Hosea 5

Sotho 2000 (BIBELE Taba yea Botse)

← Chapter 4 Jump to: Chapter 6 →

1“Ekwang taba še, lena baprista! E eleng hloko, lena setšhaba sa Israele! Theeletšang, lena ba lapa la mošate! Ke a le ahlola gobane le fetogile molaba kua Mitsepa. Ke lena lelokwa le le theilwego thabeng ya Taboro.

2Ke lena molete wa go iša wo o epilwego motseng wa Shitime, gomme ke tla le otla ka moka ga lena.

3Baisraele ke ba tseba gabotse – ba ka se nkhutele. Ga se ba mpotegela, gomme ba tšhilafetše.”

4Ditiro tša bona tše mpe di ba šitiša go boela go Modimo wa bona, gobane ba gogwa ke tumo ya go khunamela medimo e šele, gomme ga ba amogele Morena.

5Boikgantšho bja bona bo a ba wetša. Dibe tša bona di a ba kgopa, Bajuda le bona ba kgopša nabo.

6Le ge ba ka ya go nyaka Morena ba gapa dihuswane le dikgomo tša go mo direla dihlabelo, ba ka se mo hwetše ka ge a ba ngadile.

7Ba be ba sa mmotegele, gomme le bana ba bona ga ba mo khunamele. Ka gona, bona le mašemo a bona bjale ba tlilo fedišwa ka Monyanya wa Lebalana.

8Letšang phalafala kua Gibea, le lepatata kua Rama! Hlabang mokgoši kua Bethe-Abene! Eyang ntweng, lena banna ba Benjamene.

9Mohla Morena a le otla, lena Baisraele, naga ya lena e tla šala e le lešoka. Lena dikgoro tša Israele, ke le begela se se tlilogo hlaga.

10Morena o re: “Baetapele ba Juda ba šwahletše naga ya Israele. Ka gona, ke tla tšhollela kgalefo ya ka godimo ga bona ya etša lefula.

11Baisraele ba gateletšwe, ba tlaišega kudu ka ge ke ba otlela go phegelela go khunamela medimo ya diswantšho ga bona.

12Ka gona, go Baisraele nna ke bjalo ka sekaku; go Bajuda ke swana le bolwetši bja go ja motho marapo.

13“Ge Baisraele ba bona gore ba a lwala, le Bajuda ba bona bja bona bolwetši, Baisraele ba ile ba ya Asiria go kgopela thušo go kgošikgolo, eupša yena a palelwa ke go ba alafa, goba go ba fodiša.

14Nna ke tla hlasela Baisraele bjalo ka tau; ke tla tsogela Bajuda bjalo ka sebata. Ge ke ba hlwahlwaiša ga go yo a kago ba hlakodiša.

15“Ya ba gona ke boelago mo ke dulago gona go fihlela ge ba dumela gore ba na le molato, mme ba etla ba nnyaka. Ge ba le tlalelong ba tla phegelela go nnyaka.”

← Chapter 4 Jump to: Chapter 6 →