Zephaniah 1

Sotho 1951 (BIBELE)

Jump to: Chapter 2 →

1Lentšu la Morena la go tlela Tsefanya morwa wa Kushe morwa wa Gedalia morwa wa Amaria morwa wa Hiskia, la mehleng ya Josia morwa wa Amoni kgoši ya Juda.

2Ke tlo okola, ka okola tšohle tše di lego lefaseng. O realo Morena.

3Ke tlo okola batho le dikgomo. Ke tlo okola dinonyana tša legodimo le dihlapi tša lewatle, le kgopišo le basenyi, ka fediša batho ka ba tloša mo nageng -- O realo Morena. --

4Tsogo la ka ke tlo le akgela Juda, le bohle ba Jerusalema. Tše di šetšego e sa le tša Baali, ke tlo di fediša felo fa, le maina a dingaka le bomphamodimo,

5Le bakhunamedi ba makoko a leratadima, ba le godimo ga nywako, le ba go khunama ba ena ka Jehofa mme ba ena le ka Milikomo,

6Le bahlanogi bahlala-Morena, le ba go lesa go mo nyaka le go tla go yena.

7Homolang fa pele ga Morena Mong a bohle, gobane tšatši la Morena le kgauswi. Morena o beile tšatši la monyanya, malalediwa agwe o a kgethile.

8Tše di tlogo direga mohla woo wa monyanya wa Morena šidi: Ke tlo sola ba bagolo le bakgomana, le bohle ba ba aperego diaparo tša bantle.

9Le gona mohla woo ke tlo sola baselaserepodi (1 Sam. 5:5) ba go tlatša ngwako wa Modimo wa bona ka tša šiši le bofora.

10Mohla woo e tlo ba wa mekgoši go tloga kgorong ya dihlapi, e tlo ba wa go jajarega motseng o mofsa, le wa mašegerepe a magolo mebotong.

11Bokollang lena ba moedi wa lwaleng, gobane setšhaba ka moka sa babapatši se tlo fela, babadi ba mahumo ba tlo loba.

12Mohla woo fa Jerusalema ke tlo go fenyeka ka dipone; ke tlo sola ba ba dulelago bjalwa, dipelong tša bona ba re: Morena ga a setše, ga a hlokofatše.

13Ba tlo di bona ba hlakotšwe maruo a bona, nywako ya bona e phušutšwe. Ba tlo aga nywako ba se dule; ba tlo lema tšhemo ya merara, ba se nwe mananose a yona.

14Le kgauswi, tšatši le legolo la Morena! Le kgauswi! Le tla ka lebelo le legolo! Kwang! Ke letšatši la Morena, leo le mogale a tlogo lla o bohloko ka lona.

15Tšatši leo e tlo ba letšatši la kgalefo, tšatši la tlalelo le la pitlagano tšatši la go senyegelwa le la go šwalalanywa, tšatši la leswiswi, la swiswi le legolo, tšatši la maru, la maru a maso,

16Tšatši la mollo wa diphalafala le mekgoši, le go hulwa metse ya merako, le dibo dithabeng.

17Batho ke tlo ba tlaletša, ba tlo apaapa wa difofu, e le ka gore ba sentše ba lahla Morena. Bjale madi a bona a lahlwa bjalo ka maudi, nama ya bona e lahlwa boka tšhila.

18Mohla woo wa kgalefo ya Morena mahumo a masehla le a tshipi e khubedu a ka se kgone go ba namolela, ge mollo wa bogale bjagwe o tšhuma naga yohle; gobane o tlo fetša baagi bohle ba lefase, a ba feletša ruri.

Jump to: Chapter 2 →