase la ba le omile.

15Bjale Modimo a bolela le Noage a re:

16Tšwaa mo polokelong, wena le mosadi wa gago, le barwa ba gago, le basadi ba barwa ba gago ba ba nago le wena.

17O lese go tšwe diphoofolo ka moka tše di lego go wena, tša nama efe le efe, le dinonyana le diruiwa, le digagabi tše di gagabago lefaseng, di tšwe le wena, di tlale mo lefaseng, di ate di ntšifale mo lefaseng.

18Ke mo Noage a tšwilego a na le barwa ba gagwe, le mosadi wa gagwe, le basadi ba barwa ba gagwe.

19Le diphoofolo ka moka, le digagabi ka moka, le dinonyana ka moka, le nyabanyaba ka moka ya mo lefaseng; ka moka tša tšwa mo polokelong di eya ka mehuta ya tšona.

20Noage a agela Morena aletare, a ntšha tše dingwe go diruiwa ka moka tše di sa ilwego, le go dinonyana ka moka tše di sa ilwego, a dira dihlabelo mo aletareng.

21Morena a natefelwa ke monko o mobose, mo pelong ya gagwe a re: Nka se ke ka boela ke roga lefase ka baka la motho gobane diakanyo tša pelo ya motho e le tše mpe go tloga bjaneng bja gagwe. Nka se ke ka boela ke dira se ke se dirilego ge ke bolaya tšohle tše di phelago.

22Bjale le mehleng yohle ya lefase go ka se ke gwa hlwa go kgaotša go bjala le go buna, le maruru le go fiša, le lehlabula le marega le mosegare le bošego.

← Chapter 7 Jump to: Chapter 9 →