Hosea 10

Sotho 2000 (BIBELE Taba yea Botse)

← Chapter 9 Jump to: Chapter 11 →

1Baisraele ba kile ba swana le morara wo o entšwego kudu. Ya re ge ba atlega bjalo, ba atiša le dialetare tša medimo ya diswantšho. Ge monono wa naga o tšwelela, ba tšweletša le botse bja dikokwane tša maswika tše ba di khunamelago.

2Batho ba pelo tša bonokwane bjale ba tlilo otlwa. Morena o tla kgereša dialetare tša bona, le dikokwane tša bona tša maswika o tla di pšhatlaganya.

3Ke moka ba tla re: “Ga re na kgoši ka ge re sa tšhabe Morena. Fela kgoši yona e be e ka re direlang?”

4Ba ipolelela ditšiebadimo, ba ikana ka maaka, ba gwerana le ditšhaba tše dingwe. Tshekong ba sekamiša toka ya ba bjalo ka boori bolemeng.

5Badudi ba Samaria ba tshwenyegile ka modingwana wa bona wa namane wa kua Bethe-Abene. Bona le baprista ba ba hlankelago modingwana woo ba tla o llela, ba golola ge o humolotšwa bothakga bja wona bja gauta.

6Modingwana woo wona o tla thothelwa Asiria ya ba seloba go kgošikgolo. Baisraele ba tla gobošwa ba hlabišwa dihlong ka baka la mathaithai a bona.

7Motse wa Samaria o thubilwe. Kgoši ya gona e tla thopša ya etša phatša ya legong ye e tšewago ke noka.

8Dintotoma tša Abene, moo Baisraele ba dirago dibe, di tla phatlalatšwa. Godimo ga dialetare tša bona go tla mela mehlašana ya meetlwa le ditshehlo. Ya ba mo batho ba goelelago dithaba ba re: “Re weleng godimo!” Ba goelela meboto ba re: “Re pipeng!”

9Morena o re: “Baisraele e sa le ba ngangabalela sebeng go tloga mola ba le Gibea, mme ba no tšwela pele bjalo. Ka gona, ba tla rakelelwa ke manaba gona kua Gibea.

10Ke tla ba hlasela ka ba otla. Ditšhaba di tla ba thika tša ba otlela dibe tša bona tše pedi.

11“Baisraele ke sethole se se rutantšhitšwego, se se ratago go fola mabele. Ka gona nna ka sebele ke tla se bea joko molaleng wa sona wo mobotsana, ka se pana. Bajuda ke tla ba lemiša, ditlogolo tša Jakobo tšona ke tla di thubiša makwate.

12Ipšaleleng peu ya toka, ke mo le tlago buna leratorato. Ikgatheleng lehwiti, gobane ke nako ya gore le nnyake, nna, Morena, gore ke tle ke le nešetše ditšhegofatšo boka pula.

13Lena le bjetše bobe la buna dikenywa tša bjona. Le lle dikenywa tša maaka a lena. “Ka ge le ikantše dikoloi tša lena tša ntwa le bontši bja bagale ba gabolena,

14setšhabeng sa gabolena go tla kwagala mašata a ntwa, gomme dibo tšohle tša lena di tla thubja. Go tla etša mohla wola Kgoši Shalmane a thuba motse wa Bethe-Arbeele ka ntwa, gomme bommagobana le bana ba bona ba tlapiriganywa.

15Ke tše di tlago le hlagela, lena ba Bethele, ka baka la bobe bjoo bja lena bja go šiiša. Kgoši ya Israele e tla bolawa ntweng e sa le ka masa.”

← Chapter 9 Jump to: Chapter 11 →