Job 31

Sotho 1951 (BIBELE)

← Chapter 30 Jump to: Chapter 32 →

1Mahlo a ka ke lakane nao ka re: Nka se kganyoge kgarebe.

2Gobane kabelo e tšwago go Modimo godimong e tla ba efe? Le bohwa bja Yomaatlaohle e ka bang?

3A ga se kotši ye e swanetšego yo mobe? A ga se bošula bo tlelago ba go dira dibe?

4A ga se yena a bonago tsela tša ka, a balago kgato tša ka tšohle?

5Ge nka be ke sepetše tsela ya lefela, ge dinao tša ka di ka be di kganyetše tša bofora,

6gona a nke ke elwe ke kelo ya go loka, Modimo a mpone go hloka bosodi.

7Ge dinao tša ka di fapogile tselatsela, ge pelo ya ka e ka be e latetše mahlo a ka, ge atla tša ka di gomaretšwe ke ditšhila,

8gona a ke bjale, mme di lewe ke yo mongwe, go tomolwe tše ke di šemilego mme tša mela.

9Ge pelo ya ka e ka be e gokilwe ke mosadi, ka khukhunela mojako wa wa gešo,

10gona mosadi wa ka a a yo šilela o šele, a a yo tsenelwa ke ba bangwe,

11gobane ge go ka be go na le bohlola bjoo, go ka be go na le molato wo o lebanwego ke dikotlo.

12E ka be e le mollo o tšhumago go fihla kua sekoting, o tomotšego modu wa mahumo a ka ohle.

13Ge nka be ke ganne mohla ke belwa molato ke mohlanka wa ka wa monna goba wa mosadi,

14nka be ke tlo dira bjang ge Modimo a ka tsoga? Nka be ke fetola ka lefe ge a ka ntshekiša?

15A ga ke re e a mpopilego popelong o bopile le yena? A ga se o tee e a re dirilego ra belegwa?

16Ge nka be ke kunne mmotlana, ka ribamiša mahlo a mohlologadi,

17ge nka be ke lle tshola tša ka ke eši, ke sa ka ka ngwathela sešuana,

18gobane go tloga mola ke sa le e mofsa se goletše go nna ke le tataso; ke moekeledi wa ba bjalo go tloga bjaneng.

19Ge nka be ke bone mošaparegi a hlokago kobo, le modiidi a hlokago seaparo,

20mme matheka a gagwe a se nteboge a ruthetšwe ke boya bja nku tša ka,

21ge nka be tsogo la ka ke le akgetše sešuana ka go bona ke emelwa kua kgorong,

22gona tsogo la ka a le kgolwe legetleng, marapo a sefaka sa ka a robege,

23ke mo nka bego ke boifa kotlo ya Modimo, ka palelwa ke bogolo bjagwe.

24Ge nka be ke botile digauta, ka re: Gauta, ke go holofetše!

25Ge nka be ke thabetše bontši bja mahumo, mola atla tša ka di sa ruile kudu,

26goba ka bona seetša se phadima, le kgwedi e sepela e tagile,

27mme pelo ya ka ya iphora ka diphiri, ka atla molomo ka seatla sa ka,

28ke mo le tšona tšeo e ka bego le molato moobakotlo, ka gobane nka be ke hladile Modimo wa magodimong.

29Ge nka be ke thabetše tšhego ya lenaba la ka, ka hlalala mohla a hweditšwe ke mahloko,

30fela, ga ka dumelela gano la ka sebe; ga ka mo theola ka re a hwe.

31Ba lapa la ka ge ba sa ke ba re: O kae e a sa kago a khora nama tšagwe?

32Moeti o be a sa lale ntle; sefero sa ka se be se bulelwa ba tseleng.

33Ge nka be ke bipile phošo tša ka boka batho, ka uta molato pelong,

34ka dira tšeo ka go šia batho e le ba bantši, ke boifa nyatšo ya meloko, ka ikhomolela ke se tšwe ngwakong.

35A mola nka be ke na le a nkwago, bohlatse bja ka šobo; Yomaatlaohle a a mphetole. A nka be go na le lengwalo la e a mpegago!

36Ruri, nka be ke le rwala ka magetla a ka; nka be ke le dira mphapahlogo.

37Nka be ke mmalela palo ya dikgato tša ka, ka mmatamela bjalo ka mokgoma.

38Ge tšhemo ya ka e ka be e mpega; ge tema tša yona ka moka di ka be di lla,

39ka ge ke lle makhura a yona ke sešo ka a reka, mme beng ba yona ke ba nyamišitše pelo,

40gona a ke melelwe ke meetlwa bakeng sa mabele, a go mele ngwang bakeng sa leotša. Go fedile dipolelo tša Jobo.

← Chapter 30 Jump to: Chapter 32 →