Malachi 3

Sotho 1951 (BIBELE)

← Chapter 2 Jump to: Chapter 4 →

1Ke nna e, ke roma motseta wa ka, gore a nthulele tsela; gomme mong a lena yo le mo nyakago o tlo tloga a etla Ntlongkgethwa ya gagwe, yena Motseta wa kgwerano yo le mo thabelago. Tsebang, o etla! O realo Morena wa mašaba.

2Gomme ke mang a tlogo kgotlelela tšatši leo la go tla ga gagwe? Ke mang a tlogo ema mohla a bonalago? Gobane o tlo tla bjalo ka mollo wa meubeng, le bjalo ka mosehlo wa mohlatswi.

3Go tlo dula moubedi wa go tološa tshipitshehla gore e tšwe. Barwa ba Lefi o tlo ba ntšha tšhila, a ba ntšha manyedi boka tshipi e khubedu le e tshehla. Ke mo ba tlogo tliša dibego tša Morena ba lokile.

4Ke mo dibego tša ga Juda le Jerusalema di tlogo thabelwa ke Morena, boka mola kgale mehleng ya bogologolo.

5Ke mo ke tlogo le sekiša sekgauswi, ka napa ke eba hlatse ya go tšwa baloi, le diotswa, le baenamaaka, le ba go pata mohlanka, ba go hlakiša mohlologadi le tšhuana, ba go senya taba tša modiiledi, ba dira ba sa mpoife. -- O realo Morena wa mašaba. --

6Gobane nna Morena ga ke thiše; ke sona se se phemetšego lena ba Jakobo go fedišwa.

7Go tloga mehleng ya borraweno le fapane le melao ya ka; ga le e ele hloko. Boelang go nna, ke tsebo boela go lena! -- O realo Morena wa mašaba. -- Mme lena le re: Re boele go wena kang?

8A Modimo o a forwa? Mme lena le a mphora. Bjale le re: Re go fora kang? Le mphora ka karolo ya lesome, le ka lekgetho.

9Le phethegetšwe ke mahlolakotsi a a boletšwego; ka gore le a mphora, setšhaba ka moka.

10Tlišang karolo ya lesome la ruri ngwakong wa polokelo, gore Ntlong ya ka go be le diphepi. Napang le nteke ka go dira bjalo; -- o realo Morena wa mašaba, -- Le bone ge ke bula nthoba tša legodimo ka le tšhollela tšhegofatšo wa go tlo le golela,

11Ke le thibelela diji, di se le senyetše kenyo ya mašemo, le merara mašemong a lena e se opafale. -- O realo Morena wa mašaba.

12Ke mo tšhaba tšohle di tlogo re le bašegofatšwa, Le ne naga ye e thabišago. -- O realo Morena wa mašaba. --

13Le mpoletše ka tše thata. -- O realo Morena. -- Mme lena le re: Re go boletše ra reng?

14Le boletše la re: Modimo, ke lefela ge re mo hlankela; la re: Re boelwa ke eng ge re hlokomela mekgwa yagwe, ge re fela re sepela pele ga Morena re apere boso?

15La ba la re: Bjale rena re re ba mašoto ke ba ipotilego; go agišwa ba dirago dibe; le ge ba leka Modimo, ba a phologa.

16Bašia-Modimo, ge bona ba boledišana, Morena o a theetša, o a di kwa; mme ba ba mmoifago ba ngwaletšwe puku ya kgopotšo pela gagwe, ya ba sa lebalego ina lagwe.

17E tlo ba batho ba ka! -- O realo Morena. -- Ka lona tšatši leo ke le beilego ba tlo ba lehumo la ka; ke tlo ba setša boka motho ge a setša morwa wagwe a mo direlago.

18Gona le tlo buša le hlatha moloki le e a sa lokago, le hlaologanya modirela-Morena le e a sa mo direlego.

← Chapter 2 Jump to: Chapter 4 →