Malachi 2

Sotho 1951 (BIBELE)

← Chapter 1 Jump to: Chapter 3 →

1Bjale lena baperisita, taelo e le lebanego še:

2Ge le sa theetše, le sa ele hloko gore ina la ka le godišwe, -- o realo Morena wa mašaba, -- gona ke tlo le lahlela la mahlolakotsi; ditšhegofatšo tša lena ke tlo di phekgola, mme tša ba mahlolakotsi. Ke šetše ke dirile tšeo, ka ge le se ne mogopolo.

3Tsebang gobane ke rogile peu ya lena; difahlogo tša lena ke di gaša tšhila, tšhila tša menyanya ya lena, gore le gogolwe le na natšo.

4Ke mo le tlogo tseba ge ke le rometše tayo ye, gore kgwerano ya ka le Lefi e dule e le gona. -- O realo Morena wa mašaba. --

5Yona kgwerano yeo ke e tlemilego le yena, e be e le ya bophelo le molao. Ke mo file tšona gore a boife; mme a mpoifa a šia ina la ka.

6Molomong wa gagwe go be go le thuto ya therešo; molomong wa gagwe go be go sa hwetše la go fora; o be a sepela le nna a iketlile, a swere tsela ya go loka, mme a gomiša ba bantši bokgopong.

7Gobane molomo wa moperisita ke wa go lota tsebo; thuto batho ba e nyaka molomong wa gagwe, gobane ke yena motseta wa Morena wa mašaba.

8Fela, lena le lahlile tsela, le kgopišitše ba bantši ka ya lena thuto, la senya kgwerano ya Lefi. -- O realo Morena wa mašaba. --

9Le nna bjale ke le dira ba go nyatšwa le ba go gerulwa ke setšhaba ka moka; ka gobane le sa ka la šetša tsela tša ka, mme la ruta batho le ba beba difahlogo.

10A tatawešo wa rena bohle, a ga se o tee? A ga ra bopša ke Modimo o tee? Bjale ke ka baka lang ge le hlanogelana, motho a lahla ngwanabo, ra senya kgwerano ya botatawešo?

11Juda a hlanoga, bohlola bja dirwa ke Isiraele le Jerusalema; Juda a goboša Ntlokgethwa ya Morena, ye a bego a e rata. O tšere ngwanana wa modimo o šele.

12Monna wa go dira tšeo, Morena o tlo mo hlokiša wa go mo dumediša le go mo araba, le wa go mo išetša sebego go Morena wa mašaba.

13Se sengwe se le se dirago sese: Le apeša aletare ya Morena ka megokgo le ka dillo le ka diphegelo, Morena a se hlwe a kgona go bona dipego tša lena le go amogela di kgahlago di etšwa atleng tša lena?

14Bjale le re: Molato ke eng? Molato šo: Ke ka gobane Morena e le hlatse ya mola o kwana le mosadi wago le sa le ba bafsa, mme wa napa wa mo lahla, mola e le wa moloko weno, e le mosadi wago ka dikeno.

15Ga go sa le yo mongwe le o tee, e a kago dira tšeo ge a sa šaletšwe ke kgopolo; mme yo semene yo o kgopela peu go Modimo! Itoteng kgopolo! Mme wena o se hlale mosadi e o mo tšerego le sa le bafsa.

16Gobane Morena Modimo wa Isiraele o re: Tlhalo ke e hloile; ke hloile yo a senyago kobo yagwe ka bošoro. -- O realo Morena wa mašaba. -- Ke gona itoteng kgopolo, le lese go hlala.

17Morena le mo lapišitše ka polelo tša lena. Bjale le re: Re mo lapišitše kang? -- Ka go re: Le modirabobe mang le mang, le re Morena o bona e le yo bolo; le re o a mo thabela; le re: Hleng Modimo mosekišamotho re sa mmone!

← Chapter 1 Jump to: Chapter 3 →