Zephaniah 3

Sotho 1951 (BIBELE)

← Chapter 2 Jump to:

1Joo! Motse wa bonganga le ditšhila le sehlogo!

2O gana ge o botšwa; ga o dumele go kgalengwa; o lesa go bota Morena; ga o batamele wa tla go Modimo wa wona.

3Bakgomana ba gona ke ditau di rorago; baahlodi ba gona ke diphiri tša bošego, di sa šadišego molatšana.

4Baboni ba gona ke baratharathi, ke banna ba mamenemene; bomphamodimo ba bona ba goboša Ntlokgethwa, mme ba senya thuto.

5Morena, yena Moloki, o mo motseng wa gagwe: ga a dire se se sa lokago; molao wa gagwe o o tšweletša seeding ka mehla e sa le bosasa, ga a hlaetše. Fela, yo mobe ga a tsebe hlong.

6Tše dingwe ditšhaba ke di fedišitše, gwa phušolwa metse ya bona ya dibo, mebila ya wela kgwahlana, gwa hlokwa mofeti. Metse ya bona e hwile; ga go motho, ga go na e a e agago.

7Nna ka re: Ge e le wena o tlo mpoifa; o tlo dumela go kgalengwa, gore motse wo o se fedišwe, ka tše ke bego ke o sola ka tšona. Fela, bona ba phegelela go befiša mediro ya bona ka moka.

8Bjalogee, dulang le ntebeletše, -- o realo Morena, -- go be go tle tšatši le ke tlogo tsoga ka lona ke le hlatše; ka gobane ke wona moahlolelo wa ka: Ke phutha ditšhaba, ke botha mebušo, ka e tšhela ka kgalefo ya ka, ka tuka bogale sa ruri, e le mollo wa sehutla wa go tšhuma fase lohle.

9Ka kgonthe, mohla woo ke tlo nea baditšhaba melomomesekegi, gore ka moka ba bole ina la Morena, ba mo hlankela seotlo.

10Barapedi ba ka ba tlo tlišwa ba etšwa mošola wa dinoka tša kua Kushe, e le bana ba ka ba bafaladi, e le ba go ipega ka bona.

11Mohla woo o ka se hlwe o lewa ke dihlong ka tše o bego o di dira, tša mola o ntlhala; ka gobane mo go wene ke tlo tloša ba ba bego ba go kwera, ba ikgogomoša, mme o ka se hlwe o ikgodiša ka thabakgethwa ya ka.

12Mo go wene ke tlo ba ke šadišitše batho ba go ipoetša, babotlana, ba go bota ina la Morena.

13Mašalela a Isiraele a ka se hlwe a dira bobe; a ka se hlwe a bua maaka, mo ganong ga bona go tlo hlokwa leme la go fora; ka gobane ba tlo ba mohlape wa go fula wa hutama, go se se se o tšhošago.

14Hee ngwanenyana wa Tsione! Hlalala! Hee Isiraele! Goloka! Hee ngwanana wa Jerusalema! Thaba o hlakele ka pelo ka moka.

15Gobane Morena o gomišitše tše a bego a go ahloletše tšona, a raka lenaba la gago. Morena Kgoši ya Isiraele o gare ga lena. O ka se hlwe o bona tša bošula.

16Mohla woo Jerusalema go tlo botšwa gwa thwe: Tsione, se boife; o se kebiše atla tša gago.

17Morena Modimo wa gago o gare ga lena, Mogale Mophološi; o tlogo thabela wa go thaba, o tlo wa pelo a go rata, a go hlalalela gare ga mekgolokwane.

18Ba ba nyamilego ba le kgole le monyanya, ke tlo ba kgobela; ke ba geno ba ilalo ba rwele nyatšego.

19Ke nna e! Mehleng yeo ke tlo kokobetša ba ba go hlakišago, ka hlakodiša ba hlotšago, ka ba dira ba go retwa dinageng ka moka, mo ba bego ba nyadiwa.

20Mehleng yeo ke tlo le goroša. Mehleng yeo ke tlo le kgobela. Ke tlo dira ba maina a go retwa ditšhabeng ka moka tša lefase; e tlo ba go buša ba ba thopilwego ba ba geno, le ba bona ka mahlo. -- O realo Morena. --

← Chapter 2 Jump to: